Read ebira Ahẹ Ụgama 45 Bible Online

Ahẹ Ụgama 45 - ebira bible

Ahẹ Ụgama 45

¹Ahẹ ozoza-ozoza hi ịnị ayị amị oni mee sì ka ma jị M màa jị ahẹ ẹnẹẹ gono ohinọyị, ọngwẹ amị ộ swa anka ịsa ana a sịị̄ chẹrẹ ịsa mẹ̀ swa ini iwe avọọ.

²Taarụ, ịnị avaba ọnọrụ, ẹ yị nyị ọza ẹnị ẹwụrịị aa mẹ ọpa ini uzoza Avọọ Ohomorihi mẹ̀ rẹ sị ụkata wụ ka wa yara kà ịrẹyị nị dị aa mẹ ka òo zee wụ pooro nị.

³Ohinọyị ana nyị ụkata, sị ụhwọ awụ hara kẹnẹ, ka ụbanyị ọ sị vị awụ da.

⁴Ẹwụrị ịzẹyịza beri ebira hẹẹ ọ̀ vavọọ ra. Ụ vaa nyị ụkata dị ụ nyị ẹbẹẹba ọnịvị awụ.

⁵Ọpa awụ ệ rẹ huye-huye Ọnị ụ ve sii che anẹkụra ana vị ọnịvị awụ dị ẹ hyẹdụ và hi ẹtẹ nị.

⁶Ohomorihi, ẹwa vị ohinọyị pooro zịna-zịna nị Ịzẹyịza ẹwụ vaa sị mẹ ohinọyị awụ nị.

⁷Ohinọyị wê sì ịrẹyị ịzẹyịza, ama we yi sì ebira odivi avọọ Ohomorihi awụ nyị wụ ka we huna avaba ọpa awụ ana vọ nị Dị ọ mẹ ka waa jẹ, dị ịnẹ awụ òo hine hu avaba ẹnịnị nị.

⁸Awuru awụ vị ana nyị agụ eturare ozoza-ozoza Irehi awụ vị ana kụ́ ike mẹ ọvị hi ịnị anị, di onisohu nini hi ịzọọ di e yee hú ịsa ana aa sị ịnẹ awụụ hine nị.

⁹Ezi ohinọyị nịnị ẹ vị ezi anẹẹ ene hi ini eehi awụ nị Ohinọyị, ose ewu vị ọnị ụ sị tụ́ udi ọbanyị ịzị ụ yà dị ọ hara igooru ọkụmị-ọkụmị hi ẹngụ.

¹⁰Ẹwụ ose ohinọyị, navọ wa sị ụtọ tụ́ ịnị ịrẹyị ọnị maa vaa kà Sị ayị hụrẹ ịda anda awụ nịnị ọnịrị aneehi ada awụ.

¹¹Ohinọyị vee sì ịrẹyị awụ agụvị ka wê zoza, Waā sị ụbanyịị yọ agụvị ka ọnị ọ̀ vị adarehi awụ nị.

¹²Anẹkụra Ịtaya vaa kụ́ ịsa vaa mẹ wụ ẹyịza opisa nịnị vaa kụ́ ịsa vaa mẹ wụ ẹyịza ka ịsavọọ we re ẹnị kẹnẹ.

¹³Ozi ọnẹẹ ohinọyị yà ini eehi amị Ộ nyị ụbanyị, dị ahịka vị ọ kụ́ igooru dà achẹrẹ hi ini awuru anị nị.

¹⁴Awuru oni o chire, ana a sị sị ọ aa nọ ịda ohinọyị vị ana a mẹ̀ ụkọrọ hi ẹtẹẹtẹrẹ Ọ mẹ̀ vavọọ aa na, â nyị ezwoorihi ana saasa a dị a rẹ kụ́ ẹnị nọ ịda ohinọyị nị.

¹⁵Á mẹ̀ kụ́ wa aa na, ịnẹ ẹnịnị vị ene ee hine, dị ẹ yaa jẹ Dị a kụ́ wa na ngụ ini eehi ohinọyị nị.

¹⁶Ohinọyị, ezi vị ọnị ụ vaa maa hi ẹtẹ ana vaa rị ohinọyịị dọ wụ ịrẹsụ Ẹnịnị vị ana vaa vị ohinọyịị tụ́ avaba ẹhẹ.

¹⁷Mẹ yị vaa zẹẹ ka ịrẹha awụ ò hi ayị pooro Avaba aza vị ana vaa sị ụbanyịị wụ pooro zịna-zịna.