Read ebira Ahẹ Ụgama 31 Bible Online

Ahẹ Ụgama 31 - ebira bible

Ahẹ Ụgama 31

¹Ẹnẹyịmavara, ẹwụ mị sị ayị tụra nọ, aarịhịnị asị ụ mẹ̀ ụhị nyị mị. Ẹwụ vị Ohomorihi anaā mẹ ịrẹyị ana vọrọ navọ wa dọ mị tụ́.

²Navọ wa wụ́ ịpọda amị, dị wa wụsẹ vẹ dị wa va ba mi owu, dị wa dọ mị tụ́ dị asị a nyị ịsị ẹ zụ va kanyị mị ịzọọ.

³Wâ yẹ ka ẹwụ ee sere mị dị wẹ̀ yị zẹẹ ka à nyị ịsị ẹ kanyị mị nị. Navọ wa hụ agụvị ụbanyị ẹngụ awụ, wa vayị amị dị waā zụ̀ mi oze.

⁴Asị ụ navọ ka ịrẹpa ana a và zi mi ọ̀ za mị, wâ yẹ ka ẹwụ mi zwe va vaka nị.

⁵Mâ sị ẹngụ amị ve chire wụ ụvọ, ẹwụ Ẹnẹyịmavara Ohomorihi mâ yẹ ka ịzẹyịza ụụ̄ mẹ nị.

⁶Ayị aza ana aā hẹkẹ ori vị ana aā kụ́ mị ẹwụ kẹnẹ ẹmị sị ayị tụra nị.

⁷Ayị amị vee hine ẹtẹẹtẹrẹ agụvị ka vi ụụ̄ sì ịrẹyị ọza pooro nị ma rẹ yẹ ka wee re ụya ọnị maa rị, wee re ayị amị mè dụ.

⁸Wẹ rẹ vaa navọ ka ụvọ ọnịvị ò kú mi, wâ zẹẹ ka maa zị hwana-hwana.

⁹Ẹnẹyịmavara, navọ wa vayị amị wéē re ẹngụkata ene tù mi. Mâ jị òrèrè pooro eyi amị o kú gu, ayodu aa vaa wụ̀ mị.

¹⁰Mị ka ụya ọnị maa rị ọnịrị orere ọnị maa jị eyinị-eyinị aa vaa wụ̀ mị Ịvị ọnị mị mẹ ọ yị zẹẹ ka ma kụkụ nyị ụkata Mâ ta mẹ sẹkẹ-sẹkẹ tịtẹ.

¹¹Avaba ọnịvị amị ọnịrị anokokooro amị bẹẹ vị ana aa kụ́ mi isiya Ọta mị vi ene kuku ee re mii zwe, aza èe re mi ịnị ẹkụra di e wuse zwe kana mị.

¹²Ayị amị ô hi avaba aza Mị kụkụ sị mẹẹ Anaka ọza ene wusu avọọ nị Mị ka mị kụkụ yà anka ịsa ana a ka è ne nē ta ini eyi ẹnịnị nị.

¹³Maa wụ́ aza ọrụrụ-ọrụrụ mèe cheechee kú mị dị ẹnịnị ee chire mi angwa eyi ụvọnị-ụvọnị ẹ yaa gẹ eyi amị ka ẹnị ẹ̀ dọ mị ụhwẹ.

¹⁴Ama Ẹnẹyịmavara, ẹwụ mị sị ayị tụra nọ Mị ka ẹwa vị Ohomorihi amị nị.

¹⁵Ẹwụ mị sị ẹngụ amị chire ụvọ pooro nị Navọ wa dọ mị tụ́ hụụnị ụvọ ọnịvị amị ọnịrị aza ana aa dụ mị.

¹⁶Nda, aarịhịnị navọ wa mẹ ka ò zee mị, dị wa dọ mị tụ́ Mâ yẹ ka vị ụụ̄ vayị ọza pooro nị.

¹⁷Ẹnẹyịmavara, ẹwụ mi nowu va za nọ, asị ụ navọ ka ụhị ọ̀ nyị mị Navọ ụhị ọ̀ va sị aza ana aa mẹ̀ ebira odivi nyị dị ẹnịnị è sú dị ayị ẹnịnị è hị́.

¹⁸Navọ wa za onireche ẹnẹẹ irenu kú oku Ẹnịnị vị ana aā mẹ eyi dị ẹ yaa sị eyii wụ̀ aza ana aa mẹ̀ ebira ana vọrọ ini eyi Ohomorihi Dị ẹnịnị aa kà ịrẹyị oni irenu ẹnịnị e yi tù.

¹⁹Wâ dà mẹ ka ò zee yi aza ana sị ụbanyị yị wụ kẹnẹ Aza ene èe zwe va tẹ ịda awụ, avọọ ụ mẹẹ̄ mẹ ka ò zee yi wa ini eyi avaba aza nị.

²⁰Ẹwụ ụvọta ọ sị wa tẹ dị wẹ̀ yị zẹẹ ka aza ene ee bè wa è re wa za nị Wâ sị wa tẹ ịda awụ, wẹ yị zẹẹ ka à nyị ịsị irenu ọnịvị zụ mẹ wa.

²¹Ẹnẹyịmavara maa kụ́ wụ avọ agụvị ka wê sì ịrẹyị amị ẹtẹẹtẹrẹ ọnịvị mẹ̀ kara mị dị ẹ yaa dụ mị.

²²Angwa ô hi mi ịjị ọnọọ, dị mị ka te, vị a sị mị dụ hụụ ịda awụ aanị nọ Ama m mẹ̀ vavọọ nowu va za wụ ka wa ba mi owu, dị ụ vayị amị nị.

²³Ẹwụ nịnị aza Ohomorihi, weē sì ịrẹyị Ẹnẹyịmavara nịnị Ọ yị vaa zẹẹ ka à nyị ịsị ẹ mẹ̀ ọnịzẹyịza ama aza ene ee woo zi vị ọnị ọ vaa sị ụyaa rị anka ọ mẹ̀ vọrọ.

²⁴Avaba ẹwụ nịnị ana sị ayị tụra Ẹnẹyịmavara, asị u hí angwa nịnị vụrụ-vụrụ.