Read ebira Ọyịkụra 4 Bible Online

Ọyịkụra 4 - ebira bible

Ọyịkụra 4

¹Di Imosiisi tụ́ Ẹnẹyịmavara ohi dị ọ ka: ọ́ọ́ yẹ ka ẹnịnị ẹ yị vaa dọ ka ịzẹyịza ọnị aa kà nị. Ọ kà ẹnịnị ẹ yị vaa wụ́ ịrẹyị anị. Ọ kà ẹnịnị vị ana vaa kà a ka ireche ọnị ee che nị, ka oni o yi re Ẹnẹyịmavara.

²Dị Ẹnẹyịmavara họ̀ Imosiisi dị ọ ka, “Sị ẹ yà ịnị ụvọ anị avọọ?” Di Imosiisi ka okutẹ yọ nị. Dị Ẹnẹyịmavara rẹ ka o ne e tịtẹ.

³Di Imosiisi ne okutẹ ọnọọ tịtẹ, dị ọ sị vara ẹ́wụ́ nị. Di Imosiisi wụsẹ kà nọ ịrẹma nị.

⁴Dị Ẹnẹyịmavara rẹ kà a yi Imosiisi dị ọ ka, “Ọ tana ụvọ dị ọ̀ sị ọ omuta.” Di Imosiisi tana ụvọ dị sị ọ omuta, dị ẹwụ ọnọọ rẹ sị vara okutẹ tụ́ ịnị ụvọ anị nị.

⁵Dị Ẹnẹyịmavara kà a yị Imosiisi dị ọ ka: Òo tù ịzọọ ọ̀ vavọọ mẹ̀ ịsa ẹnẹnị. Ọnọọ vaa sị zụ̀ Anisirẹrị ka ọnị Ẹnẹyịmavara ana vị Ohomorihi oni ohiku ẹnịnị Abụrahamị, Ayiziiki ọnịrị Ijekọvụ hẹkẹ o re nị.

⁶Dị Ẹnẹyịmavara rẹ kà a yi Imosiisi dị ọ ka: Ọ̀ sị ụvọ chire ịrachị anị. Di Imosiisi sị ụvọ chire ịrachị anị nị nị. Ịjị ọ tụ̀ ọ di o re ka ụvọ anị vị iguha-iguha, anka ụkụ ọbanyị ọ̀ọ za ọza avọọ nị.

⁷Di Ohomorihi rẹ ka ọ̀ varẹma rẹ sị ụvọ anị chire ịrachị anị. Dị ọ varẹma sị ụvọ anị chire ịrachị nị. Ịjị ọ tụ̀ ọ, ụkụ ịsọọnị ộ ta hụụnị ụvọ anị, dị ụvọ anị ọnọọ kụkụ yà anka ẹngụ anị ana vọ nị.

⁸Di Ohomorihi ka, “Ẹ yị dọ ka ịzẹyịza aa kà nị, dị ẹ̀ yị rẹ dọ apẹrẹ ịpaapa nị, â vọrọ ka ẹ dọ apẹrẹ ọhụva.”

⁹Ọ kà ẹ̀ yị daka na dọ apẹrẹ ẹẹva ẹnẹnị, dị ẹ̀ yị sị ụtọ pè Imosiisi nị, dị ọ̀ ká enyi hụụnị okuha Ịnayịrị, dị ọ̀ và a hi ini eteesu. Ọ kà enyi ọnị ọ ká hụụnị Ịnayịrị avọọ vaa vara a tụ́ ini eteesu.

¹⁰Di Imosiisi ka: Ẹnẹyịmavara ọnị, ọ́ọ́ yẹ ka dị ọ va kà ịrẹyị ọnị ọ mā vịdị zị zụ kà ịrẹyị.

¹¹Dị Ẹnẹyịmavara va ka, “Ẹnị ẹ mẹ irenu yị ọza? Ẹ̀nị ẹẹ̄ mẹ ka ọza ò gu irenu? Ẹ̀nị ẹẹ̄ mẹ ka ọza ò gu ụtọ à vị ka òo re ẹtẹ à vị ka ò gu eyi? Aanị ka ẹ yị vị ọnị Ẹnẹyịmavara?

¹²Dị ọ ka ọ̀ọ na, ka ọnị vaa mẹ ka ọ zụ ka ịrẹyị. Ọ rẹ ka ọnị rẹ vaa sị zụ̀ ọ ịsị a vọrọ ka ọ̀ kà.”

¹³Di Imosiisi ka Ẹnẹyịmavara, ọnị ka aarịhịnị ọ navọ ọ̀ tụ́ ọza ẹnẹsa nị.

¹⁴Ịjọnọọ di ebira oni Imosiisi aa mẹ sị kụ Ẹnẹyịmavara ayị nị. Dị ọ ka, “Aanị ka Eerọnị ẹnẹbẹnị anị ana vị Anireevi ọ yị yà ịzọọ? Ọ kà ọnị ộ yẹ ka ọnị ọ zụ kà ịrẹyị ẹtẹẹtẹrẹ. Ọ kà ọ hyakụ aa vẹ oze aanị, aa vaa gẹrị ọ. Ka ịnẹ anị vee hine òo re e.

¹⁵Dị ọ ka Imosiisi ọ vaa kà a yọ ịrẹyị ana àa vọrọ ka ọ̀ kà nị. Ẹnẹyịmavara ọnị vaa jẹẹ wa ịrẹma ẹ̀ẹ yaa ka ịrẹyị. Ọ kà ọnị rẹ vaa sị zụ̀ wa ịsị a vọrọ ka ẹ̀ kà.

¹⁶Dị ọ rẹ ka Eerọnị vị ana vaa dọ Imosiisi ịrẹyị ị kà a yị aza ẹnẹẹ, ọnị ọ vaa vị irenu ọkarẹyị anị nị. Ọ kà Eerọnị vị ana vaa jẹẹ yọ anka Ohomorihi mẹ reree sị ịrẹyị tụ́ ọnịsẹ anị irenu avọọ.

¹⁷Dị ọ ka Imosiisi ọ̀ sị okutẹ ọnọọ rị ụvọ, ọnị ọ vaa sịị mẹ̀ ụkọrọ ịvọpa nị.”

¹⁸Di Imosiisi varẹma ne tù Ijetiro ana vị ọyẹ anị dị ọ ka ọ̀ jẹẹ ọnị ọ̀ varẹma nọ Ijipiti di ọnị ò ne hee anda ẹnịnị ene hi ịzọọ ẹnịnị ẹ̀ẹ da hi. Dị Ijetiro ka ọ̀ naavẹ nị.

¹⁹Imosiisi mẹ yị yà Imidiyani, dị Ẹnẹyịmavara kà a yọ dị ọ ka, “Ọ̀ varẹma nọ Ijipiti agụvị ka avaba aza ene sì ka ẹnị ẹ̀ wụ̀ ọ ê wusu.”

²⁰Di Imosiisi sị ose anị, dị ọ kụ́ ezi anị vaka a dị ọ kụ́ wa tụra ịkẹrịkẹtẹ dị ẹ sị varẹma aa nọ Ijipiti nị. Ộ sị okutẹ oni Ohomorihi ka ọ̀ sị za.

²¹Dị Ẹnẹyịmavara kà a yị Imosiisi dị ọ ka òo tù Ijipiti, re ka wâ mẹ avaba ịvọpa ọnị ọnị sị ụkata yọ ka ọ̀ mẹ éyi Ihwarawo. Ọ kà ama ọnị vaa mẹ ka Ihwarawo ọ̀ za ayị anị katẹngụ, dị ọ yị zẹẹ ka aza anị ẹ̀ na.

²²Ọ kà dị ọ kà a yị Ihwarawo ka ọnị Ẹnẹyịmavara kà Anisirẹrị vị ozi ọzọkụ anị.

²³Kà ọnị ka ọ̀ navọ ozi anị ọ̀ na dị ọ̀ na hẹkẹ ọnị. Ọ kà a ka ọ̀ yị zẹẹ ka ẹ̀ na, ọ̀ yẹ ka vị ọnị vaa wụ̀ ozi ọzọkụ Ihwarawo nị.

²⁴Ọ màa na ózee di e tù ịzị eē chi, dị Ẹnẹyịmavara va gẹrị ọ, dị ọ ka ọnị aa wụ̀ ọ nị.

²⁵Di Izipora va sị ịrẹta apaana, dị ọ sị jị ozi anị ụvẹvẹnẹ nị. Dị ọ sị ụpa ọnọọ kanyị ẹngụ ọnọrụ Imosiisi dị ọ ka, “Ẹwụ ọva amị, ọnị mị sị dọ vavẹ.”

²⁶Dị Ẹnẹyịmavara ve kwooze yọ nị. Agụvị avọọ ọ kụkụ kà ịrẹyị ọnọọ ka: dị ọ ka, “Ẹwụ ọva amị ana a sị ụvẹvẹnẹ vara ịrẹsụ.”

²⁷Dị Ẹnẹyịmavara hị́ Eerọnị dị ọ ka: Ọ na oze ịnị ụnọmị dị ọ na gẹrị Imosiisi. Ịzẹyịza dị aa na, dị ọ na gẹrị ọ, dị ọ hara Imosiisi kú ayị nị.

²⁸Di Imosiisi kà a yị Eerọnị avaba ụtụ ẹnị Ẹnẹyịmavara tụ́ ọ nị. Dị ọ rẹ kà a yọ avaba ịvọpa ẹnị Ẹnẹyịmavara kà a ka ọ̀ mẹ nị.

²⁹Di Imosiisi ọnịrị Eerọnị na, dị ẹ na kụ́ avaba azọkụ Anisirẹrị gụ nị.

³⁰Di Eerọnị kà avaba ịrẹyị ẹnị Ẹnẹyịmavara kà yi Imosiisi nị dị ọ rẹ mẹ̀ ụkọrọ ịvọpa ẹnẹẹ éyi ẹnịnị nị.

³¹Aza ẹnẹẹ ệ dọ ka ịrẹyị ẹnịnị vị ịzẹyịza. Ịjị ẹ wụ́ ọ ka Ẹnẹyịmavara o reè re ụya ọnị ẹnịnị aa rị, dị ịrẹyị ene tu Anisirẹrị zị ọ ẹngụ nị. Dị ẹ tana tụra ẹtẹ, dị ẹ hẹkẹ ẹ nị.