Read ebira Ahẹ Ụgama 111 Bible Online

Ahẹ Ụgama 111 - ebira bible

Ahẹ Ụgama 111

¹Waa kụ́ Ẹnẹyịmavara. Avaba ayị amị mị vaa sịị sị ụbanyịị yị Ẹnẹyịmavara ịzị ọnịzẹyịza ẹ̀ẹ gụ hi nị.

²Ụkọrọ ẹbanyị-ẹbanyị Ẹnẹyịmavara mẹ nị. Aza ene sì ịrẹyị anị vị ene eē ro ịrẹyị ụkọrọ anị ẹnẹẹ.

³Avaba ịsa ọnị ọọ̄ mẹ vị ana aa mẹ ka àa sị ụbanyịị yọ ẹtẹẹtẹrẹ. Ẹ yị nyị ụmẹ ọnị a sii vene ọza pooro zịna-zịna.

⁴Ẹnẹyịmavara vị ana aā vayị ọza. Ộ mẹ ka aza ẹ̀ẹ tamayị ụkọrọ ẹbanyị-ẹbanyị ana aa mẹ.

⁵Aza ene hí angwa anị vị ọnị ọọ̄ sị ịsọyịrị yị. O mē hi ayị ịrẹyị ọnị ọ kà tịtẹ ka ọnị vaa mẹ.

⁶Ộ sị ẹtẹ aza ẹnẹsa dị ọ sị yị aza anị nị. Ọnọọ vị ọnị ọ sị sị zụ̀ wa ka ọnị ộ nyị ụkata.

⁷Ịzẹyịza ọọ̄ mẹ nị, ọ mā mẹ irikichi. Avaba ọda ọnị ọ mẹ ọ rụra sị ayị tụra.

⁸Ọda ọnị ọ mẹ ọ mā sā pooro zịna-zịna. Ịzẹyịza ọ sị mẹ ọda anị nị, ọ yị mẹ irikichi tụ́ ọ.

⁹Ộ dọ aza anị tụ́, ịrẹyị ọnị ọ ka ọnị vaa mẹ vị ana jị jẹẹ pooro zịna-zịna, nyị ẹngụ Ohomorihi, dị ọ rẹ nyị ụkata nị.

¹⁰Ọza ọ̀ọ nyị angwahi Ohomorihi, o si nyima aa yẹ ịrẹyị. Avaba aza ana a saasa ọda anị vi ana nyayịnẹ ẹ yẹ ịrẹyị Ohomorihi a vọrọ ka àa kụ́ avọ pooro zịna-zịna nị.