Read ebira Ọyịkụra 40 Bible Online

Ọyịkụra 40 - ebira bible

Ọyịkụra 40

¹Ẹnẹyịmavara ộ kà a yi Imosiisi dị ọ ka

²ọ̀ kụ́ ajẹngụ ọnọọ jẹẹ ịnị ẹkụhị ịpaapa ịnị ụhwẹ ịpaapa nị.

³Ọ kà ọ̀ sị apoti oto dị ọ sị ịta anị jị ọ.

⁴Ọ kà ọ rẹ si itevuru ọnọọ tụ́ ịnị ajẹngụ dị ọ̀ kụ́ avaba ẹnya anị tụ́ ọ. Dị ọ̀ rẹ sị ịzị aa sị ozotupaa tụ́ vẹ dị ọ̀ kụ́ ozotupa hi ọ.

⁵Ọ kà ọ̀ rẹ sị ụta ana a sị igooru kú ịzị a yaà rị eturare ịra dị ọ̀ sị tụ́ ọvịdị apoti oto, dị ọ̀ va sị ịta dị ọ̀ sị jị oze ana a zị naa ngụ ịnị ajẹngụ ọnọọ.

⁶Ọ kà ọ̀ rẹ sị ụta ịzị a yàa mẹ̀ ịsọvọ dị a rị ọ ịra dị ọ̀ sị tụ́ ọvịdị enoze ajẹngụ ọnọọ.

⁷Dị ọ̀ va sị ịchacha ana aā ká enyi tụ́ dị ọ̀ sị tụ́ ịnị akakana ajẹngụ ọnịrị ụta ọnọọ. Dị ọ̀ ká enyi tụ́ ịnị ịchacha ọnọọ.

⁸Ọ kà ọ̀ dà ohweje ajẹngụ ọnọọ kara a dị ọ̀ va sị ịta dị ọ̀ sị jị oze ana aā zị naa ngụ ini ohweje ọnọọ.

⁹Ẹnẹyịmavara kà Imosiisi ọ̀ sị angwẹ ana a sịị nyị ọzaa tụ́ ịnị ụkọrọ Ohomorihi di ò che e sẹ́ ajẹngụ ọnọọ ọnịrị avaba ịsị e hi ịnị anị. Ọ kà ọ̀ sị avaba ịsa ene hi ịnị ajẹngụ tịtẹ yị Ohomorihi. Dị ahịka Ohomorihi ọ kụkụ nyị nị.

¹⁰Ọ kà Imosiisi ọ̀ rẹ sị angwẹ ọnọọ di ò che e sẹ́ ụta ịzị a yàa mẹ̀ ịsọvọ dị à rị ọ ịra ọnịrị avaba ẹnya ụkọrọ ana yà ịnị ụta ọnọọ. Ọ kà ọ̀ jị ụta ọnọọ yị Ohomorihi dị ahịka Ohomorihi kẹnẹ ọ nyị nị.

¹¹Ọ kà ò re che angwẹ sẹ́ ịchacha ọnọọ ana aā ká enyi tụ́ dị à sị tịtẹ yị Ohomorihi.

¹²Dị Ẹnẹyịmavara rẹ ka Imosiisi ọ̀ rẹ kụ́ Eerọnị ọnịrị ezi anị vẹ enoze ajẹngụ ọnọọ dị ọ̀ hụ̄ wa enyi nị.

¹³Dị ọ̀ va sị awuru oni ohirẹsụ irehi Ohomorihi chẹrẹẹ mẹ̀ ụkọrọ di ò chire e yị Eerọnị. Dị ọ̀ va ká angwẹ kú ọ di Eerọnị ọ̀ vị ohirẹsụ irehi Ohomorihi. Dị ahịka ụkọrọ ọnọọ kẹnẹ ọ jị ẹngụ anịị yị nị.

¹⁴Ọ kà ọ̀ rẹ kụ́ ezi Eerọnị vẹ dị ọ̀ sị ọtịnịnẹ awuru chire wa.

¹⁵Dị ọ̀ rẹ ká angwẹ kú wa anka ọ mẹ̀ ká angwẹ kú ada ẹnịnị dị ẹ̀ rẹẹ mẹ̀ ụkọrọ yị Ohomorihi anka ohirẹsụ irehi Ohomorihi. Ẹnẹyịmavara kà àa vavọọ sị wa nyị, ịpa ẹnịnị ẹ kụkụ vaa vị ohirẹsụ irehi Ohomorihi pooro zịna-zịna nị.

¹⁶Ịzẹyịza di Imosiisi mẹ avaba ịsa ẹnẹẹ anka Ẹnẹyịmavara mẹ̀ kà a yọ nị.

¹⁷Imosiisi ộ kụ́ ajẹngụ ọnọọ jẹẹ ịnị ẹkụhị ịpaapa ịnị ụhwẹ ịpaapa ịnị ịrayị ọhụva ẹnị ẹ hụrẹ Ijipiti.

¹⁸Imosiisi màa kụ́ ajẹngụ ọnọọ jẹẹ, ộ mẹ̀ ịzị ọtụ nịnị vaa jẹẹ, dị ọ kụ́ uhweremi anị jẹẹ nị. Dị ọ va kụ́ ọchị anị, jị ọ, di o re hi ọtụ anị nị.

¹⁹Dị ọ va sị ịta ajẹngụ ọnọọ dị ọ và a kú ọ, dị ọ sị ịsa ana a ka è si kú ịta ajẹngụ ọnọọ di o si kú ọ nị. Ẹnẹyịmavara mẹ̀ kà a yọ gẹdẹ-gẹdẹ ọ mẹ̀ ẹ nị.

²⁰Imosiisi ộ sị ịrẹta ana a chẹrẹ ọda ẹẹwụ ọnọọ tụ́ dị ọ sị ọ tụ́ ịnị ịnẹ apoti oto nị. Dị ọ kụ́ okutẹ ana a bẹ dị ọ kà wa ngụ ịnị ịzị a mẹ aha ẹnịnị tụ́ ini apoti ọnọọ, dị ọ va sị òkú apoti ọnọọ di o si kú ọ nị.

²¹Dị ọ sị apoti ọnọọ va tụ́ ịnị ajẹngụ, dị ọ sị ịta dị ọ sị jị ọ nị. Avọọ Ẹnẹyịmavara mẹ̀ kà a ka ọ̀ mẹ̀ ẹ nị.

²²Di Imosiisi rẹ si itevuru dị ọ sị va tụ́ ịnị ajẹngụ ọnọọ nị. Ịpa ẹbẹẹba àa sị para ịta ana a sị jị oze hu ịnị ajẹngụ ọ sị itevuru ọnọọ tụ́ nị.

²³Dị ọ va sị Ịbụrẹẹdị ana a sị va yị Ohomorihi tụ́ ọ, dị ọ vavọọ sị tụ́ ọvịdị Ẹnẹyịmavara nị. Avọọ Ẹnẹyịmavara mẹ̀ kà a yọ nị.

²⁴Di Imosiisi rẹ sị ịzị aa sị ozotupaa tụ́ dị ọ sị tụ́ ịnị ajẹngụ ọnọọ nị. Dị ahịka oze eyi ụvẹtẹ ọ maanị yà ịnị ajẹngụ ọnọọ dị ọ và eyi kà itevuru ana yà ịzọọ nị.

²⁵Di o hu ozotupa ẹnẹẹ tụ́ ọvịdị Ẹnẹyịmavara anka ọ mẹ̀ kà a yọ nị.

²⁶Di Imosiisi sị ụta ana a sị igooru kú dị ọ sị tụ́ ịnị ajẹngụ ọnọọ nị. Dị ahịka ọvịdị ịta ana sị jị oze ọ sị tụ́,

²⁷dị aa rị eturare ịra ịnị anị anka Ẹnẹyịmavara mẹ̀ kà a yọ nị.

²⁸Dị ọ va sị ịta dị ọ sị jị oze ana aa zị naa ngụ ịnị ajẹngụ ọnọọ nị.

²⁹Dị ọ sị ụta ịzị a yàa mẹ̀ ịsọvọ dị a rị ọ ịra, dị ọ sị tụ́ ọgụrị oze ana aa zị naa ngụ ịnị ajẹngụ ọnọọ nị. Dị ọ mẹ̀ ịsọvọ ịzọọ dị ọ rị ọ ịra, dị ọ rẹ sị akụ mẹ̀ ịsọvọ ịzọọ nị. Avọọ Ẹnẹyịmavara mẹ̀ kà a yọ nị.

³⁰Di Imosiisi rẹ sị ịchacha ọnọọ dị ọ sị tụ́ ịnị akakana ajẹngụ ọnịrị ụta nị. Dị ọ ká enyi tụ́ ọ ka àa sịị nyịna ẹngụ nị.

³¹Di Imosiisi ọnịrị Eerọnị na vaka ezi Eerọnị aa sịị nyịna ụvọ ọnịrị ahụ ẹnịnị nị.

³²Ẹ̀ẹ yaa ngụ ịnị ajẹngụ ọnịrị ẹ̀ẹ maanị aa kà a pe ụta, dị ẹ nyịna ẹngụ ẹnịnị. Avọọ Ẹnẹyịmavara mẹ̀ kà a yị Imosiisi nị.

³³Di Imosiisi jị ohweje kara ajẹngụ ọnọọ ọnịrị ụta ana yà ịnị anị, dị ọ sị jị oze ana aa zị naa ngụ ini ohweje ọnọọ nị. Aanị Imosiisi mẹ mẹ avaba ụkọrọ ọnọọ ta nị.

³⁴Ịjọnọọ di eguhi chaka kú ajẹngụ ọnọọ dị ụbanyị Ẹnẹyịmavara dọ avaba ajẹngụ ọnọọ nị.

³⁵Imosiisi ọ yị kụkụ nyẹngụ ngụ ịnị ajẹngụ ọnọọ agụvị ka eguhi vị ana chaka kú ajẹngụ dị ụbanyị Ẹnẹyịmavara yà ịnị avaba ajẹngụ ọnọọ nị.

³⁶Ịnị avaba ụmẹ ana Anisirẹrị nịnị sị sị aa zị ụsẹ, eguhi ọ̀ọ maanị ta hụụ ịrẹsụ ajẹngụ, dị ẹ yaa na.

³⁷Ama eguhi ọ̀ yị ta hụụ ịrẹsụ ajẹngụ, ẹyị vaa na. Ộ dị ịhị eguhi ọ̀ọ ta hụụ ịrẹsụ ajẹngụ di e re ve nyima ụsẹ.

³⁸Ụmẹ ọọdụ di eguhi Ẹnẹyịmavara yà ịrẹsụ ajẹngụ ọnọọ. Ịrahụ dị a nyị ịra ana yà ini eguhi ọnọọ. Avọọ avaba Anisirẹrị nịnị mè re e pooro ẹ màa na nị.