Read ebira Ahẹ Ụgama 71 Bible Online

Ahẹ Ụgama 71 - ebira bible

Ahẹ Ụgama 71

¹Ẹnẹyịmavara, ẹwụ mị sị ayị tụra nọ, aarịhịnị asị ụ mẹ̀ ụhị nyị mị.

²Ẹwụ vị Ohomorihi anaā mẹ ịrẹyị ana vọrọ, navọ wa dọ mị tụ́ Navọ wa wụ́ ịpọda amị, dị wa va ba mi owu.

³Navọ me re aha tẹ tụ́ ịda awụ, dị wa dọ mị tụ́ dị asị a nyị ịsị ẹ zụ kanyị mị ịzọọ. Wâ yẹ ka ẹwụ ee sere mị dị wẹ̀ yị zẹẹ ka à nyị ịsị ẹ kanyị mị nị.

⁴Ohomorihi amị, navọ wa dọ mị tụ́ hụụnị ụvọ aza edivi ana ahịka vị ẹẹ̄ chamayịị yị ọza nị.

⁵Ẹnẹyịmavara ana vị ohinọyị, ẹwụ mị sị ayị tụra nọ, mmẹ̀ hụrẹ vi ozweyi.

⁶A mẹ̀ hụrẹ ma mị, mị hụrẹ sị ayị tụra wụ nị. Mâ yẹ ka ẹwa sị mị hụụnị ịnẹ ọnyị amị jịnẹ vẹ nị. Mị vaa kụ́ wụ avọ pooro nị.

⁷Ẹhẹ amị vị ana sị mẹẹ anka ọpọtẹrẹwa avọ ini eyi aza ọrụrụ-ọrụrụ. Ama ẹwa sị mị tẹ, dị à yị nyị ịsị ẹ zụ kanyị mị nị.

⁸Eyinị-eyinị vị ọnị maa kụ́ wụ avọ pooro, dị maa kà a ka wâ nyị ụbanyị.

⁹Ohomorihi, aarịhịnị kwogwo, mèe si bo, dị mẹ̀ yị kụkụ nyị ụkata nị, asị u nē mi ta.

¹⁰Wâ yẹ ka ọnịvị amị ene ee sì ka ọnị ẹ̀ wụ̀ mị vị ana aa gẹ eyi amị.

¹¹Ẹ ka ẹwụ Ohomorihi o reè ne mi ta. Ẹ ka àa dụ mị dị à za mị ka ẹ yị kụkụ nyị ọza ana vaa dọ mịị tụ́.

¹²Ohomorihi, aarịhịnị navọ wa kà pè mi, navọ wa wụsẹ vẹ wa va ba mi owu.

¹³Ohomorihi, navọ aza ana aa dụ mị aanị è ve vú ẹtẹ dị ụhị ọ̀ nyị wa. Navọ ahịka ụhị ọ va nyị aza ene ee sì ka ẹnị ẹ̀ mẹ mị ọnya nị.

¹⁴Ẹmị vị ana vaa sị ayịị tụra wụ pooro, dị maa kịị kụ́ wụ avọ hu avọọ.

¹⁵Eyinị-eyinị vị ọnị mị vaa kà ịrẹyị ịsa ozoza ọnị waa mẹ, dị maa kà a ka ẹwaā dọ ọzaa ha nị, ma daka yẹ ka mẹ yị zụ kà avaba anị ta.

¹⁶Ẹnẹyịmavara Ananyị yị mị vaa vẹ dị ma vaa kà a ịzị ụ nyị ụkata na za. Ịsa ozoza ẹnị ẹwụ ịnya aa mẹ kẹnẹ mị vaa kà nị.

¹⁷Ohomorihi, m mẹ̀ hụrẹ vị ozweyi ụ hụrẹ sị ịsa ẹnẹẹ zụ̀ mị nị. Piporo va ngụ ajịnị vị ọnị maa kịị kà ịrẹyị ịsa ẹbanyị-ẹbanyị ọnị waa mẹ.

¹⁸Aarịhịnị mèe si bo di mi kụ́ ẹwa nyị nị, asị u hi ayị amị. Navọ wa jẹẹ mị ịrẹma pooro dị ma kà ịrẹyị ụkata awụ yị ezirẹma ana aa vẹ. Ohomorihi, ẹ yị nyị ọza ana zụ yẹ ta ụkọrọ ẹbanyị-ẹbanyị ọnị waa mẹ, nyị ọza ene e sii juwe awụ.

¹⁹Ohomorihi, ẹ yị nyị ọza ana zụ yẹ ta ụkọrọ ẹbanyị-ẹbanyị ọnị waa mẹ nyị ọza ene e sii juwe awụ.

²⁰Ohomorihi, wâ sị eyi amị re ịrẹyị. Mâ rị ụya ana ngụ ajẹ, ama ụ vaa sị mịị varẹma kwẹẹtẹ, ụ rẹ vanaa sị mị kwẹẹtẹ hụụnị eteesu oni mi chì ngụ.

²¹Ụ rẹ vanaa sị ụbanyịị mịị hu avọọ, dị ụ rẹ mẹ ka ayị amị òhunẹnẹ.

²²Mị vaa sị àgidibò amị dị maa sịị jị ahẹ kụ́ wụ avọ ka wâ nyị ịzẹyịza Ẹwụ Ohomorihi Anisirẹrị, mị vaa jị ahẹ kụ́ wụ avọ.

²³Mị vaa jẹ di mee nowuu jị ahẹ kụ́ wụ. Avaba ayị amị mị vaa sị kụ́ wụ avọ nị agụvị ka wa sị mị dọ tụ́

²⁴Eyinị-eyinị mi va sị kà ịrẹyị ịsa ẹbanyị ọnị ụ mẹ nị, agụvị ka ọza ana ka ẹnị aa mẹ mị ịrẹyị wa raà mẹ ụhị́ nyị wa. Ẹnịnị ẹ yị kụkụ re aha sị eyi tụ́.