Read ebira Ahẹ Ụgama 90 Bible Online

Ahẹ Ụgama 90 - ebira bible

Ahẹ Ụgama 90

¹(Aduwa oni Imosiisi ọza Ohomorihi mẹ) Ananyị yị, ịda awụ ị tẹ hụrẹ ụmọrụmọ nọ.

²Dị ụ va yẹ ka ụụ mẹ ataba nịnị ne beri eteesu ọnịrị ẹhẹ hụrẹ ụmọrụmọ ẹwụ vị vị Ohomorihi nị.

³Wâ mẹ ka aza ẹ̀ rẹ varẹma nọ ini eteesu Wâ hị́ wa ka ọza rẹ varẹma nọ ini eteesu.

⁴Ịrayị akahị ini eyi awụ vị ana sị mẹẹ ẹkụhị ọnya avọọ, mị ka vị ọ sị mẹẹ anka ẹẹrị nị.

⁵Wâ mẹ ka Iswọọza ọ̀ kụ́ aza na para hu. Aza vị ana sị mẹẹ anka avị ọwọọwa ene nyị ẹnẹnẹ,

⁶Ịjị oruva mee tù, ọ sị wụ, o sị wọ̀rọ̀ va ha.

⁷Ayị màa kụ́ wụ, angwa ò hi yi, ye wusu.

⁸Wâ yẹ avaba ebira odivi ọnị yaa mẹ, ẹ yị nyị ikonya ọnị ụ wẹ̀ yị yẹ.

⁹Ọyịkụ awụ ọ yị zẹẹ ka ye kú orubo, avaba ẹhẹ ayị vị ẹhẹ ụyọrị.

¹⁰Ịrayị ẹtarẹwụ kẹnẹ ị nyị ọ mị mẹ ịnị ẹhẹ ọnọnị nị, ọza ana àa nyị ụkata dị aanị gụ ẹbẹẹna. Avaba anị vị vị ẹngụkata ọnịrị ayodu. Ịsọnị-ịsọnị ẹhẹ ayị ộ ta, ye si hu.

¹¹Ẹ̀nị ẹ ka ọnị ọ zụ kà a ịzị ọyịkụ awụ dẹngụ na za? Wàa kụ́ ayị, ivóvò vị ana aa ngụ avaba aza ẹngụ.

¹²Aarịhịnị navọ ya yaraa za ẹkụhị ẹhẹ ayị ịrịka, agụvị dị ya zụ yẹ ịrẹyị.

¹³Ẹnẹyịmavara, navọ de, wa nyị isuuru. Aanị ụ wáá mẹ̀ vaa kụ́ ayị pooro nị? Navọ wa vayị ezi ahụ awụ.

¹⁴Navọ ẹnẹnẹ-ẹnẹnẹ yee re ka wê sì ịrẹyị ayị ịnị ịzẹyịza, dị ọnọọ ọ̀ há ọnọọ ọ̀ há yị ịnẹ. Ọnọọ vaa mẹ ka ayị ayị òo hine, dị yaa jị ahẹ pooro ịnị ẹhẹ ayị.

¹⁵Anka ụ mẹ̀ sị ụya rị yị na za, dị ị nyị ẹngụkata, navọ wa rẹ vavọọ mẹ ka ịnẹ ayị ò ve hine.

¹⁶Navọ wa mẹ̀ ụkọrọ ẹbanyị-ẹbanyị awụ dị eyi ezi ahụ awụ ò re e, di ezi eyi ịrẹma-ịrẹma ẹ̀ zụ yẹ ụ mẹmẹ nyị ụbanyị.

¹⁷Ananyị yị ana vi Ohomorihi ayị, navọ kwogo wa vayị ayị, dị wa navọ ịsa tụra ịsa ọnị yàaa mẹ, ò zee yị. Mị ka aarịhịnị navọ ịsa ọnị yàaa mẹ, ò zee yị.