Read ebira Ẹsịta 6 Bible Online

Ẹsịta 6 - ebira bible

Ẹsịta 6

¹Ịnị ịrahụ ịhị ọnọọ gẹdẹ-gẹdẹ, ohinọyị Ahasẹrọsị ọ yị zụ sụ ara. Ọ́ mẹ̀ vavọọ jị areyi, dị ọ tụ́ ká à kụ́ iwe ana a chẹrẹ ịsa ana a mẹ eyinị-eyinị ịnị ẹtẹ ọnọọ va yị ọnị nị. Ịjị a raà kụ́ ọ va yọ, dị a za a ịrịka yọ nị.

²A màa za a ịrịka zụ ọ, di e ve re ka â nyị ụmẹ ọnị Imodekaya kụ́ uruvo aza ana ka ẹnị ẹ̀ wụ́ ohinọyị hi ẹhẹ nị. Aza ẹnẹẹ ẹ vị Ibitana, ọnịrị Ịtẹrẹsị nị. Ẹnị ẹyịva ọnọnị vị ene ee sere oze ọbanyị ohinọyị. Ẹnị ẹyịva ẹnẹnị ẹ gẹ eyi ka ẹnị aa wụ ohinọyị nị.

³Dị ohinọyị họ̀ use ka, “áá nyị ịsa a mẹ ka à sị sị ụbanyị yị Imodekaya ịnị ebira ọnị ọ mẹ aanị?” Dị ezi ahụ anị tụ́ ohi ka ẹ yị nyị nị.

⁴Dị ohinọyị ka ẹnẹ yà ịnị Ikatamba? Ụmẹ ọnọọ gẹdẹ-gẹdẹ Ịhamanị hụụnị ajẹhẹ aa ngụ ịnị ohweje ohinọyịị vẹ nị. Ọnị vi ana vẹ ka ọnị ọ va kà a yị ohinọyị ka ọnị ee zù Imodekayaa gẹ ọchị ọnị ọnị hi jẹẹ.

⁵Di ezi ahụ anị ka, Ho! Ịhamanị ọ jẹẹ ịnị ohweje avọọ nọ! Dị ohinọyị ka, hị́ ọ mị.

⁶Ịjị Ịhamanị ne tù ohinọyị, dị ohinọyị họ̀ use ka, “sị a vọrọ ka à mẹ̀ yị ọza ọnị ohinọyị òo sị ka ọnị ọ̀ sị ụbanyị yị?” Dị Ịhamanị ro o ka ẹnị a vaa sị ụbanyị yị ọsa ẹ̀ yị vị ọnị.

⁷Di Ịhamanị tụ́ ohinọyị ohi ka, “Taarụ! Ọza ọnị wèe si ka wa sị ụbanyị yị,

⁸jẹẹ à kụ́ awuru ohinọyị chire e, dị à sị ọ tụra umaata ọnị ohinọyịị̄ tụra, di è kú ọ amu ohinọyị.

⁹À kụ́ awuru ọnọọ ọnịrị umaata yị ọnya ịnị ọdọvịdị anụkọrọ ohinọyị nịnị, dị ọ sị awuru ọnọọ chire ọza ọnị ohinọyị sị ụbanyị yị aanị. Ọ̀ọ vavọọ reè chire e yọ, dị ọ̀ sị ọ tụra umaata ngụ ịnị ubooro zịịzị. Dị ọ yà ọvịdị anị, dị ọọ nọ̀ ọ ka è re e ka, aanị ohinọyị mẹ̀ sị ụbanyị yị ọza ọnị o sì anị nị oo!”

¹⁰Dị ohinọyị kà yị Ịhamanị ọ̀ sị wụsẹ vavọọ na mẹ yị Imodekaya ana vị Aniju anaā yaatẹ oze ovwoovu ohinọyị avọọ. Ọ kụ́ awuru ọnọọ ọnịrị umaata anka ọ mẹ̀ kà a. A sị ọ yị zẹẹ ka à nyị ịsị ẹ jị ha.

¹¹Ịzẹyịza dị Ịhamanị kụ́ awuru ọnọọ hi Imodekaya ẹngụ nị, dị ọ sị ọ tụra umaata ngụ ubooro zịịzị nị. Di Ịhamanị yà ọvịdị anị aa nọ́ ọ ka, é ve re e ịsị ohinọyị mẹ yị ọza ọnị o si ka ọnị aa sị ụbanyị yị.

¹²Ịjị ẹ sị mẹ ta, dị Imodekaya và na yaatẹ oze ovwoovu ịdị ohinọyị nị. Dị Ịhamanị ọnị zwe na ngụ eehi, dị ọ na và ụvọ kú eyi di aa jị òrèrè nị.

¹³Ọ mẹ̀ tù ịnị eehi, dị ọ kà ịsa ana mẹ zụ̀ ose anị Ịzẹrẹsị ọnịrị ọta anị nị. Dị anajuwe anị nịnị ọnịrị ose anị kà a yọ ka ọ mè si nyima aa hyẹdụ ọvịdị Imodekaya ana vị Aniju aanị, ọ yị va zụụ rị ọ. Ẹ yị vị akaaka ọ vị o vee vú ẹtẹ ọvịdị anị nị.

¹⁴Ịrẹyị ọnọnị ẹ yịị ta wa kà, dị ọnụtụ ohinọyị va hị́ ọ eyiha-eyiha ka ọ̀ na rị ịsa ọnị Ẹsịta mẹ nị.