Read ebira Ahẹ Ụgama 132 Bible Online

Ahẹ Ụgama 132 - ebira bible

Ahẹ Ụgama 132

¹Ẹnẹyịmavara, navọ asị u hi ayị Idevidi ọnịrị avaba ẹngụkata ọnị ọ sị ẹngụ dọ.

²Ẹnẹyịmavara, tamayị ka Idevidi ô hị́ eku yị ẹwụ Ohomorihi Ochẹtẹẹngụ, ẹwụ Ohomorihi oni Ijekọvụụ̄ hẹkẹ.

³Idevidi ka oni ọ yị vaa ngụ eehi anị, ọnị ọ yị rẹ vaa hịrẹ ịbẹẹdị anị.

⁴Ọ kà ọnị ọ yị rẹ yaa sịị sụ ara

⁵pooro di oni ò tenyi aha ọnya yị Ẹnẹyịmavara, Ọnị ọ vị Ohomorihi Ochẹtẹẹngụ oni Ijekọvụụ̄ hẹkẹ nị.

⁶I mè hi Ehwirati, yâ wụ́ ịrẹyị Apoti ịrẹyị oni Ohomorihi kà tịtẹ, di i ve ne tù apoti ọnọọ Ijaari nị.

⁷Di i va ka à vẹ ya nọ ini eehi Ẹnẹyịmavara, dị ya na tana tụra ẹtẹ ịzị ọ yà, dị ya kụ́ ọ nị.

⁸Ẹnẹyịmavara, navọ wa kwẹẹtẹ dị wa vẹ ịzị ụụ̄ yà. Navọ ẹwụrị apoti ọnọọ ana jẹẹ yị ụkata awụ ọ̀ dudu vẹ.

⁹Navọ ahịka ebira ana vọrọ ohirẹsụ irehi awụ nịnị vaa mẹ pooro nị Dị aza awụ ẹ̀ẹ jị ahẹ ịrajẹ.

¹⁰Navọ wa hụ agụvị Idevidi ozi ahụ awụ asị u yi ohinọyị ọnị ụsị nyị tịtẹ.

¹¹Wâ vịdị raà hị́ eku yị Idevidi, wẹ yị kụkụ vaa vara a vụrụ-vụrụ. Wâ kà a yọ ka irima ezi anị ọ vaa vị ohinọyịị dọ ọ ịrẹsụ nị.

¹²Ọ kà ozi anị ọnọọ ọ̀ọ saasa ọda anị ọnịrị ịrẹyị ọnị ọnị sị zụ̀ ọ, dị ahịka obooro ẹnịnị ẹ kụkụ aa rị ohinọyị ọnọọ pooro zịna-zịna nị.

¹³Ẹnẹyịmavara ọ sị nyị, ọ ka ịzọọ ọnị vaa sị mẹ eehi anị nị.

¹⁴Ọ kà a ka ịzọọ ọnị vaa yà pooro nị. Ọ kà ịzọọ ọnị vaa yàa mẹ ohinọyị nị.

¹⁵Ọ rẹ ka ọnị vaa mẹ ka ò zee yọ ẹtẹẹtẹrẹ, dị ọnị mẹ ka onosiye ene hi ịzọọ è re ịsa rị dị ịnẹ ọ̀ há wa.

¹⁶Ẹnẹyịmavara rẹ ka ohirẹsụ irehi anị ene hi vị ọnị ọnị vaa mẹ ka ò zee yi ẹtẹẹtẹrẹ, dị aza anị ene hi ịzọọ aa jị ahẹ ịrajẹ.

¹⁷Ọ rẹ ka ọnị vaa si ozi Idevidi ọnya ịzọọ, dị ọnị vara ohinọyị ana nyị ụkata. Dị ọnị rẹ mẹ ka ohinọyị ọnọọ ọnị ọnị nyị avọọ, ọ̀ vị ohinọyị pooro zịna-zịna nị.

¹⁸Ọ kà ọnịvị ozi Idevidi ọnọọ vị ọnị ọnị vaa mẹ̀ ụhị nyị ẹtẹẹtẹrẹ, ama dị ọnị mẹ ka ohinọyị, ọnị ozi Idevidi ọnọọ aa mẹ ọ vị ohinọyị ize ọnịrị ụbanyị.