Read ebira Ọyịkụra 28 Bible Online

Ọyịkụra 28 - ebira bible

Ọyịkụra 28

¹Ẹnẹyịmavara ọ rẹ kà a yi Imosiisi ọ ka kà a ka à sị Eerọnị ẹnẹbẹnị awụ hụụnị Anisirẹrị nịnị va wụ. Kà a ka ọnịrị Inadabi, Abihu ne beri Eriyaza ọnịrị Ịtama ezi anị ẹ̀ zị vẹ. Ẹnị ẹ vaa vị ohirẹsụ irehi amị dị ẹ yaa mẹ ụkọrọọ mị nị.

²Jị awuru ohirẹsụ irehi Ohomorihi yị Eerọnị ẹnẹbẹnị awụ. Awuru ọnọọ ọ vị awuru ana rụra mẹ ọvị dị ọ̀ sị ụbanyị yị ọza.

³Kà ẹ yị avaba aza ọnị mị sị ịrẹyọyẹ yị ka ẹ̀ yara mẹ̀ ụkọrọ tụ́ ịnị awuru ka ẹ̀ vavọọ jị awuru ọnọọ yị Eerọnị. Awuru ọnọọ a vaa sị sị ọ mị ka ọ̀ vị ohirẹsụ irehi amị, dị ọ̀ mẹ ụkọrọọ mị nị.

⁴Aanị ẹ mẹ̀ vaa jị ẹnya Eerọnị nị: Ọ vaa nyị ọtịnịnẹ ēni e hi, dị ọ va nyị awuru ọgọdọ ene ee chiree tụra a. Di e ve chire ịharamịra kú awuru ọgọdọ ọnọọ. Dị a va jị ọsa ọnị ọ vaa sị gẹ ịrachị. Dị ọ jị ubobo tụ́ ọ. Di a va nyị ēni e hi anka ụbaja, dị ọ sị za ọtẹ. Ẹngụ ẹnya ọnọọ ẹ vaa jịị yị Eerọnị ẹnẹbẹnị awụ ọnịrị ezi anị nị. Dị ẹnịnị ẹ̀ vị ohirẹsụ irehi amị dị ẹ̀ sịị mẹ ụkọrọọ mị.

⁵Enyi owu ene e ve sii hi ịta awuru ẹnẹẹ vi igooru, ivuru, enyi ivuru ọnịrị ovivi ēni e pō vabẹ ne beri owu ovivi ọnịrị owu ozoza.

⁶Owu ēni e ve sii hi ịta ịharamịra ọnọọ vị eni enyi anị vaa vi igooru, ivuru, ọnịrị enyi ivuru ọnịrị ovivi ēni e pō vabẹ ne beri owu ovivi. Dị ụ sị owu ozoza ana a ta vabẹ tụ́ ọ. Dị ahịka ọza ana yẹ eyi ụkọrọ ẹtẹẹtẹrẹ o hi ọ nị.

⁷Navọ ọ̀ nyị ọtụrịza ẹẹva tụ́ ọgọgọ anị ẹyịva agụvị dị à zụ sị jị ọ kuru.

⁸Owu ọnyọọnya u ve sii hi ọnịrị ụbaja anị ana a vaa sị za ọtẹ nị. Ọza ana a yẹ eyi ụkọrọ o re vee hi ọnị nị. Enyi owu ene e ve sii hi ọ vi igooru, ivuru, ọnịrị enyi ivuru ọnịrị ovivi ēni e pō vabẹ ne beri owu ovivi. Dị ụ rẹ si owu ozoza ana a tá vabẹ beri ọ.

⁹Sị ịrẹta ọkatarihi ẹẹva ana dà achẹrẹ irenyi-irenyi tụra ẹngụ dụ wa chẹrẹ ịrẹha ezi Isirẹrị hi ọ

¹⁰dị ahịka ẹ mẹmẹ vị ọzọkụ yị ẹngụ ụ sị chẹrẹ wa nị. Wàa chẹrẹ ịrẹha aza ẹnị ịhịnọnyị tụ́ ịnị ịrẹta ọnya, dị ụ rẹ chẹrẹ aza ẹnị ịhịnọnyị tụ́ ịnị ịrẹta ọsa.

¹¹Chẹrẹ ịrẹha ẹnẹẹ anka ọnụna nịnị mẹ̀ẹ bẹ ịsị a sịị sị ụvọọ tụ́ ini iwe avọọ. Dị ụ kụ́ ịrẹta ẹnẹẹ chire ẹkara ana a sị igooru mẹ

¹²di we kuru wa za ọtụrịza ana yà ịnị ịharamịra ọnọọ. Ịrẹta ẹnẹẹ a vaa sị tamayị ezi Anisirẹrị pooro nị. Avọọ Eerọnị mẹ̀ vaa kụ́ ịrẹta ẹnẹẹ tụra ịza anị, dị ọ̀ mẹ ka ẹmị Ẹnẹyịmavara maā tamayị ẹnịnị pooro nị.

¹³Rẹ sị igooru mẹ ẹkara

¹⁴dị wa rẹ sị igooru ozoza mẹ ẹba ẹẹva, di u we kuru wa za ọtụrịza ẹnẹẹ.

¹⁵Jị ọtụrịrachị tụ́ ịnị ẹnya ọnọọ. Ọza ana yẹ eyi ụkọrọ ẹtẹẹtẹrẹ ọ vaa jị ọ nị. Ọtụrịrachị ọnọọ ohirẹsụ irehi Ohomorihi nịnị ve sii sì iruvo dị ẹ̀ zụ yẹ ịsa ẹnị ẹmị Ohomorihi sì nị. Owu ọnị ụ sị jị ịharamịra avọọ ụ rẹ vaa sị jị ọtụrịrachị ọnọọ nị. Enyi owu anị vaa vị igooru, ivuru, enyi ivuru ọnịrị ovivi ēni e pō vabẹ ne beri owu ovivi. Dị ụ rẹ sị owu ozoza ana a tá vabẹ tụ́ ọ.

¹⁶Ụgọdọ ọtụrịrachị ọnọọ ọnịrị ụgana anị vaa vị ẹbẹẹbẹ. Ahụ ọnya ẹ vaa vị nị. Dị ụ che e ẹẹva tụra ẹngụ.

¹⁷Dị ụ va sị ịrẹta ozoza ana katarihi irenyi-irenyi di u tò wa ọrọ ẹẹna tụ́ ọ. Ịrẹta ene vee hi ịnị ọrọ ịpaapa yị: ịrẹta ovivi anaā za nyoonyo ọnịrị ịrẹta ore ana yà anka ore avọọ ne beri ịrẹta ovivi ana rẹ yà anka ore avọọ.

¹⁸Ịrẹta ene vee hi ịnị ọrọ ọhụva yị: ịrẹta ọkatarihi ana ka ọnị ọ̀ vị anangẹrẹ ọnịrị ịrẹta ozoza ana vi onivuru ne beri ịrẹta ozoza nyoonyo ana katẹngụ ẹtẹẹtẹrẹ.

¹⁹Ịrẹta ene vee hi ịnị ọrọ ọhụta rẹẹ̀ yị: ịrẹta ozoza ana ka ọnị ọ̀ vị anangẹrẹ ọnịrị ịrẹta ozoza ana katẹngụ dị ọ dà achẹrẹ anka ivuru ọnịrị ovivi ēni e pō vabẹ avọọ.

²⁰Ẹngụ ịrẹta ene re vee hi ịnị ọrọ ọhụna yị: ịrẹta ozoza ana vị anangẹrẹ ọnịrị ịrẹta ana nyị achẹrẹ irenyi-irenyi tụra ẹngụ ne beri ịrẹta ana dà achẹrẹ ovivi, ore ọnịrị ondaadu. Kụ́ ịrẹta chire ẹkara ọnị ụ sị igooru mẹ hi ẹtẹ.

²¹Ẹwụrẹva ịrẹta ẹnẹẹ vaa vị nị. Ịrẹta ọnya-ọnya ọ̀ jẹẹ yị ịrẹha ozi Isirẹrị ọnya-ọnya. Bẹ ịrẹha ịrẹsụ Isirẹrị ẹwụrẹva hi ịnị ịrẹta ẹnẹẹ. Ịrẹha ịrẹsụ ọnya ọ̀ yà ịnị ịrẹta ọnya.

²²Sị igooru obooro mẹ ẹba dị wa ta a anka obo avọọ ana a vaa sị za ọtụrịrachị ọnọọ.

²³Sị igooru mẹ ochirigege ẹẹva di wa sị za ọtụrịrachị ọnọọ ọgọgọ ẹyịva.

²⁴Dị ụ va sị ẹba igooru ẹnẹẹ di u kuru wa gẹ ochirigege ana yà ịnị ọgọgọ ẹyịva ọtụrịrachị ọnọọ.

²⁵Dị ụ rẹ sị ịrẹsụ ẹba ẹnẹẹ ana vọ di u kuru wa za aha ẹẹva ana mẹ dị ẹ̀ gẹ ọtụrịza ana tụra ịharamịra, dị ọ̀ và hi ọvịdị.

²⁶Rẹ sị igooru mẹ ochirigege ẹẹva dị wa sị za ụtọ eyi ẹyịva ọtụrịrachị ọnọọ, dị ahịka ịnị ịnẹ anị e hi nị. Dị ẹ̀ gụrị ịharamịra awuru ọnọọ.

²⁷Dị ụ rẹ sị igooru mẹ ochirigege ẹẹva dị ụ sị wa za akẹtẹ ọtụrịza di è hi ọvịdị ịharamịra ọnọọ ọ̀ gụrị ịzị a zị gẹ ẹ dị ọ̀ maanị yà akẹbẹẹba ụbaja ana a sị za ọtẹ chee aanị.

²⁸Dị ụ va sụ ochirigege ana yà ịnị ọtụrịrachị za ochirigege ana yà ịnị ịharamịra ọnọọ. Dị ahịka obo onivuru ụ vavọọ sị sụ́ ọ nị, dị ụ sị kụ́ ọnịrị ụbaja ana a sị za ọtẹ gẹ. Ọnọọ vaa mẹ ka asị ọtụrịrachị re oze jesi hụụnị ịharamịra ọnọọ nị.

²⁹Ụmẹ tụra ụmẹ ọnị Eerọnị àaa ngụ Aha Ọnịnị, dị ọ kụ́ ịrẹha Anisirẹrị ene hi ịnị ọtụrịrachị avọọ tụra ayị anị. Ọtụrịrachị ọnọọ o ve sii si iruvo dị ọ̀ yẹ ịsị mèe sì nị. Ọnị ọ vaa mẹ ka ẹmị Ẹnẹyịmavara maa tamayị ẹnịnị pooro nị.

³⁰Rẹ kụ́ ịsị e sii sì iruvo ịrẹyị ana aā hí Urimi ọnịrị Itumini dị wa kụ́ wa hi ịnị ọtụrịrachị ọnọọ. Ẹ̀ vavọọ tụra Eerọnị ayị ụmẹ tụra ụmẹ ana àaa ngụ ụ vẹ ọvịdị ẹmị Ẹnẹyịmavara. Avọọ Eerọnị mẹ̀ vee chire ịsị ọ vaa sị yẹ ịsị mi sìi kú ịrachị dị ọ̀ọ kà a yị Anisirẹrị nị.

³¹Sị ịta onivuru dị wa sị jị awuru ēni e vee chire kú ịharamịra.

³²Dị ụ mẹ oze tụ́ ịnị akakana anị ịzị a vaa zịị jị ịrẹsụ ngụ ọ. Dị ụ sị ịta kara ọrọkọ anị agụvị asị ọ na.

³³Sị owu mẹ ododo dị achẹrẹ ẹnyị ọ̀ vị onivuru, dị ẹnyị ọ̀ vị achẹrẹ ivuru ọnịrị ovivi ēni e pō vabẹ, dị ọsa ọ̀ vị ovivi. Di u kuru wa gẹ ụtọ awuru ọgọdọ ọnọọ na gẹ ẹtẹ. Di u sị igooru mẹ ikono jị wa ịnẹ.

³⁴Ikono igooru ọnịrị ododo oni u si owu mẹ avọọ vị ana vaa há ẹngụ, dị ụ vavọọ kuru wa gẹ awuru ọgọdọ ọnọọ na gẹ ẹtẹ.

³⁵Eerọnị aa naa mẹ̀ ụkọrọ amị, ọnị o vee chire nị. Àaa ngụ Aha Ọnịnị amịị na, ọ̀ọ́ raa jịnẹẹ vẹ, dị aza aa wụ́ ikono ẹnẹẹ màa sụ́ ịrẹyị. Ọ̀ vavọọ kụ́ ẹnya ọnọọ agụvị asị o sú.

³⁶Si igooru obooro mẹ ẹnya ọnya chẹtẹẹ aanị. Di u wa chẹrẹ ịsa anka ịsa ana a bẹ avọọ tụ́ ọ. Ịsị ụ vaa chẹrẹẹ tụ́ ọ ọ vị “A raà sị yị Ẹnẹyịmavara”.

³⁷Kuru obo onivuru tụ́ ọ dị wa sụ́ ọ za ubobo ohirẹsụ irehi amị. Ọvịdị ubobo ọnọọ ọ vaa yà nị.

³⁸Avọọ Eerọnị mẹ̀ vaa jị ọ za ibe anị nị. Ọnọọ vaa mẹ ka ma dọ avaba ịsọvọ anị Anisirẹrị ẹ̀ẹ mẹẹ mị, ẹ̀ẹ daka nyeeyi ẹ maa mẹ̀ ẹ.

³⁹Sị owu ozoza hi ịta ọtịnịnẹ awuru ọnọọ, dị wa rẹ si owu ozoza hi ịta ubobo ọnọọ. Ọza ana yara mẹ̀ ụkọrọ tụ́ ịnị ịta o vee hi ụbaja ọnọọ nị.

⁴⁰Rẹ jị ọtịnịnẹ awuru di we hi ụbaja ọnịrị ubobo yi ezi Eerọnị. Ẹnya ẹnẹẹ ẹ̀ rụra mẹ ọvị dị ẹ̀ rẹ sị ụbanyị yị ọza.

⁴¹Wàa maanị raà kụ́ ẹnya ẹnẹẹ hi Eerọnị ọnịrị ezi anị ẹngụ, dị ụ va ká angwẹ kú wa, dị ụ nyị wa tụ́ ịnị ụkọrọ amị. Sị wa dị ẹ̀ kụkụ vị aamị, dị ẹ̀ vi ohirẹsụ irehi amị dị ẹ̀ẹ mẹ ụkọrọọ mị.

⁴²Si ịta ozoza dụ wa sị jị ọvẹntẹ yị wa di è si kú ahwaahụ ẹnịnị. Ọvẹntẹ ọnọọ ọ̀ gọdọ hụụnị ọtẹ na kà wa usi.

⁴³Eerọnị ọnịrị ezi anị àa ngụ ịnị ajẹngụ ọnọọ ẹ̀ vụ́ ọvẹntẹ ọnọọ. Ẹ̀ẹ rẹ yàa nọ ịnị ụta, ka ẹnị ẹ̀ na mẹ̀ ụkọrọ Aha Ọnịnị ẹ̀ rẹ vụ ọ. Ẹ̀ yị vavọọ vụ ọ, vị ẹ yaa kụ́ ịvịị tù ẹngụ ẹnịnị di e sú nị. Ido ọnọnị vị ọnị mị jị yị Eerọnị ọnịrị ezi anị ka ẹ̀ si eyi pe e pooro zịna-zịna.