Read ebira Ahẹ Ụgama 69 Bible Online

Ahẹ Ụgama 69 - ebira bible

Ahẹ Ụgama 69

¹Ohomorihi, navọ kwogwo wa dọ mị tụ́ ka ẹngụkata ọnọnị aa vaa mụnẹ mị anka enyi avọọ ọ sị kà mị ọrọkọ booro aanị.

²Mee chii ngụ enyi, me yi re aha sị ahụ jẹẹ Me si horo ngụ adagu, enyi ọ sị mị mụnẹ.

³Mê nowu pooro ka à gụ mị, owu ọ kụ́ mị tụ́. Ọrọkọ amị ẹ kụ́ há chire ọsa m mee nowu. Mê zi Ohomorihi amị eyi pooro, eyi amị ọ kụ́ kata.

⁴Aza ana aa kụ́ ayị amị ọọhẹ kẹnẹ ệ hyakụ rụrụ huna ẹyị ịrẹsụ amị. Ọnịvị amị ene ee sì ka ẹnị ẹ wụ̀ mị ệ rụrụ ẹnẹmẹhị vị ka vị a nyị m mẹ̀ ka yị wa nị. Ịsị mè yi yi, ệ sị ụkata za mị ka ma sị ọ vẹ.

⁵Ohomorihi, ẹ yị nyị ebira odivi ọnị mị mẹ̀ ọnị wẹ̀ yị yẹ. Wâ yẹ ebira ụkavụ ọnị mịị̄ mẹ.

⁶Ananyị yị Ẹnẹyịmavara Ochẹtẹẹngụ, navọ asị ụ na zẹẹ ka aza ana sị ayị tụra awụ è ne re ịrẹyị amị dị ụhị ọ̀ọ nyị wa. Ohomorihi Anisirẹrị mị ka asị ụ zẹẹ ka aza ana sị ayị tụra wụ è ne ịrẹyị amị dị ụhị ọ̀ọ nyị wa.

⁷Ma raà hụ agụvị awụ sị ẹngụ dọ ụhụ, ma raà sị eyi dọ ụhị agụvị awụ.

⁸Ma sị vara ọzọga yị ẹyịnyara amị ana a ma ẹmịrịị hụụnị ịnẹ ọnya vẹ.

⁹Ohomorihi, avaba ayị amị mi sị sì ịrẹyị irehi awụ nị Ụhụ ana aza aa kụ̀ wụ vị ọnị mị dọ hi ẹngụ.

¹⁰Maa jị òrèrè, mẹ yị rị ịsa, dị aza aa kụ̀ mị ụhụ nị.

¹¹Ịjị mị sị ịta kú ẹngụ ana sị zụ̀ ka ayị amị ô du, aza vị anaaa sị mịị mẹ̀ isiya, di ohweche ẹnị aa jị mị ahẹ nị.

¹²Aza ene hi oze ini orere aa mẹ mị isiya di ohweche ẹnị aa jị mị ahẹ nị.

¹³Ẹwụ ẹmaa dá ịpẹẹ yị nọ, Ẹnẹyịmavara. Ohomorihi navọ ụmẹ oni wèe sì, we tụ́ mi ohi agụvị ka mâ yẹ ka ụụ̄ sì ịrẹyị ọza ẹtẹẹtẹrẹ. Mâ yẹ ka ụ vaa dọ mịị tụ́ anka ụ mẹ̀ kà a.

¹⁴Navọ wa dọ mị tụ́, asị ụ zẹẹ ka me horo ngụ avata, Aarịhịnị dọ mị hụụnị ụvọ aza ana aa kụ́ ayị amị. Asị ụ zẹẹ ka me horo ngụ adagu.

¹⁵Asị ụ zẹẹ ka ịrẹyị ene tù mị anka ọhaara enyi aanị ọ̀ rị mị. Navọ asị ụ zẹẹ ka ọ̀ mụnẹ mị. Asị ụ navọ ka ịrẹyị ọnọnị ọ̀ sị mi chire ẹtẹ.

¹⁶Ẹnẹyịmavara, navọ wa ba mị owu. Ụụ̄ sì ịrẹyị ọza, avọọ ụ mẹ̀ rẹẹ mẹ ọyịza yị ọza nị. Ẹwụ ana maanịị vayị ọza, navọ wa kana eyi amị.

¹⁷Wéē re ka emi ozida awụ vị ana yà ịnị ịrẹyị aanị, navọ wa kana eyi amị, dị wa wụsẹ va ba mị owu.

¹⁸Ohomorihi, navọ we tere vẹ dị wa va dọ mị tụ́. Navọ wa dọ mị tụ́ ka ọnịvị amị ẹ sị kwẹẹtẹ tù mi.

¹⁹Wê re aza màa mẹ mi isiya, dị ẹ yaa mẹ ụhịị nyị mị. Wâ yẹ avaba ọnịvị amị

²⁰Isiya ẹnịnị aa vaa wụ̀ mị, me yi re ọza gụ mị ụvọ. Mee sì ka à nyị ọza ana hyakụ ro o mị, dị ọ sị ayị amị nẹtẹ, ana ẹ yị nyị ọza oni mi re.

²¹Ệ sị ẹchịpa tụ́ ịnị ịsa amị ka maa rị ọ. M mẹ̀ ka enyi aa kụ̀ mị, dị ẹ sị eche ana sị sụ́ ịrẹyị mị ka me hú ọ nị.

²²Ohomorihi, navọ ịzị aza ẹnẹẹ yà aa rị ịsa ịsọvọ ọ̀ vara ịrẹpa za wa. Navọ ahịka ịzọọ ẹ yà rị ọgụ ebira odivi ẹnịnị nị.

²³Navọ we gu wa eyi dị asị e kuku zụ re ẹtẹ, di we che wa ọjịrẹma dị asị ẹ kụkụ zụ vọrọ jẹẹ pooro.

²⁴Sị ọyịkụ pa ịva yị wa ẹtẹẹtẹrẹ, dị wa dà jị wa asị e re oze zwe.

²⁵Ajẹngụ ẹnịnị ẹ̀ jị eburu, asị a nyị ọza ana vana ra ịnị anị.

²⁶Ohomorihi, aza èe re ka wâ tụ́ ọza ụnava, dị ẹnị raa sị ụyaa rị aza ẹnẹẹ. Aza ọnị wàa mẹ ka ịsa ọ̀ọ zị, dị ẹẹ̄ kụkụ aa kụ ọ ịrẹkaa zị.

²⁷Waā da ụyaa tụ́ ịnị ụyaa yị wa. Asị ụ za wa beri aza ana aa mẹ̀ ebira ana vọrọ.

²⁸Nyee ịrẹha ẹnịnị hụụnị iwe ọnị u chẹrẹ ịrẹha aza ana yara hi, asị ụ chẹrẹ wa beri aza ana aa mẹ̀ ebira ana vọrọ.

²⁹Avaba ẹngụ amị vị ana kata dị aa zị mị Ohomorihi, navọ wa dọ mị tụ́ di we sere mị.

³⁰Mị vaa jị ahẹ dị maa sịị kụ́ Ohomorihi avọ Mị vaa sị ụbanyị yọ, dị maa kụ́ ọ avọ.

³¹Ọnọọ o vee zee Ẹnẹyịmavara eyi hu ka ma sị imaaru va yọ nị. Ô zee e eyi huna imaaru ene si ọpanyị nyị ana rụra mẹ̀ ịsọvọ.

³²Ịjị aza ana aa sị ụyaa rị ẹ̀ẹ maanị re e, ẹnịnị vaa jẹ. Ẹwụ nịnị ene ee sì Ohomorihi, navọ ayị awụ nịnị ọ̀ nẹtẹ.

³³Ẹnẹyịmavara a wụ́ aduwa oniruwa, Ọ mā si eyi wụ̀ aza anị ana a za hi ịnị ẹngwa.

³⁴Ẹbẹẹba ọnịrị ẹtẹ ẹ̀ẹ kụ́ Ohomorihi avọ. Òkū ọnịrị avaba ịsị e hi ịnị anị ẹnị ẹ̀ rẹẹ kụ́ ọ avọ.

³⁵Ohomorihi vaa dọ Anịzayọnị tụ́, dị o tenyi ọvọ jị kara ẹkụra Ijuda. Ịjọnọọ dị aza na ra hi ịzọọ, dị ẹ rẹ dọ ẹkụra ẹnịnị.

³⁶Ịpa ezi ahụ Ohomorihi ẹ vaa nyị ẹtẹ ọnọọ nị, dị aza ene sì ịrẹyị anị ra hi ịzọọ.