Read ebira Ahẹ Ụgama 110 Bible Online

Ahẹ Ụgama 110 - ebira bible

Ahẹ Ụgama 110

¹Ẹnẹyịmavara ộ kà a yị Ananyị mị ka yaayịtẹ éyi ụvọrị amị pooro dị ma sị ọnịvị awụ tụ́ ịzị ụ vaa kụ́ ahụụ hị́.

²Ẹnẹyịmavara vaa mẹ ka wa nyị ụkata. Ịzị ụ vaa rị ohinọyịị tụ́ vaa para Ịzayọnị hu. Ẹwa vaa rị ohinọyị tụra ọnịvị awụ ịrẹsụ nị.

³Ịhị ịrẹkụ òo si tù, isoja awụ vaa si ịnẹ ohinee kwẹẹtẹ nọ ịrẹkụ. Ẹnịnị vị ana vaa sị ụbanyịị mẹ awuruu chire. Anka eguhi mèe chiree kú ataba ẹnẹnẹ avọọ, avọọ ezwọọmụha awụ mẹ̀ vaa vẹ vee tù wu nị.

⁴Ẹnẹyịmavara ọ raà kà ịrẹyị, dị ọ hị́ eku tụ́ ọ nị, oyi kuku vee jesi ayị anị. Ọ kà Ẹwa vị ohirẹsụ irehi Ohomorihi pooro zịna-zịna anka Imerikizẹdẹkị nị.

⁵Ẹnẹyịmavara vị ana jẹẹ wụ ịrẹma. Ịhị àa mẹ ọyịkụ anị, o vee hu ohinọyị nịnị ẹtẹ.

⁶Ọ vaa mẹ̀ ọkarẹyị yị anẹhẹ, dị ọ wụ̀ aza và tụ́ ẹtẹ. Avaba ohinọyị anẹhẹ vi oni o vee hú ẹtẹ.

⁷Ohinọyị vee hú enyi ini okuha ana yà ụtọ oze, dị ọ sị nyị ụkata, di ee hú ọnịvị anị ẹtẹ.