Read ebira Ijoovu 32 Bible Online

Ijoovu 32 - ebira bible

Ijoovu 32

¹Ọta Ijoovu ẹyịta e yi vene tụ́ o ohi hu avọọ, agụvị ka Ijoovu vị ana yị sị ahụ kà aba ka ọnị ẹ yị rị ịvị.

²Dị ayị raà kụ Erihu ozi Ịbarakẹrị, ana vị Anibuuzi nị. Anovwoovu Ịramị ọ̀ vị nị. Ayị ộ kụ ọ agụvị ka ẹ yị jị ịhị yị Ohomorihi, ama ộ jị ịhị yị ẹngụ anị.

³Ayị ộ rẹ kụ́ ọ tụ ọta Ijoovu ẹyịta agụvị ka ẹnịnị ẹ yị yẹ ohi sị yị Ijoovu, ama ẹnịnị ệ vịdị kà a yị Ijoovu ộ mẹ̀ divi.

⁴Erihu ọ vị ozweyi ini ẹnị ene hi ịzọọ nị, agụvị avọọ, dị ọ jẹẹ ka ọzọza kà ịrẹyị da, dị ọnị ọ̀ va kà ịrẹyị yị Ijoovu nị.

⁵Ama ịjị Erihu re ka aza ẹnị ẹyịta ẹnẹnị ẹ yị nyị ohi sị yị Ijoovu, dị ayị sị kụ ọ nị.

⁶Erihu ozi Ịbarakẹrị, ana vị Anibuuzi ô tụ́ ohi ka, Ozweyi mị vị, dị ẹwụ nịnị vị ọzọkụ nị; ọnị ọ vị angwa ene hí mị, dị mẹ̀ yị kà a ịsị mi ro ịnị ịrẹyị ọnọnị nị.

⁷Ẹmị vị ana ka wa kà ịrẹyị nịnị, ẹwụ nịnị ọzọkụ ẹ sị ịrẹyọyẹ awụ nịnị zụ.

⁸Ama a nyị ụhwẹ ịnị ẹngụ aza, ụhwẹ Ohomorihi Ochẹtẹẹngụ ana mẹ̀ ka ọza ọ nyị ịrẹyọyẹ yọ nị.

⁹Ẹ yị vị ọza mẹ̀ sị vịra ọ sịị yẹ ịrẹyị. Ẹ yị unobo ọọ̄ sị ọzaa yẹ ịsa ana vọrọ.

¹⁰Agụvị avọọ, batọ ịrẹyị amị nịnị; jẹẹ ma kà a ịsị mi ro ịnị ịrẹyị ọnọnị nịnị.

¹¹“Maa raà sị avaba ụmẹ ọnọnị jẹẹ, dị mị nyayịnẹ sị ụto pe ahankata awụ nịnị, dị maa wụ́ u mee sì ịrẹyị ọnị ụ waa kà nịnị.”

¹²Mê batọ ịrẹyị awụ nịnị ẹtẹẹtẹrẹ, ama ẹ yị nyị ọza ana zụ kụ́ Ijoovu hi ireche; ẹ yị nyị ọza ịnị awụ nịnị ene ve zụ tụ́ Ijoovu ohi ịrẹyị anị.

¹³Agụvị avọọ, a sị ụ kà a ka waa yẹ ịrẹyị nịnị. Ọza ẹ̀ẹ yị zụ tụ́ Ijoovu ohi, jẹẹ vị Ohomorihi ò tu o ohi nịnị.

¹⁴Ẹwụ nịnị Ijoovu aa kà ịrẹyịị yị nị, ẹ yị vị ẹmị. Me yi vee tụ́ ọ ẹngụ ohi ọnị ụ tụ́ ọ nịnị avọọ.

¹⁵Ijoovu, ịrẹyị ọ sị wụ za wa irenu ọ, ẹnịnị ẹ yị kụkụ re ịrẹyị kà o.

¹⁶Vị̀ ẹmị waa rẹ vaa maanị jẹẹ zi, agụvị ka ẹnịnị ẹ yị kụkụ zụ kà ịrẹyị nị? Agụvị ka ẹnịnị jẹẹ e yi kuku re ịrẹyị kà a?

¹⁷Eyiye de, emi ree tụ́ ohi aamị; ẹmị rẹ vaa kà a ịsị mi ro tụ ịnị ịrẹyị ọnọnị.

¹⁸Agụvị ka ịrẹyị vị ene hí mi ịnẹ booro aanị, mẹ yị zụ za a ka mẹ yị kà a.

¹⁹Mè yi re oze kà ịrẹyị, m maa garaa ha anka okoko ana a sị eche ọwọọwa tụ avọọ nị.

²⁰Â nyị ka ma kà ịrẹyị ụvị ẹngụ amị ọ̀ rọ̀. Maa ha irenu amị, di me tụ́ ohi.

²¹Mẹ yị vaa me eyida ịnị ịrẹyị ọnọnị; mẹ yị vaa mẹ apẹẹ gono ọzọnyị-ọzọnyị.

²²Agụvị ka mẹ ma yara mẹ apẹ gono ọza, di Ohomorihi ọ̀ va sị ụya rị mị eyiha-eyiha.