Read ebira Ọyịkụra 37 Bible Online

Ọyịkụra 37 - ebira bible

Ọyịkụra 37

¹Ibezareri ộ sị ọchị ịchẹkẹnẹ dị ọ sị mẹ apoti ịrẹyị ana a ka tịtẹ nị. Ụgọdọ apoti ọnọọ vị ẹhụụ ahụ ẹẹta rị ẹjịjị, dị ụgana anị vị ẹhụụ ahụ ẹẹva, dị ahịka ẹhụụ ahụ ẹẹva ọ rẹ nẹba vị nị.

²Dị ọ sị igooru obooro kú avaba anị ịnị ịnẹ ọnịrị ẹhẹẹhẹ nị. Dị ọ rẹ sị igooru kara a ụtọ-ụtọ nị.

³Dị ọ va sị igooru mẹ ochirigege ẹẹna dị ọ sị tụ́ ịnị ahụ ẹyịna apoti ọnọọ nị. Ochirigege ẹẹva yà eyi ọnya, dị ẹẹva rẹ yà eyi ọsa nị.

⁴Dị ọ rẹ sị ọchị ịchẹkẹnẹ bẹ okutẹ ọgọdọ-ọgọdọ dị ọ si igooru kú avaba anị nị.

⁵Dị ọ kà okutẹ ẹnẹẹ ngụ ochirigege ene hi eyi ẹyịva di aa sịị sị ọ nị.

⁶Dị ọ sị igooru obooro dị ọ sị mẹ òkú apoti ọnọọ nị. Ụgọdọ anị vị ẹhụụ ahụ ẹẹta rị ẹjịjị dị ụgana anị rẹ vị ẹhụụ ahụ ẹẹva nị.

⁷Dị ọ va si igooru tụ́ icherubi ẹẹva dị ọ sị ọnya tụ́ eyi ọnya, dị ọ rẹ sị ọsa tụ́ eyi ọsa ịrẹsụ òkú apoti ọnọọ nị,

⁸icherubi ẹnẹẹ vi oni o tụ́ za oku apoti ọnọọ eyi ẹyịva.

⁹Di icherubi ẹnẹẹ kụ̀rà avaka ẹnịnị tụ́ ẹba di e si kú apoti ọnọọ nị. Di icherubi ẹnẹẹ và eyi kà ẹngụ di eyee re òkú apoti ọnọọ nị.

¹⁰Ibezareri ọ rẹ sị ọchị ịchẹkẹnẹ dị ọ sị mẹ itevuru ọnọọ nị. Ụgọdọ itevuru ọnọọ vị ẹhụụ ahụ ẹẹta, dị ụgana anị vị ahụ ọnya rị ẹjịjị, dị ahịka ahụ ọnya rị ẹjịjị ọ rẹ nẹba vị nị.

¹¹Dị ọ sị igooru obooro kú avaba anị, dị ọ rẹ sị igooru kara a ụtọ-ụtọ nị.

¹²Dị ọ bẹ ọchị ụvọ ọnya dị ọ sị kara itevuru ọnọọ, dị ọ rẹ sị igooru kú ọ nị.

¹³Ộ sị igooru mẹ ochirigege ẹẹna, di o tụ́ wa za ẹbẹẹba ahụ itevuru ọnọọ ẹyịva nị.

¹⁴Ochirigege ẹnẹẹ vị ana gụrị ụtọ itevuru ọnọọ, dị ahịka vị ọ za ọchị ana a kanggụ ọ ana a aa sịị sị itevuru ọnọọ nị.

¹⁵Â sị ọchị ịchẹkẹnẹ dị a sị bẹ okutẹ ana a aa sịị sị itevuru ọnọọ nị. Di a sị igooru kú avaba anị nị.

¹⁶Ịchacha ene hi ịrẹsụ itevuru ọnọọ vị ana a sị igooru mẹ. Ẹnya ọnịrị ako ana a vaa sị ká eche ana a sị mẹ̀ ịsọvọ vị ana a sị igooru mẹ.

¹⁷Di Ibezareri rẹ sị igooru di o si tụ́ aha ana a vaa sị ozotupaa tụ́ nị. Ộ sị igooru tụ́ iruvo anị ọnịrị ọchị anị ana gọdọ. Ako ozotupa ọnọọ vị ana sị mẹẹ anka ododo avọọ, dị ọ nyị ịzị e vene ịzị avị ododoō tụụ hụrẹẹ vẹ nị. Avaba anị vi oni o tụ́ vabẹ.

¹⁸Ozotupa ọnọọ vị ana há agẹgẹnẹ ịhịnọnyị. Ẹẹta ê hi eyi ọnya dị ẹẹta re hi eyi ọsa nị.

¹⁹Ako ẹẹta ana sị mẹẹ anka ododo ọchị ana aā hị́ arịmọndị avọọ, anka ọ́ọ̀ọ màa yịị jị ododoo vẹ vi ene hi ịnị agẹgẹnẹ ọnya, dị ẹẹta rẹ vavọọ yà ịnị agẹgẹnẹ ọsa nị. Avọọ agẹgẹnẹ ịhịnọnyị ana há hụụnị ọchị ozotupa ọnọọ mẹ̀ nyị ako ẹnẹẹ nị.

²⁰Ịzị aa sị ozotupa ọnọọ ụvọtaa tụ́ ộ nyị ako ẹẹna ana sị mẹẹ anka ododo ọchị ana aā hị́ arịmọndị avọọ, dị ẹ nyị ịsị e vene ododo ana aa jịị vẹ nị.

²¹Ako ọnya ana sị mẹẹ anka ododo ana aa jịị vẹ avọọ vị ana yà iruvo agẹgẹnẹ ọchị ọnya ana yà ịzị aā sị ozotupaa tụ́ aanị. Dị ọsa rẹ vavọọ yà iruvo ọsa nị. Di ọhụta ọnị rẹ vavọọ yà iruvo ọchị agẹgẹnẹ ọhụta nị. Avaba agẹgẹnẹ ọchị ọnọọ vị ịhịnọnyị.

²²Ako ẹnẹẹ ana sị mẹẹ anka ododo avọọ ọnịrị agẹgẹnẹ ẹnẹẹ ne beri ịzị aā sị ozotupaa ọnọọ hi vị ana a sị igooru tụ́ vabẹ.

²³Dị ọ mẹ ozotupa ịhịmba anị tụ́ ọ nị. Dị ẹ rẹ mẹ ịsị a sịị sị owu anị tụ́ ọ ọnịrị ịchacha oni owu anị vaa sụ atịtọọ hi. Igooru ọ sị mẹ avaba anị nị.

²⁴Avaba igooru ọnị ọ sị mẹ ozotupa ọnọọ ọnịrị avaba ẹnya anị vị igooru ẹnya ịrẹsụ ọnya.

²⁵Ibezareri ộ sị ọchị ịchẹkẹnẹ dị ọ sị jị ụta ịzị a vaa yàa rị eturare ịra nị. Ụgọdọ ụta ọnọọ ọnịrị ụgana anị vị ẹbẹẹbẹ. Ahụ ọnya rị ẹjịjị ẹ vị nị. Dị ahịka ahụ ẹẹta ọ nẹba vị nị. Dị ọ rẹ bẹ ọpanyị anị za a nị.

²⁶Dị ọ sị igooru obooro kú ẹbẹẹba anị ọnịrị avaba akaha anị ne beri ọpanyị anị nị. Dị ọ rẹ si igooru kara a ụtọ-ụtọ nị.

²⁷Dị ọ va sị igooru tụ́ ochirigege ẹẹva, dị ọ sị za a ụtọ-ụtọ eyi ẹyịva nị. Ochirigege ẹnẹẹ ẹ za ọchị ana a vaa sị sị ụta ọnọọ nị.

²⁸Dị ọ va sị ọchị ịchẹkẹnẹ, dị ọ sị bẹ okutẹ, dị ọ sị igooru kú ọ nị.

²⁹Dị ọ rẹ mẹ angwẹ ana a sịị nyị ọzaa tụ́ ịnị ụkọrọ Ohomorihi nị, ne beri eturare ene zoza dị agụ anị zee ọza eyi. Ọza ana yara mẹ eturare ọ mẹ̀ ẹ nị.