Read ebira Ahẹ Ụgama 147 Bible Online

Ahẹ Ụgama 147 - ebira bible

Ahẹ Ụgama 147

¹Waa kụ́ Ẹnẹyịmavara avọ nịnị. Ộ dà zoza kẹnẹ ka yaa jị ahẹ kụ́ Ohomorihi ayị avọ. Ô hine, ọ rẹ vọrọ ka yaa kụ́ ọ avọ.

²Ẹnẹyịmavara aa sị Ijerusarẹmị vaa vẹ udi anị. Avaba aza ana a va kụ́ ọrịhị vị ọnị ọ vaa kụ́ụ vaa vẹ.

³Aza ana ayị anị kú du vi oni o vee hunẹnẹ ayị, di o si isuuru yị wa.

⁴Ẹnẹyịmavara o kà a ka ọpa ụzọmị ana a vaa nyị yị nị. Ụzọmị ọzọza vị ọnị ọ yị ịrẹha.

⁵Ananyị yị ộ nyị ụbanyị, avọọ ọ mẹ̀ rẹ nyị ụkata nị. Ọza ọ yị nyẹngụ kà a ịzị ọ yẹ ịrẹyị ne tù.

⁶Aza ana kà ẹngụ ẹnịnị chi vi ẹnị Ẹnẹyịmavara gụ ụvọ, ama aza ana aa mẹ̀ ebira odivi vị ọnị ọ vaa gụụ hyẹdụ.

⁷Waa jị ahẹ kụ́ Ẹnẹyịmavara avọ. Sị àgidibò di wee hú ọ kụ́ ọ.

⁸Ẹnẹyịmavara ọ sị eguhi kú ẹbẹẹba nị, dị aa mẹ ka orihi ọ̀ọ zụ̀ụ hi ẹtẹ nị. Ọnị aa mẹ ka avị ee nyii hi ịnị ataba nị.

⁹Ọnị aa sị ịsaa yị ịsụpa nịnị nị. I Inomi ana aā hị́ ọrụ ẹ̀ẹ hị́ ọ, dị ọ rẹ sị ịsa yị wa.

¹⁰A yi vị umaata ana nyị ụkata ọnịrị isoja ana zụ kụ́ ịrẹkụ ọ vị ịsa ana ngụ ọ eyi.

¹¹Aza ẹnị Ẹnẹyịmavara sị̀ ịrẹyị anị ẹ vị́ aza ana nyị angwahi anị dị ẹ sị ayị tụra nị, agụvị ka ệ yẹ ka vi oō sì ịrẹyị ọza pooro nị.

¹²Ẹwụ nịnị Anijerusarẹmị, waa sị ụbanyịị yị Ẹnẹyịmavara. Anịzayọnị, waa kụ́ Ohomorihi awụ nịnị avọ.

¹³O raà mẹ ka ukere ene e si chire oze awụ nịnị ọ̀ katẹngụ. Dị ọ rẹ mẹ ka ò zee yị ẹwụ nịnị ana ra hi ịnị ịnẹ ẹkụra nị.

¹⁴Ọ yị zẹẹ ka aza ana kara wụ nịnị ẹ̀ kú ịrẹkụ re tù wu nịnị, di aa sị ịsọyịrị ana aā hị́ ihwiti ene zozaa wụ nịnị nị.

¹⁵Ộ mẹ ọda yị anẹhẹ, dị ẹ wụsẹ mẹ ịsị ọ kà nị.

¹⁶Ộ gara ata ihinẹba hi ẹtẹ, dị ẹ chaka kú avaba aha nị.

¹⁷Ọ màa zụ̀ ata ihinẹba ẹnẹẹ vị ọ sị mẹẹ ịrẹta avọọ nị. Ô hunẹnẹ pooro ẹ yị nyị ọza ana zụ jẹẹ ịnị anị.

¹⁸Ẹnẹyịmavara mẹ̀ kà ịrẹyị kẹnẹ, di ẹ nā nị. Dị ọ rẹ mẹ ka ahị ọ̀ tụ́, di enyi ee sì nị.

¹⁹Ộ sị ịrẹyị anị zụ̀ Ijekọvụ, mị ka avaba ọda anị vị ọnị ọ sị zụ̀ Isirẹrị.

²⁰Nyị anẹkụra ọsa ọnị ọ maanị mẹ yị; ẹnịnị ẹ yị yẹ ọda ọnị ọ mẹ Waa kụ́ Ẹnẹyịmavara avọ nịnị.