Read ebira Ahẹ Ụgama 28 Bible Online

Ahẹ Ụgama 28 - ebira bible

Ahẹ Ụgama 28

¹Ẹnẹyịmavara, ẹwa vị ịzị mịị tẹ dị ẹ yị nyị ịsị ẹ zụ kanyị mị nị Ẹwụ ọnọọ m maa hị́ nọ, navọ kwogwo wa ba mi owu Wâ yẹ ka wè yi tụ́ mi ohi, vị ẹhẹ amị ta avọọ nị.

²Ẹwụ m ma ta ubo nọ, ka wa navọ wa vayị amị Mâ kụ́ ụvọ hi ẹba, dị mị tana a hi oze eyi irehi awụ dị maa hị́ wụ ka wa va gụ mị ụvọ nị.

³Aarịhịnị navọ asị okuha ọnya kụ́ ẹmịrị aza ana aa mẹ̀ ebira odivi Aza edivi ẹnẹẹ vi anaā kụ́ hwere-hwere éyi ọza ama ịrẹyị odivi ọza ẹ sị tụ́ ịnị ịnẹ nị.

⁴Navọ we si aza edivi ẹnẹẹ ụta ebira odivi ẹnẹ ẹ yaa mẹ Navọ ọgụ ịsa odivi ẹnẹ ẹ yaa mẹ ò chí hi wa ịrẹsụ.

⁵Ẹnịnị ẹ yị yẹ ka Ẹnẹyịmavara aa zị, ệ si eyi oweyi re ịsa ana aa mẹ, avọọ Ẹnẹyịmavara ọ̀ navọ ò vú wa ẹtẹ dị asị ọ vana zẹẹ ka ẹ̀ zụ kwẹẹtẹ pàá.

⁶Mâ kụ́ Ẹnẹyịmavara avọ agụvị ka ọ va raà ba mi owu.

⁷Ẹnẹyịmavara aa sị ụkataa mị nị ọnị ọ rẹ ẹ̀ yị zẹẹ ka à nyị ịsị ẹ ka nyị mị nị Mâ sị ayị tụra a, ọ raà gụ mị ụvọ mị kụkụ aa jẹ, mee kú iriga mị vaa jị ahẹ kụ́ ọ avọ.

⁸Ẹnẹyịmavara aa sị ụkataa yị aza anị nị, ọnị ọ dọ ohinọyị ọnị ọ̀ sị rị tụ́, dị ọ̀ yị zẹẹ ka à nyị ịsị ẹ kanyị ọ nị.

⁹Ohomorihi, navọ wa dọ aza awụ tụ́ dị wa mẹ ka ò zee yị wa Weē sere wa, dị wa si eyi pè wa pooro.