Read ebira Ahẹ Ụgama 34 Bible Online

Ahẹ Ụgama 34 - ebira bible

Ahẹ Ụgama 34

¹Ẹnẹyịmavara vị ọnị mị vaa kụ́ avọọ pooro kẹnẹ Avọọ m mẹ̀ vaa kụ́ ọ pooro nị irenu amị ọ yị vaa tịtẹ.

²Ẹnẹyịmavara mị vaa sị mẹ ụbanyị nị Aza ana aza aa mẹ ehunaa yị ẹ̀ wụ dị ẹnị ẹ̀ rẹẹ jẹ ịrajẹ.

³Weē pè mii kà a nịnị ka Ẹnẹyịmavara ộ nyị ụbanyị ẹtẹẹtẹrẹ vẹ di ye duduu sị ụbanyịị yọ.

⁴Mâ ma dá ịpẹ yị́ Ẹnẹ yị mā vara ka ọ̀ gụ mị ụvọ ịzẹyịza dị ọ gụ mị ụvọ nị Dị ọ dọ mị tụ́ hụụnị ụvọ avaba ịsị e vịdị ee chire mị angwa nị.

⁵Aza ene ee zi Ohomorihi eyi vị ana vaa jẹ ẹ yị nyị ụmẹ ọnị ụhị vaa sị nyị wa.

⁶Â nyị ọnụyọrị ọnọọ o mè nowu na za Ẹnẹyịmavara, dị ọba a owu nị Dị Ẹnẹyịmavara vavọọ dọ ọ hụụnị avaba akanya anị nị.

⁷Anggẹẹrị Ẹnẹyịmavara vị ana maanị yà kara aza ana sị ayị tụra Ohomorihi dị ệ dọ ọ tụ́ ka asị a nyị ịsị ẹ mẹ̀ ẹ nị.

⁸Ẹwụ ụvọta ọ̀ va zama a re di we re ka Ẹnẹyịmavara ngụ ayị ọza ẹtẹẹtẹrẹ Ọza ene èe zwe na tẹ̀ ịda anị vaa dàa jẹ.

⁹Ẹwụ nịnị aza Ẹnẹyịmavara, waā sị ụbanyị yọ nịnị Ọza ana àa sị ụbanyị yị Ẹnẹyịmavara, ẹ yị nyị ịsị o sì ka o yi vee re e.

¹⁰Wáá yẹ ka ịjị ẹnyị ụngwẹ kụ̀ idu nịnị di e yi re ịsa rị? Ama aza ana ahịka ẹẹ̄ mẹ̀ ịsa ẹnẹ Ẹnẹyịmavara kà, ẹ yị nyị si e yee sì ẹnị è yi vee re.

¹¹Ẹwụ nịnị ezi emi vẹ dị wa wụ́ ịrẹyị amị nịnị! Mee sì ka ma sị kọ wụ nịnị ka waā sị ụbanyịị yị Ẹnẹyịmavara nịnị.

¹²Àa nyị ọza awụ nịnị ene sì ka ẹhẹ anị ò zoza dị ọnị ò kú orubo.

¹³Ẹngụ ọza ọnọọ ọ̀ na hụụnị ịrẹyị odivi ọyịkà, dị asị ọ rẹ cheeche.

¹⁴Asị ọ rẹ kụkụ mẹ̀ ebira odivi, ọ̀ naa mẹ̀ ebira ene zoza Ịsị ọ̀ọ zị zụ mẹ kẹnẹ dị ọnịrị aza ẹ̀ ra ịnị ẹngwọọrọ, ọ̀ naa mẹ̀ ẹ.

¹⁵Ẹnẹyịmavara vị ana sị eyi pè aza ana aa mẹ̀ ebira ana vọrọ ini eyi anị ẹnịnị ẹ̀ẹ nowu na za a, dị ọ ba wa owu.

¹⁶Ẹnẹyịmavara vị ana aa kụ́ ayịị hị́ aza ana aa mẹ̀ ebira odivi Ọ vaa wụ̀ wa, dị ọza ọ mā vana tamayị ẹnịnị pàá ịnị ẹhẹ.

¹⁷Ọza ana aa mẹ ịzẹyịza ô nowu na za Ẹnẹyịmavara, dị ọba a owu, dị ọ dọ ọ tụ́ hụụnị avaba akanya anị nị.

¹⁸Ẹnẹyịmavara ộ gụrị aza ana ayị ẹnịnị ee du ka ẹnị ệ mẹ̀ ịsa odivi Aza ana ayị anị vavọọ du vị ọnị ọọ̄ dọ ọ há.

¹⁹Aza ana aa mẹ̀ ebira ana vọrọ ini eyi Ohomorihi ẹ nyẹngụ nyị ẹngụkata irenyi-irenyi ama Ẹnẹyịmavara vị ana aa tụ̀ wa hụụnị avaba anị.

²⁰Ẹnẹyịmavara vi ana nyayịnẹ sere e, ọ yị hyakụ zẹẹ ka ẹchụkụ anị ikonya ò che.

²¹Ịsa odivi ọnị ọza odivi aa mẹ ọ vaa wụ̀ ọ nị Aza ana ka ẹnị vị ọnịvị aza ana aa mẹ̀ ịsa ana vọrọ vị oni Ohomorihi vaa jị ịvịị yị.

²²Ẹnẹyịmavara vaa dọ aza anịị tụ́ Avaba ọza ene zwe na vaka a ệ yẹ ka ẹnị ẹ sị há.