Read ebira Ahẹ Ụgama 116 Bible Online

Ahẹ Ụgama 116 - ebira bible

Ahẹ Ụgama 116

¹Mê sì ịrẹyị Ẹnẹyịmavara, agụvị ka m mè nowu ka ọ̀ vayị amị, ộ wụ́.

²Ka màa hị́ ọ ọọ̄ wụ́, ọnị mị va hị́ pooro ịnị ẹhẹ amị nị.

³Mâ nyị ẹngụkata ọnịrị ayodu ana ahịka ọ sị vọ chee me wusu. Mị ka ọ sị vọ hwẹ̀ à raà sị mị ne chire ẹtẹ.

⁴Di mi ve nowu na za Ẹnẹyịmavara, dị mị ka Ẹnẹyịmavara ọ̀ navọ ọ̀ dọ mị tụ́ nị.

⁵Ẹnẹyịmavara vị ana aā vayị ọza, dị ọọ̄ mẹ̀ ịsa ana vọrọ. Mị ka Ohomorihi ayịị̄ vayị ọza ẹnẹmẹhị.

⁶Ụnọ ẹnẹ ẹ̀ yị nyị omu, Ohomorihi ọọ̄ dụ o ịsị nị. Ịrẹyị odivi mè tù mị, ọnị ọ dọ mị tụ́ nị.

⁷Ma nyẹngụ hi ụhwẹ zẹtẹ booro aanị, agụvị ka Ẹnẹyịmavara ọ raà mẹ̀ ịsa ene zoza mị.

⁸Ẹnẹyịmavara, wẹ rẹ vaa zẹẹ ka me sú. We reè ji mi orere, wẹ yị va zẹẹ ka ma hyẹdụ.

⁹Ẹnẹyịmavara, ụ ka mà yà ịda awụ dị maa zị ụsẹ ịnị ẹhẹ beri aza ana yàra.

¹⁰Maa kà a ka mee vee sú, ama mị sị sị ayị tụra wụ nị,

¹¹nyị ọza ọnị mị kụkụ zụ sị ayị tụra, dị mị kụkụ ka avaba aza vi onireche nị.

¹²Avaba ịsa ozoza ẹnị Ẹnẹyịmavara maanị mẹ mị aanị, méé zụ sị ọ atọ?

¹³Mị vaa sị eche dị ma sị va mẹ̀ ịsọvọ kụ́ Ẹnẹyịmavara avọ agụvị ka ộ dọ mị há.

¹⁴Ịsị mị ka mị vaa sị va yị Ẹnẹyịmavara vị ọnị maa sị vaa yọ éyi avaba aza anị.

¹⁵Àa nyị ọza Ẹnẹyịmavara ene sú, ọọ̄ zị ọ ẹngụ ẹtẹẹtẹrẹ.

¹⁶Ẹnẹyịmavara, ozi ahụ mị vị nị, ẹ yị vị ka vị a nyị ịsị ẹmị yà ịnị anị nị. Ozi ọnẹẹ ana vị ozi ahụ awụ mị vị nị. Wa raà tụ̀ mị hụụnị ẹba ana a sị tụ́ mị.

¹⁷Ẹnẹyịmavara, mị vaa kụ́ wụ avọ, dị maa dá ịpẹẹ wụ.

¹⁸Ịsị mị ka mị vaa sị va yị Ẹnẹyịmavara vị ọnị maa sị vaa yọ éyi avaba aza amị.

¹⁹Ẹnẹyịmavara, ini ohweje awụ ana yà ịnị akakana Ijerusarẹmị mị vaa sị ọ vẹ nị. Waa kụ́ Ẹnẹyịmavara.