Read ebira Ahẹ Ụgama 25 Bible Online

Ahẹ Ụgama 25 - ebira bible

Ahẹ Ụgama 25

¹Ẹnẹyịmavara ana vị Ohomorihi amị, ẹwụ m mee zi eyi nọ.

²Ẹwụ kẹnẹ mị sị ayị tụra nị. Aarịhịnị, navọ asị ụ mẹ̀ ụhị nyị mị Asị ụ navọ ka ọnịvị amị ẹ̀ nyị ẹbẹẹba amị.

³Mâ yẹ ka aza ana àa sị ayị tụra wụ, ụhị ọ yị vaa nyị wa Ama aza ene re ọza kẹnẹ dị ẹ yaa chamayịị yọ vị ọnị ụhị vaa nyị.

⁴Ẹnẹyịmavara, navọ wa sị zụ̀ mị ẹngụ ebira oni wèe sì ka maa mẹ̀ dị ma yẹ.

⁵Navọ waa zụ̀ mi oze dị ma zụụ mẹ̀ ebira ana vị ịzẹyịza ini eyi awụ Wâ yẹ ka ẹwa vị Ohomorihi amị ana dọ mị ha nị Ẹwụ kẹnẹ mị sị ayị tụra pooro nị.

⁶Ẹnẹyịmavara, tamayị ka hụrẹ ụmọrụmọ vẹ vị ọnị ụụ̄ vayị ọza ẹtẹẹtẹrẹ; di u reē sì ịrẹyị ọza nị.

⁷Ẹnẹyịmavara, navọ wa sị ayị hụụnị ịvị irenyi-irenyi ọnị maa mẹ̀ m mẹ̀ hụrẹ vi ozweyi Navọ wa vayị amị agụvị ka mâ yẹ ka vi ụụ̄ sì ịrẹyị ọza nị Ịsa ozoza ụ rẹẹ̄ mẹẹ yị ọza nị.

⁸Ẹnẹyịmavara ọ mā mẹ apẹ vụrụ-vụrụ Ịsa ozoza ọ rẹẹ̄ mẹ nị Ọnị ọ mẹ ka ọ̀ zụụ kà a yị aza ana aa mẹ̀ ebira odivi ẹngụ ebira ozoza ana a vọrọ ka ẹ̀ẹ mẹ nị.

⁹Ẹnẹyịmavara vị ana aā sị oze zụ̀ aza ana ka ẹngụ ẹnịnị chi Dị aa sịị zụ̀ wa ẹngụ ebira ọnị ọ yẹ ka ộ vọrọ ka ẹ̀ vavọọ mẹẹ.

¹⁰Aza ana sị ụvọ za ọda Ẹnẹyịmavara vaa yẹ ka ộ nyị ịzẹyịza di o ree sì ịrẹyị ọza ịnị avaba ịsa ana aa mẹ nị.

¹¹Ẹnẹyịmavara, ebira odivi amị ộ banyị ịzẹyịza ama navọ wa hụ agụvị ụbanyị ẹngụ awụ wa vagu mị.

¹²Ọza ana àa si ụbanyị yị Ẹnẹyịmavara, dị Ẹnẹyịmavara ọnị raa sịị zụ̀ ọ oze ana vọrọ ka ọ̀ zị.

¹³Ẹngụ aza ẹnẹẹ e yi vee re osiye pooro Ohomorihi vaa sị ẹtẹ ọnị ọ kà yị ezi anị nị.

¹⁴Ẹngụ aza ana sị ụbanyị yị Ẹnẹyịmavara Ẹnẹyịmavara ọnị rẹ vaa sị ịnẹẹ zụ̀ nị Ọ vaa kà a zụ̀ wa ịsa ọnị ọ ka ọnị vaa mẹẹ yị wa.

¹⁵Ẹnẹyịmavara mi sị eyi kà pooro kẹnẹ nị mâ yẹ ka ọnị ọ rẹ ẹ̀ yị vaa zẹẹ ka ịrẹpa ọnịvị ọ̀ za mị nị.

¹⁶Ohomorihi navọ wa vẹ dị wa va gụ mị ụvọ agụvị ka ụvọ ọ sị vị ụvọ ẹmị ịnya dị ụya aa rị mị nị.

¹⁷Navọ wa sị mị hụụnị ariro, dị wa kụ́ avaba ẹngụkata amị kwooze.

¹⁸Navọ wa kana eyi ụya ọnị maa rị di we re ọ mẹmẹ kata mị ẹngụ Navọ wa sị ayị hụụnị avaba ebira odivi ọnị mị mẹ.

¹⁹Ohomorihi wéē re ka ọnịvị amị vị ana gụ dúù dị ẹnịnị nyayịnẹ aa kụ́ ayị amị nị.

²⁰Aarịhịnị navọ we sere mị, dị wa dọ mị tụ́ Ịdị awụ mi zwe va tẹ nị aarịhịnị asị ụ zẹẹ ka ụhị ọ̀ nyị mị.

²¹Navọ ịzẹyịza ọnịrị ebira ọyịza e vaa gụ mị agụvị ka ẹwụ mị sị ayị tụra nị.

²²Ohomorihi, aarịhịnị navọ wa dọ Anisirẹrị tụ́ hụụnị avaba akanya ẹnị ẹ nyị.