Read ebira Ahẹ Ụgama 59 Bible Online

Ahẹ Ụgama 59 - ebira bible

Ahẹ Ụgama 59

¹Ohomorihi, navọ wa dọ mị tụ́ hụụnị ụvọ ọnịvị amị Aza ana kwẹẹtẹ tù mị aanị, asị ụ zẹẹ ka à nyị ịsị ẹ zụ mẹ mị.

²Navọ wa dọ mị tụ́ hụụnị ụvọ aza edivi ene ee sì ka ẹnị ẹ̀ wụ̀ ọza.

³Ẹnẹyịmavara, ẹ yị nyị ịsị mị mẹ, ộ Ama wéē re aza edivi ẹnẹnị màa gẹ eyi amị di e yee bè mi.

⁴Nyị m mẹ̀, ama e yee sii sì ka ẹnị ẹ kwẹẹtẹ tù mị kẹnẹ Ohomorihi, aarịhịnị navọ we re ẹngụkata ene tù mị, dị wa kwẹẹtẹ wa dọ mị tụ́.

⁵Ẹnẹyịmavara, ẹwụ Ohomorihi ọgọdọgọdọ ọnị ụvọ ọza è yi mè tù ẹwa vị Ohomorihi Anisirẹrị nị Navọ wa kwẹẹtẹ dị wa sị ụya rị avaba anẹkụra edivi ene ee sì iruvo ọza.

⁶Aza edivi ẹnẹẹ ẹ̀ẹ maanị vẹ oruva dị ẹ yaa hàa ngụ ịnị ẹkụraa zị anka irezi avọọ.

⁷Wáā wụ́ ị́rẹyị ẹnẹ ẹ yaa kà a hụụnị irenu! Ẹ yaa kà ịrẹyị ama ẹ ka ọza ọ yị vaa wụ́ ịsị ẹnị aa kà.

⁸Ẹnẹyịmavara, mê re wa di u nyị wa unyi kẹnẹ nị Wê re avaba anẹkụra ẹnẹẹ, dị waa sị waa mẹ enyinyi nị.

⁹Ohomorihi amị, ana maanị sì ịrẹyị amị ẹwa vị ụkata oni mi che ayị za nọ Mee zi wu eyi, agụvị ka ewee sere mị ka asị a nyị ịsị ẹ kanyị mị nị.

¹⁰Ohomorihi vaa tụ́ ọvịdị amị, ọ vaa mẹ ka ma nyị ẹbẹẹba aza ene ee du mi ịrẹsụ.

¹¹Ohomorihi ohinọyị, navọ asị ụ wụ̀ wa, ka aza amị ve reè hi ayị ịrẹyị ẹnịnị Navọ wa sị ụkata mẹ wa kà ẹ̀ẹ zi doodo ịnị ẹhẹ, dị wa va wa nẹtẹ.

¹²Ebira odivi kẹnẹ ẹẹ̄ kà pooro nị Navọ oto ene e yee woo zị ọ̀ vara ịrẹpa za wa Ireche ọnịrị ịrẹyị odivi ẹẹ̄ kà nị.

¹³Navọ wa sị ọyịkụ-ọyịkụ gara wa va ha saka-saka Wàa vavọọ mẹ wa, avaba anẹhẹ vaa yẹ ka ẹwaa vị ohinọyị Anisirẹrị nị.

¹⁴Aza edivi ẹnẹẹ ẹ̀ẹ maanị vẹ oruva dị ẹ yaa hàa ngụ ịnị ẹkụraa zị anka irezi avọọ.

¹⁵Di e yee sì ịsọyịrịị zi woowoo di e yee nowu ịnẹ ọ̀ọ yị há wa.

¹⁶Ama ẹmị vaa jị ahẹ dị maa kà a ụ mẹmẹ nyị ụkata Ẹnẹnẹ vị ọnị mị vaa jị ahẹ ka ụụ̄ sì ịrẹyị ọza Ịrẹyị ọ̀ọ vẹ, ịda awụ m mee zwe vaa tẹ nị Ewee sere mị ka asị a nyị ịsị ẹ mẹ̀ mị nị.

¹⁷Ohomorihi ana aa dọ mịị tụ́, mâ kụ́ wụ avọ Ẹwụ Ohomorihi ene sì ịrẹyị amị, wee sere mị ka asị a nyị ịsị ẹ mẹ̀ mị.