Read ebira Ijoovu 41 Bible Online

Ijoovu 41 - ebira bible

Ijoovu 41

¹Ẹnẹyịmavara kà, Ijoovu ọ́ọ́ nyẹngụ sị arị za agụgụ, a vị dị ọ sụ́ ịrarẹ anị za obo?

²Ọ́ọ́ nyẹngụ tụ́ agụgụ obo ịnị aahị, a vi dị ọ jị arị chire abamị anị?

³Vị́ agụgụ ọnọọ wáá va dà ịpẹẹ yọ ka ọ hụrẹ ọnị ụvọ? Ọ́ọ́ zụ sị ayọnẹtẹ ka a wụ ka wa hụrẹ ọnị ụvọ?

⁴Ọ́ọ́ vaa dọ ọ beri ọ, dị ọ kà a ka ozi ahụ awụ ọnị vaa vị pooro nị?

⁵Ijoovu wéé vee beri ọ mẹ̀ aahẹ anka inomi, nị? Ọ́ọ́ zụ hụrẹ ẹ ụvọ ka ezi ahụ anị anẹẹ ẹ̀ sịị mẹ aahẹ.

⁶Osohu ivovo nini waa vaa sẹ̀ ẹ irihi? Vị́ ẹnịnị waa vaa vọ uye anị yị osohu nịnị ka ẹ̀ na a nị?

⁷Ọ kà, Ijoovu ọ̀ọ nyẹngụ si ọha ana sịị za ivovo nọ agụgụ ịtụmpaha? Ọ́ọ́ zụ ka a ngụ ọ ịrẹsụ?

⁸Ọ kà, ọ sị ụvọ kanyị agụgụ di o re. Ịsị o re, ọ mā vana nyayịnẹ mọ ọ rẹ.

⁹Ọza tụra ọza ene e re agụgụ vị ana ayị anị aa sẹ̀ẹ hi ịnẹ, dị ọ hyẹdụ nya ẹtẹ ọvịdị anị.

¹⁰Á yị nyị ọza ọnị ayị anị vị, dị ọ na tụ́ ọ ẹngụrẹyị. Ẹnẹ ọ vị, ana nyẹngụ jẹẹ zi ọ?

¹¹Ẹnẹyịmavara kà, ẹnẹ ẹ sị ịsa yị ọnị, ana zụ kà a ka ọnị ọ sị ụta varẹma? Ẹ́ yi nyị ọza ana hụ avọọ ịnị ọ sị ụta varẹma?

¹²Ẹnẹyịmavara kà ọnị e ji uwe ahụ agụgụụ zụ Ijoovu. Ọnị aa kà a yọ ịzị agụgụ nyị ụkata na za

¹³Ẹnẹ zụ nọọ itumpaha? Ẹnẹ zụ jị ịsa ngụ ọ ẹnya ịrẹkụ ọnị ọ ku hi ẹngụ?

¹⁴Ẹnẹ nyẹngụ haa irenu? Anyị ene hi ịnị irenu anịị venee chire ọza angwa.

¹⁵Ikerebe ana a tara za a ịrẹma ọ̀ katẹngụ anka ịrẹta.

¹⁶Avaba ẹnịnị vị ana nyayịnẹ vaka ẹngụ pari-pari, ana ahịka ahị ẹ yị hyakụ nyẹngụ ngụ wa ịnẹ.

¹⁷Uguha anị ẹnẹẹ vị ana nyayịnẹ vaka a ẹngụ ẹtẹẹtẹrẹ. Ẹ yị nyị ịsị ọza zịị sị hụ̀ wa hụrẹ ẹ ẹngụ.

¹⁸Agụgụ ọ̀ọ mẹ̀ ẹchẹhị ho, dị ẹtẹ jị ịra, di eyi anị aà za ẹtẹ anka oyi anaa hụrẹ avọọ.

¹⁹Ịra vị anaā aa za ịnị irenu anị, dị uruvu aa da jịnẹ hụụnị irenu anị nị.

²⁰Avọọ areyi maa jịnẹ hụụnị aahị anị anka areyi avị ana rịra iruvo ụnọkọ avọọ nị.

²¹Ụhwe ana a tụ́ vị anaā mẹ ka ịra ọọ za, dị ịra aa dàa hụụnị irenu anị nị.

²²Ộ nyị ụkata tụ ịnị ọrọkọ ẹtẹẹtẹrẹ. Ọza enee re e vị ọnị ivovo aa za.

²³Avaba uye ịnị ẹngụ anị vị ana katẹngụ anka enyusẹ avọọ.

²⁴Ayị anị ọ katẹngụ anka ịrẹta, aa kokoroko anka ịrẹta ọkwayị.

²⁵Ọ̀ọ kwẹẹtẹ jẹẹ, ọza ana nyị ụkata hụ vene e hí angwa, di e zwe.

²⁶A yi nyị ụhwọ ana zụ tọ ọ ụnava. Ọpa ọnịrị ọha ẹ yị́ zụ ngụ ọ ẹngụ.

²⁷Enyusẹ vị ana sị mẹẹ anka ẹpọmọ avọọ yọ. Vị ọ sị mẹẹ anka ọkụ ana vụ avọọ yọ nị.

²⁸Ọpa ẹ yị zụ dụ ọ echi. Ọnanta vị ana sị mẹẹ anka avị ẹpọmọ ana wụ avọọ yọ.

²⁹Okutẹ vị ọnị o re anka azịzẹ avọọ. Òo re ọha, dị ọ nyi unyi kẹnẹ.

³⁰Uguha ịnị ịrẹka anị sị mẹ anka urura ụnọkọ ana rẹ́ avọọ nị. Vị́ ẹẹ yẹrẹ ẹtẹ anka ẹdụ avọọ nị.

³¹Vị oo ziizi òkū anka enyi o rere a ha ịnị ụnọkọ avọọ

³²Àa họ̀ enyi dị oziizi ana saasa a aa zẹtẹ, dị òkū ee ku ahụhụ ọvwọọvụ sẹnẹ-sẹnẹ nị.

³³Ẹ yi nyị ịsa ọnị ọza nyẹngụ sị juwe anị ịnị ẹhẹ.

³⁴Ẹ yi nyị ịsa ọnị oō hí angwa anị vụrụ-vụrụ. Ẹ yị nyị uye anaā mẹ eyi hu ọ.