Read ebira Ahẹ Ụgama 101 Bible Online

Ahẹ Ụgama 101 - ebira bible

Ahẹ Ụgama 101

¹Ẹnẹyịmavara mị vaa jị ahẹ gono wu ka ụụ̄ sì ịrẹyị ọza dị ụ rẹẹ̄ mẹ ịzẹyịza nị.

²Mị vaa sị ụvọọ za ẹngụ amị, di me re ka mẹ yị mẹ̀ ebira ana a vaa sị tụ́ mị ohuvọ. Ịhị waa naa vẹ ịda amị? Mẹ yị vaa zẹẹ ka ma mẹ̀ ebira ana a vaa sị tụ́ mị ohuvọ ini eehi amị.

³Mẹ yị vaa dọ ka ma rẹ mẹ̀ ịsa odivi. Ebira ọnị enevene nịnị aa mẹ vị ana aa nyị mị ịhyẹrẹ, mẹ yị vaa zẹẹ ka ẹngụ ebira ẹnẹẹ ẹ̀ dà gẹ mị.

⁴Mẹ yị vaa zẹẹ ka aza ana aā mẹ irikichi ẹ̀ gụrị ẹmị, nyị ịsị ẹ vaa kụ́ ẹmịrị ebira odivii gẹ.

⁵Ọza ene ee weree kà ịrẹyị ịrẹma ọza vị ọnị maa sịị hụrẹ oze. Mẹ yị vaa dọ ka ọza ọ̀ọ mẹ eyi, di òo wuu zị.

⁶Aza ana àa mẹ ịzẹyịza ịnị ẹtẹ ọnọọ vị ọnị mị vaa jị ụvọọ yị. Ẹnị ẹnẹẹ ẹnẹ ẹ̀ yị mā mẹ̀ ebira akụvị ẹ vaa yà ịda amị dị ẹ yaa zị mị ụtụ nị.

⁷Ẹngụ ọza eneē vene ọza ẹ yị vaa ra ini eehi amị, mẹ yị rẹ vaa dọ ka onireche è hi ịda amị.

⁸Eyinị-eyinị mị vaa sị wụ̀ aza edivi ene hi ịnị ẹtẹ ọnọnịị vaa ha nị. Avaba aza anaā mẹ̀ ebira odivi vị ọnị mị vaa wụ̀ hụụnị ẹtẹ Ẹnẹyịmavara.