Read ebira Ọyịkụra 35 Bible Online

Ọyịkụra 35 - ebira bible

Ọyịkụra 35

¹Di Imosiisi va hị́ avaba Anisirẹrị gụ dị ọ ka, “Ịsa ẹnị Ẹnẹyịmavara kà wa mẹ nịnị yị.

²Ọ kà wa mẹ avaba ụkọrọ ọnị ụ wàa mẹ nịnị ịnị akakana ẹkụhị ịhịnọnyị. Ọ kà ẹkụhị ọhụhịmba vị ẹkụhị anị. Ẹkụhị ụhwọtụ ọ vị nị, agụvị avọọ à sị tịtẹ yị ọnị Ẹnẹyịmavara. Ọ kà ọza ana àa mẹ̀ ụkọrọ ọnyọọnyị ịhị ọnọọ, à wụ̀ ọ.

³Asị ụ hyakụ kà ịra ini eehi awụ nịnị ịnị ẹkụhị ụhwọtụ.”

⁴Imosiisi ộ kà a yị avaba Anisirẹrị dị ọ ka ịsa ẹnị Ẹnẹyịmavara kà wa mẹ nịnị yị:

⁵Ịsa ọzọza ọ̀ọ nyị ọ̀ sị ịnị anị na yị Ẹnẹyịmavara ọza ana ayị anị ọ̀ọ vavọọ sị ọ ẹngụ ịsị ẹ zụ sị va yị Ẹnẹyịmavara yị: igooru, ẹkẹhị ọnịrị enyusẹ ana aā hị́ ịkọpa.

⁶Ẹ̀ rẹ sị ịta ozoza ēni enyi anị vị ivuru ọnịrị ana a si ovivi ọnịrị ivuru po enyi anị vabẹ ne beri ovivi ọnịrị ẹyị atẹmẹ ovivi va yị Ẹnẹyịmavara. Ẹ rẹ sị ịta ana a sị ẹyị ẹvụ hi

⁷ne beri ịtụmpaha atẹmẹ ana a jị ngụ azọnọ ovivi di o zoza ne beri ịtụmpaha ozoza va yọ, ọ ka ẹ̀ rẹ kụ́ ọchị ịchẹkẹnẹ va yọ.

⁸Imosiisi ka ẹnịnị ẹ̀ rẹ sị angwẹ ana vaa sị tụ́ ini ozotupa, dị ẹ̀ rẹ sị angwẹ ozoza ana aā kà a hi ọza ịrẹsụ ne beri eturare ana agụ anị zoza tụ́ ọ.

⁹Dị ẹ̀ rẹ sị ịrẹta ozoza ana katarihi dị ọ nyị achẹrẹ irenyi-irenyi vẹ ana a vaa sị mẹ ọtụrarachị tụ́ ịnị ịharamịra awuru oni Ohirẹsụ ọbanyị irehi Ohomorihi vee chire.

¹⁰“Avaba aza ana yara mẹ̀ ụna ịnị ẹngụ awụ nịnị ẹ̀ vẹ, dị ẹ̀ va mẹ̀ avaba ụkọrọ anka Ẹnẹyịmavara mẹ̀ ká a.

¹¹Ajẹngụ ọnọọ vaa nyị ohweje ana kara a. Ọ rẹ vaa nyị enyusẹ ene e tụ́ ana nyị ịrẹsụ kẹrẹdẹẹ, ọtụ ọchị ana a vaa sị jị ọ ọnịrị ịzị ọtụ nịnị va jẹẹ.

¹²A rẹ vaa nyị apoti ịzị a sị ịrẹyị oni Ohomorihi ọnịrị aza anị kà tịtẹ ana a chẹrẹ tịtẹ tụ́. Apoti ọnọọ vaa nyị ọchị ọnịrị òkú ọnịrị ịta ene gu ọ hi.

¹³A rẹ vaa nyị itevuru beri ọchị anị ọnịrị ẹnya ụkọrọ ene hi ịnị anị ne beri Ịbụrẹẹdị ana a sị yị Ẹnẹyịmavara.

¹⁴Dị a rẹ nyị ịzị aā sị ozotupaa tụ́ di è zụ re ẹtẹ ne beri avaba ẹnya anị. Dị ọ nyị ozotupa ọnịrị angwẹ ene ee sii hu ịra.

¹⁵Ịsa ọsa ana rẹ vaa yà ịzọọ vị ụta ịzị a vaa yàa rị eturare ịra beri ọchị anị. Dị a rẹ nyị angwẹ ana a sịị̄ nyị ọzaa tụ́ ịnị ụkọrọ Ohomorihi beri eturare ana agụ anị zoza. Oze ajẹngụ ọnọọ vaa nyị ịta ana a sị jị ọ.

¹⁶A vaa nyị ụta ịzị a vaa yàa rị ịsọvọ ịraa yị Ohomorihi. Ụta ọnọọ vaa nyị ịtanggọrọ ana a sị enyusẹ ana aā hị́ ịkọpa tụ́. Dị ọnị rẹ nyị ọchị anị ne beri avaba ẹnya ụkọrọ anị. Ọ vaa nyị ịchacha ana a vaa ka enyi hụụnị anịị nyịna ẹngụ. Ịchacha ọnọọ vị ana a sị ịkọpa mẹ, dị ọ nyị ịzị aā sị ọ tụ́.

¹⁷A rẹ vaa nyị ịta ana a sị mẹ ohweje kara ajẹngụ ọnọọ. Ohweje ọnọọ vaa nyị ọtụ ọnịrị ịzị ọtụ ẹnẹẹ vaa jẹẹ. Dị ọ rẹ nyị ịta ana jị oze ana na ngụ ọ.

¹⁸A vaa nyị ẹka ana a vaa sị kà ajẹngụ ọnọọ ọnịrị ohweje anị ọnịrị obo anị.

¹⁹Dị a rẹ nyị awuru ēni e hi ana aza ana vaa mẹ̀ ụkọrọ ịnị ajẹngụ ọnọọ vee chire. A vaa nyị awuru ana Eerọnị ana vi ohirẹsụ irehi Ohomorihi vee chire àa mẹ mẹ̀ ụkọrọ Ohomorihi. Dị a rẹ nyị ēni ezi anị vee chire ẹ̀ẹ yaa mẹ ụkọrọọ yị Ohomorihi anka ohirẹsụ irehi Ohomorihi.”

²⁰Ịjị Imosiisi sị ịrẹyị anị kà, dị avaba Anisirẹrị hụụ ịda anị dị ẹ yaa na nị.

²¹Dị avaba aza ene sì, dị ayị ẹnịnị sị ọ na, dị ẹ na kụ́ ịsa va yị Ẹnẹyịmavara kà à sị mẹ̀ ụkọrọ ajẹngụ ịzị aā gẹ nị. Ẹnya ana a vaa sị mẹ̀ ụkọrọ ịnị ajẹngụ ọnọọ ọnịrị awuru ana aza ana aa mẹ̀ ụkọrọ Ohomorihi vee chire vị ẹnị ẹ kụ́ vẹ.

²²Avaba aza ene sì, ọnọrụ ọnịrị anẹẹ vị ana kụ́ ịsa ọvị irenyi-irenyi ana a sị igooru mẹ vẹ, ẹhụụ arị, ochirụtọ, ochirigege ọnịrị ịsa ọbẹ. Avọọ ẹnịnị mẹ̀ kụ́ wa vẹ dị ẹ sị va yị Ẹnẹyịmavara nị.

²³Avaba aza ana nyị owu onivuru ọnịrị owu ana a sị ovivi ọnịrị ivuru po enyi anị vabẹ ne beri owu ovivi vị ana kụ́ wa vẹ. Avọọ aza ana nyị ịta ozoza ọnịrị ẹyị ẹvụ ne beri ịtụmpaha ịdẹba ana vi ovivi ọnịrị ịtụmpaha ozoza ẹnị mẹ̀ rẹ kụ́ wa vẹ nị.

²⁴Aza ana nyị ụkata ệ kụ́ ẹkẹhị ọnịrị enyusẹ ana aā hị́ ịkọpa va yị Ẹnẹyịmavara. Aza ana nyị ọchị ịchẹkẹnẹ ana vọrọ ka à sị mẹ̀ ụkọrọ ajẹngụ ọnọọ ẹnị vị ana rẹ kụ́ wa vẹ.

²⁵Avaba anyẹnẹẹ ana yara mẹ ụna ệ sị ụvọ ẹnịnị ngwẹ owu dị ẹnị rẹ kụ́ ọ vẹ nị. Ệ kụ́ owu onivuru ọnịrị owu ana a sị ivuru ọnịrị ovivi po enyi anị vabẹ ne beri owu ovivi vẹ, ọnịrị ịta ozoza.

²⁶Dị avaba anyẹnẹẹ ana yara mẹ ụna, dị ayị ẹnịnị rẹ sị ọ sị ẹyị ẹvụ ana a sị vẹ dị ẹ ngwẹ ẹ nị.

²⁷Dị azọkụ Anisirẹrị ẹnị kụ́ ịrẹta ozoza ana katarihi dị ọ nyị achẹrẹ irenyi-irenyi beri ịrẹta ẹkẹhị-ẹkẹhị ana vọ vẹ ka à sị mẹ ọtụrarachị tụ́ ịnị ịharamịra oni ohirẹsụ ọbanyị irehi Ohomorihi vee chire nị.

²⁸Ẹ rẹ sị angwẹ ana a sịị̄ nyị ọzaa tụ́ ịnị ụkọrọ Ohomorihi vẹ ne beri angwẹ ene ve sii hu ozotupa ọnịrị eturare ana agụ anị zoza.

²⁹Avaba Anisirẹrị nịnị ene sì, anọrụ ọnịrị anẹẹ ệ kụ́ ịsa vẹ ka à sị mẹ̀ ụkọrọ ẹnị Ẹnẹyịmavara kà a yị Imosiisi ka à mẹ.

³⁰Di Imosiisi kà a yị Anisirẹrị dị ọ kà Ẹnẹyịmavara ọ raà nyị Ibezareri ozi Uri ana ada anị vị Ihuri. Anijuda ẹ vị nị.

³¹Ohomorihi ộ sị Ụhwẹ anịị yị Ibezareri dị ọ mẹ ò nyị ịrẹyọyẹ, di ò yẹ eyi ụkọrọ, dị ọ rẹ yara mẹ ụna irenyi-irenyi nị.

³²Ẹnẹyịmavara kà ọ̀ sị igooru ọnịrị enyusẹ ēni e siī tụ́ ẹkẹhị ne beri enyusẹ ana aā hị́ ịkọpa dị ọ̀ sị mẹ ụna hi ini ajẹngụ ọnọọ.

³³Ọnị ọ vaa sị ịrẹta dị ọ dà a di o re tò o nị. Ọ rẹ vaa mẹ ụna hi ịnị ọchị ajẹngụ ọnọọ, dị ọ rẹ mẹ ụkẹkẹ irenyi-irenyi ana vọ hi ọ.

³⁴Ẹnẹyịmavara ọ rẹ raà sị ụkata yị ọnịrị Ohoriyabi ana vi ozi Ahisamachị ka ẹ̀ zụ sị ụkọrọ ụvọ ẹnịnị kọ aza ẹnẹsa. Ohoriyabi ọnọọ ọnị vị Anịdanị.

³⁵Ẹnẹyịmavara ọ raà sị ụkata yị wa ka ẹ̀ yẹ eyi ụkọrọ dị ẹ̀ yara mẹ ụna irenyi-irenyi. Ẹ yara si owu onivuru ọnịrị owu ana si ivuru ọnịrị ovivi pō enyi anị vabẹ ne beri owu ovivi dị ẹ sị mẹ̀ ụkọrọ tụ́ ịnị ịta. Ẹnịnị ẹ rẹ yara hi ịta ozoza irenyi-irenyi. Ọga ẹnịnị vị tụ́ ịnị ụkọrọ ụvọ nị.