Read ebira Ahẹ Ụgama 38 Bible Online

Ahẹ Ụgama 38 - ebira bible

Ahẹ Ụgama 38

¹Ẹnẹyịmavara, navọ wa nyị isuuru, asị ụ sị ụya rị mị Navọ asị ụ zẹẹ ka ọyịkụ ọ̀ mẹ ka we tụ́ mi ipono.

²Wéē re ka u mè che mị ọpa, ọ na sị hụrẹ hi Vị ụ nyayịnẹ tana ụvọ za mị ẹtẹẹtẹrẹ nị.

³Ụ mẹ̀ kụ́ ayị hi mi, avaba ẹngụ vị ana kụkụ aa zị mị Ebira odivi ọnị mị mẹ vị ana mẹ ka avaba ẹngụ amị bemi ọ̀ọ zị mị.

⁴Ebira odivi amị vị ana ngụ mị tịtẹ anka ẹnya ọrata avọọ, mẹ yị zụ za a.

⁵Ụra ọnị maa mẹ̀, ọ raà mẹ ka ịtahụ amị ẹ̀ẹ vụ, dị ẹ̀ kụkụ a dà agụ nị.

⁶Ẹngụ amị ọ sị và hí, mee vee sú mi kuku ee sụ́ ùnèe zị pooro nị.

⁷Avaba ẹngụ amị ộ ta jịnẹ ịra yị ọvanggoro ẹ yị kụkụ vị ẹma nyị ẹngụ amị.

⁸Ộ ngụ mị ẹngụ ẹtẹẹtẹrẹ, mee vee sú Ayị amị o si du, mee nowu pooro, ẹngụ aa zị mị.

⁹Ananyị yị, wâ yẹ avaba ịsị mee sì ộ, waa wụ́ owu ọnị maa na.

¹⁰Ayị amị aa jị pèé-pèé, mẹ yị kụkụ nyị ụkata mẹ yị hyakụ kuku re ẹtẹ bẹẹ.

¹¹Ọta amị ọnịrị aza ẹnị ẹmịrịị vịdịị zị ògù vi ene kuku ee re mii zwe agụvị ịrẹyị ene tù mị. Anokokoro amị vị ana kụkụ kana hụrẹ mị ẹngụ huu.

¹²Aza ene ee sì ka ẹnị ẹ̀ mẹ mị ịsa odivi dị ẹnị ẹ̀ wụ̀ mị vi ene èe bè mi Ẹnịnị vị ana aa kà ịrẹyị odivi anị pooro kẹnẹ, di e yee cheeche.

¹³Mị kụkụ yà anka ogutọ ẹnẹ ẹ̀ zụ wụ́ ịrẹyị avọọ nị dị mị rẹ sị mẹẹ anka ogurenu ẹnẹ ẹ̀ zụ kà ịrẹyị nị

¹⁴Mị ka ma sị vara ọza ẹnẹ ẹ̀ yị mā wụ́ ịrẹyị, dị ọ̀ yị rẹ zụ kà ịrẹyị.

¹⁵Ẹnẹyịmavara, ẹwụ mị jẹẹ ee zi nọ Ohomorihi ana nyị mị, mâ yẹ ka u vee tụ́ mi ohi.

¹⁶Maa dá ịpẹ ka wa navọ kwogwo asị ụ zẹẹ ka ọnịvị amị è nyị mi unyi ịnị ẹngụkata amị asị ụ zẹẹ ka è re oze jẹ ka ma sị hyẹdụ.

¹⁷Maa vaa hyẹdụ ộ, ẹngụ amị vị ana aa yịị zị mị pooro.

¹⁸Mâ dọ irenu ịsa odivi ọnị mị mẹ ịvị amị ọ raà mẹ ka ayị amị ọ̀ vazi.

¹⁹Ọnịvị amị nịnị ệ rụrụ Ẹnịnị vị ana nyayịnẹ nyị ụkata Aza ana aa kụ́ ayị amị kẹnẹ-kẹnẹ ẹ sị rụrụ baaba.

²⁰Aza hi ịzọọ ana ahịka màa mẹ wa ọyịza, ịsa odivi e yee sii si mị atọ nị Màa dụ ka ò zoza yị wa, dị eni ee du mi ịrẹsụ.

²¹Ẹnẹyịmavara ana vi Ohomorihi amị navọ asị u hi ayị amị, asị u noze rịrị mị.

²²Ananyị yị ana aā dọ mịị ha, navọ we jintu vẹ wa va gụ mị ụvọ.