Read ebira Ahẹ Ụgama 84 Bible Online

Ahẹ Ụgama 84 - ebira bible

Ahẹ Ụgama 84

¹Ẹnẹyịmavara Ochẹtẹẹngụ, mâ dà sị ịrẹyị irehi awụ kẹnẹ.

²Eyi irehi awụ aa tụra mị kẹnẹ. Ohomorihi ana yà ịzọọ, à kà ka me vene re ka mị yà ịda awụ.

³Inomi irenyi-irenyi ẹ kụ́ ịrẹngwẹ mẹ arekuku ẹ sị irehi mẹ pè ịzị a yàa mẹ̀ ịsọvọ ini eehi awụ, Ẹnẹyịmavara Ochẹtẹẹngụ ẹwa vị Ohomorihi ọnịrị ohinọyị amị nị.

⁴Aza ana ra hi ini eehi awụ ẹ̀ nyarị ịrẹsụ ọyịza, ẹnịnị vị ana vaa kụ́ wụ avọ pooro.

⁵Aza ana ahịka ẹwaa sị ụkataa yị nị, dị ayị ẹnịnị ee sì ka ẹnị ẹ̀ nọ Ijerusarẹmị vaa dàa jẹ.

⁶Aza ẹnẹẹ mẹ̀ zị ini ozi Ibaka aa parahu, enyi vị ana gụ ẹtẹ yị wa ịzọọ. Orihi ịpaapa ọ raà mẹ ka adagu è hi ịzọọ.

⁷Ẹ́ maà na, avọ ẹ màa nyị ụkataa hu avọọ pooro di e na ngụ ana vị ịda Ohomorihi nị.

⁸Ẹnẹyịmavara ana vị Ohomorihi Ochẹtẹẹngụ, ẹwụ Ohomorihi ọnị Ijekọvụ hẹkẹ, navọ wa wụ́ aduwa ọnị maa mẹ̀.

⁹Ohomorihi, navọ wa kana eyi re ọza ọnị ụ ka ọ̀ dọ yị tụ́ mị ka wa navọ wa mẹ ka ò zee yị ọza ọnọọ ọnị ụ nyị.

¹⁰Ọza ọ̀ọ yà ini eehi awụ ẹkụhị ọnya, ô hine ọza huna ka ọ̀za ọ̀ na yà aha ọsa mẹ ẹkụhị otomiroku. Ọ̀ọ sị ka ọnị mị va naa ra ịnị ajẹngụ aza edivi, mâ vana dọ ka ma si eyi pè oze ini eehi Ohomorihi amị.

¹¹Ẹnẹyịmavara ana vị Ohomorihi ọ vị ohinọyị ayị nị, ọnị aa dọ yịị tụ́ nị. Ẹnẹyịmavara ọọ̄ vayị ọza dị ộ sị ụbanyị yọ nị. Ịsa ozoza-ozoza Ohomorihii mẹẹ yị aza ẹnẹ ẹ̀ yị mā zị ụsẹ akụvị nị.

¹²Ẹnẹyịmavara Ochẹtẹẹngụ, aza ana sị ayị tụra wụ ẹ̀ nyarị ịrẹsụ ọyịza.