Read ebira Ọyịkụra 5 Bible Online

Ọyịkụra 5 - ebira bible

Ọyịkụra 5

¹Ịjị ẹ vavọọ raà kà ịrẹyị zụ̀ azọkụ ẹnẹẹ dị Imosiisi ọnịrị Eerọnị zị ne tù Ihwarawo nị. Dị ẹ ka, “Ẹnẹyịmavara ana vị Ohomorihi ana Anisirẹrị aa hẹkẹ ka ẹnị ẹ̀ kà a yọ ka ọ̀ hụrẹ aza anị ụvọ ka â nyị eche anị ẹnị ẹ yaa naa rị ịnị ụnọmị.”

²Di Ihwarawo ka, “Ẹ̀nị aā hị́ Ẹnẹyịmavara nịnị kẹ? Ẹ̀nị ọnọọ vị ana aa kà ịrẹyị ana vọrọ ka ọnị ò batọ anị, ọnị ọnị vaa hụ agụvị anịị hụrẹ Anisirẹrị nịnị ụvọ? Ọ kà ọnị ọ yị yẹ ka â vavọọ nyị Ẹnẹyịmavara. Dị ọ ka dị asị a kụ́ ịrẹka gọdọ, ọnị ọ yị vaa zẹẹ ka Anisirẹrị ẹ̀ na.”

³Di Imosiisi ọnịrị Eerọnị ka, “Ohomorihi ana Anihiburu aa hẹkẹ ọ raà sị ẹngụ anị zụ̀ ẹnị. Aarịhịnị ọ̀ navọ ẹnị ẹ̀ zị ụsẹ ẹkụhị ẹẹta nọ ịnị ụnọmị dị ẹnị ẹ̀ na mẹ̀ ịsọvọ yị Ẹnẹyịmavara Ohomorihi. Ẹ ka àa yị vị avọọ ọ nyayịnẹ sị ụkụ à vị ịrẹkụ wụ̀ ẹnị va ha.”

⁴Ama ohinọyị Ijipiti o ne tụ́ ohi ọ ka, “Ẹwụ Imosiisi ne beri Eerọnị, sị ẹ vẹ dị wẹ̀ yị zẹẹ ka aza ẹnẹnị ẹ̀ẹ mẹ̀ ụkọrọ ẹnịnị? Ọ kà ẹ́ẹ́ sị varẹma nọ ịnị ụkọrọ ẹnịnị?”

⁵Dị ọ rẹ ka ẹnịnị ẹ sị rụrụ huna Anijipiti. Ọ kà sị ẹ vẹ dị ẹ yaa dọ wa oro ka asị ẹ mẹ̀ ụkọrọ ẹnịnị?

⁶Ịhị ọnọọ gẹdẹ-gẹdẹ di Ihwarawo hị́ Anijipiti ana aā kụ́ ọrịhịị mẹ̀ ụkọrọ ọnịrị Anisirẹrị ana a nyị ka ẹ̀ẹ kụ́ azaa nọ ịnị ụkọrọ dị ọ kà a yị wa, dị ọ ka:

⁷“Asị ẹ kụkụ kụ́ avị na yị aza ẹnẹẹ ka ẹ̀ sịị jị ụvụrọkụ. Ọ kà ọza-ọza ọnị ụvọta ò kuku nee sì avị anị.

⁸Ama asị ẹ zẹẹ ka ọpa ịrịka ụvụrọkụ ẹnị ẹẹ̄ vịdịị jị ọ̀ jị ha. Ọ kà onuworo ẹ vị nị. Ka uworo ọ mẹ ka ee nowu ka à navọ dị ẹnị ẹ̀ na mẹ̀ ịsọvọ yị Ohomorihi ẹnịnị nị.

⁹Ọ kà ẹ̀ dà tụ́ ịnị ụkọrọ ẹnịnị yị wa vị ẹ̀ẹ mẹ̀ ụkọrọ pooro kẹnẹ. Ọ rẹ ka asị ẹ wụ́ ịrẹka ireche ẹnị ẹ yaa kụ́.”

¹⁰Di Anijipiti ana aā kụ́ ọrịhịị mẹ̀ ụkọrọ ẹnịrị Anisirẹrị ana a nyị ka ẹ̀ẹ kụ́ azaa nọ ịnị ụkọrọ jịnẹ hụ ụ ịda Ihwarawo nị. Dị ẹ na kà a yị Anisirẹrị nịnị dị ẹ ka, “Ihwarawo ka asị ẹ kụkụ sị avị yị wa.

¹¹Ọ kà a ka è ne sì avị hụrẹ ịzị èe zụ re kẹnẹ. Ama ọpa ụkọrọ ọnị ẹ vịdị aa mẹ ọ yị nyayịnẹ jị ha vụrụ-vụrụ.”

¹²Ịzẹyịza dị aza ẹnẹẹ aa ngụ avaba Ijipitii zị ka ịzị ẹnị èe re avị dị ẹnị ẹ̀ kụ́ ọ na jị ụvụrọkụ nị.

¹³Di Anijipiti ana aā kụ́ ọrịhị mẹ̀ ụkọrọ aa ha wa eyi nị. Ẹ ka, “Ụkọrọ ẹnịnị ẹkụhị-ẹkụhị ọ yị nyayịnẹ jị ha. Ọpa ẹnị ẹ mẹ ịnị ụmẹ ana a sịị̄ kụ́ avịị vaa yị wa ẹ vaa yịị mẹ nị.

¹⁴Di Anijipiti ana aā kụ́ ọrịhịị mẹ̀ ụkọrọ aa sị ịjapaa tụ́ Anisirẹrị ana a nyị ka ẹ̀ẹ kụ́ aza nọ ịnị ụkọrọ nị. Dị ẹ yaa hị́ Sị ẹ vẹ dị ẹ̀ yị jị ọpa ụvụrọkụ ana a dà yị wa ẹẹrị ọnịrị ajịnị anka ẹ mẹ̀ vịdịị jị?”

¹⁵Di Anisirẹrị ana a nyị ka ẹ̀ẹ kụ́ azaa nọ ịnị ụkọrọ va na kà a yị Ihwarawo dị ẹ ka, “Taarụ sị ẹ vẹ dị ọ maanị aa mẹ ẹnị aanị?

¹⁶Ẹ ka ọza ọ yị kụkụ sị avị va yị ẹnị ama a ka ẹnị ẹ̀ yịị jị ọpa ụvụrọkụ ẹnị ẹnịị̄ vịdịị jị. Dị ẹ ka Ihwarawo ẹ kụ́ ịrẹyị hị́ ẹtẹ nị, ama ẹnị ee tụ́ ịjapa nị.”

¹⁷Di Ihwarawo ka: Onuworo b ẹ vị nị. Ọ kà uworo aa mẹ ka ẹ̀ kà a ka à navọ ẹnịnị dị ẹnị ẹ̀ na mẹ̀ ịsọvọ yị Ẹnẹyịmavara nị.

¹⁸Dị ọ ka ẹ̀ wụsẹ wa nọ ịnị ụkọrọ ẹnịnị. Ọ rẹ ka ọza ọ yị kụkụ sị avị va yị wa, ama ọpa ụvụrọkụ ẹnị ẹ vịdịị jị, ọ yị nyayịnẹ jị ha.

¹⁹Ịjị a maanị sị ọ kà yị Anisirẹrị ana a nyị ka ẹ̀ẹ kụ́ azaa nọ ịnị ụkọrọ ka ọpa ụvụrọkụ ẹnị ẹ vịdị aa jị ẹkụhị-ẹkụhị ọ yị nyayịnẹ jị ha, ệ yẹ ka ẹnị ẹ sị dà.

²⁰Ẹ mẹ̀ hụụ ịda Ihwarawo, dị e re ka Imosiisi ọnịrị Eerọnị jẹẹ ee zi ẹnị nị.

²¹Dị ẹnị ana aā kụ́ azaa nọ ịnị ụkọrọ aanị ka: Ẹnẹyịmavara ee re Imosiisi nịnị. Ẹ ka ọnị ọ vaa sịị họ̀ wa nị. Ẹ ka ẹ raà mẹ ka ẹnị ẹ̀ kụkụụ nyị Ihwarawo ọnịrị aza anị ịhyẹrẹ. Ẹ ka ẹ raà sị ụhwọ chire wa ụvọ ka ẹ̀ sịị wụ ẹnị.

²²Di Imosiisi ve ne tù Ẹnẹyịmavara dị ọ ka, “O! Ẹnẹyịmavara, sị ẹ vẹ dị ụ maanị kụ́ ịrẹyị ve tù aza ẹnẹnị aanị? Sị ẹ daka vẹ dị ụ tụ́ ọnị vẹ ịzẹnị?

²³Ọ kà ọnị mẹ̀ hụrẹ nọ ịda Ihwarawo na kà ịrẹyị ọnị ọ ka ọnị ọ̀ kà yọ, ọ vana hụrẹ aa sị eyi aza ẹnẹnịị re ịrẹyị nị. Ọ kà ọ yị va ka ka ọnị aa dọ waa tụ́ vụrụ-vụrụ.”