Read ebira Ọyịkụra 1 Bible Online

Ọyịkụra 1 - ebira bible

Ọyịkụra 1

¹Ịrẹha ezi Ijekọvụ ẹnị ẹnịrị anineehi ẹnịnị saasa Ijekọvụ nọ ịnị Ijipiti ẹ vị:

²Irubẹnị, Isimiyọnị, Ireevi, Ijuda,

³Iisaka, Izeburuni, Ịbẹnjamịnị.

⁴Ịdaanị, Inahwitari, Igadi ọnịrị Aseri.

⁵Avaba ezi ana hụrẹ ịpa Ijekọvụ vẹ ẹhẹ vị ẹnị ẹtarẹwụ. Ijosẹẹhụ ọnị ộ vịdị zị nọ Ijipiti.

⁶A màa yị mẹ̀ ẹ na, Ijosẹẹhụ ọnịrị ẹnẹbẹnị anị nịnị beri ọhụva anị ê wusu. Avaba anụmẹ ọnọọ ẹnị e re wusu.

⁷Ama Anisirẹrị nịnị vị ana nyayịnẹ ha ẹnẹmẹhị. Ẹnịnị ệ rụrụ ẹtẹẹtẹrẹ dị ẹ kụkụ gwẹtẹ kẹnẹ nị.

⁸Â vana nyị ụmẹ ọnya dị a nyị ohinọyị ọwọọwa ana rị Ijipiti nị ohinọyị ọnọọ ọ yị yẹ ẹngụ ọza oni Ijosẹẹhụ vị.

⁹Ẹkụhị ọnya dị ọ hị́ aza anị dị ọ ka, “Wáá yẹ ka Anisirẹrị ẹnẹnị aa rụrụ baaba. Ẹnịnị ee vee huna ẹnị.

¹⁰Dị ọ ka ẹ mẹ̀ maanị sị rụrụ aanị àa na nyị aza ọnị ịrẹkụ chị́ yị ẹnịrịị Anisirẹrị ẹ nyayịnẹ na vaka aza ẹnẹẹ dị ẹ baku ẹnị. Ịjọnọọọ di e si zwe hụụ ịzọọ. Dị ọ ka agụvị avọọ à vẹ ẹnị e sì oze dị ẹnị ẹ̀ za ụrụrụ ẹnịnị jẹẹ.”

¹¹Ịzẹyịza dị ẹ na nyị aza ana aā kụ́ azaa mẹ̀ ụkọrọ ka ẹ̀ vaa kụ́ Anisirẹrị naa mẹ̀ ụkọrọ ọkatẹngụ nị. Â sị ụkọrọ ọkatẹngụ yị wa. A ka ẹ̀ẹ dà ụhwọ yị ohinọyị Anijipiti Ipitomi ọnịrị Iramesisi.

¹²Ama Ịjị e nyima dị a maanị aa sị ụyaa rị wa, dị ahịka ịjọnọọ Anisirẹrị aa rụrụụ hu avọọ nị. Ịjọnọọ dị Anijipiti kuku ee hị́ angwa Anisirẹrị, dị ẹ rẹ yaa kụ́ ayị ẹnịnị ẹtẹẹtẹrẹ nị.

¹³Di Anijipiti aa za waa mẹ̀ ụkọrọ edivi-edivi nị.

¹⁴A ka ẹ̀ẹ ba ụvụ, dị ẹ̀ẹ jị ọ dị ẹ̀ rẹẹ mẹ̀ ụkọrọ ịnị aarẹ. Ọsọnị ộ mẹ̀ ka Anisirẹrị ẹ̀ rị ụya ana ngụ ajẹ. Di Anijipiti aa mẹ wa ẹnị ẹzụụ̄ mẹ ẹvụ nị.

¹⁵Ụmẹ ọnya di ohinọyị Anijipiti rẹ na hị́ anyẹnẹẹ anaā gụ anẹẹ Anihiburu ụvọ ẹ̀ẹ yaa ma ozi nị. Anẹẹ ẹnẹẹ ẹ rị Isipira ọnịrị Ipuwa nị.

¹⁶Di ohinọyị ka: ẹ̀ẹ yaa naa gụ anẹẹ Anihiburu ụvọ ẹ̀ẹ yaa ma ozi dị ẹ̀ si eyi pè wa. Ọ kà àa vị ozi ọnọrụ aa ma nị, dị ẹ̀ wụ̀ ọ. Ama àa vi ozi ọnẹẹ yọ nị, dị ẹ̀ naavọ.

¹⁷Ama anẹẹ ana aā mẹ ọgụvọọ yị anẹẹ Anihiburu aanị ẹnị ệ nyị angwahi Ohomorihi. Ẹnịnị ẹ yị sị ịrẹyị ohinọyị Anijipiti mẹ̀ ụkọrọ. Èe re ka ozi ana aa ma vị ọnọrụ, ẹnịnị ẹ yị wụ̀ ọ.

¹⁸Di ohinọyị Ijipiti va hị́ anẹẹ ẹnẹẹ dị ọ ka: Sị ẹ yaa mẹ aanị? Ọ kà sị ẹ vẹ dị ẹ̀ yị wụ ozi ọnọrụ Anihiburu.

¹⁹Dị anẹẹ ana aā mẹ ọgụvọọ yị anẹẹ Anihiburu tụ́ ohinọyị ohi dị ẹ ka, “Wáá yẹ ka anyẹnẹẹ Anihiburu e yi vene anyẹnẹẹ Anijipiti? Ẹ ka ẹnị ẹ̀ẹ naa ngụ ịda ẹnịnị, ẹnị ne tù ka e si ozi ẹnịnị ma. Ẹ ka ozi ọ ma tụ́ wa akanya.”

²⁰Ohomorihi ô mẹ ka ò zee yị anẹẹ ẹyịva ana aā gụ anẹẹ Anihiburu ụvọ, di Anisirẹrị ẹnị raa yịị rụrụụ hu avọọ pooro kẹnẹ nị.

²¹Agụvị ka ê hí angwa anị, dị Ohomorihi mẹ ka è re ozi ma ẹtẹẹtẹrẹ nị.

²²Di Ihwarawo kụkụ va mẹ ọda dị ọ kà a yị avaba aza anị dị ọ ka, “Avaba ozi ọnọrụ anị Anihiburu ọ̀ọ ma è ne ne wa ngụ irehu Ịnayịrị. Ama à navọ ozi ọnẹẹ ẹnị ẹ̀ẹ ma.”