Read ebira Ahẹ Ụgama 94 Bible Online

Ahẹ Ụgama 94 - ebira bible

Ahẹ Ụgama 94

¹Ẹnẹyịmavara, ẹwa vị Ohomorihi ene eē sí atọ ịrẹyị nọ, navọ aza ẹ̀ yẹ ka ayịị̄ kụ́ wụ.

²Ẹwụ Ohomorihi ana aā mẹ̀ ọkarẹyị anẹhẹ, navọ ahịka ebira odivi ana aza edivi aa mẹ u si si wa atọ nị. Ịsa ene e sì ọ vị ọnọọ nị.

³Ẹnẹyịmavara, aanị ụ wáá mẹ̀ vaa navọ aza edivi ka ẹ̀ẹ jẹ ịrajẹ pooro nị?

⁴Avaba aza edivi vị ana aā kà ịrẹyị oni irenu ẹnịnị è yi tù, di e yee wo oto irenyi-irenyi.

⁵Ẹnẹyịmavara, wéē re aza edivi mẹ̀ za aza awụ dị ẹ yaa mẹ ẹchakaa yị wa.

⁶Aza edivi ẹnẹẹ ệ za osoku ọnịrị azọga ne beri ozi oku dị ẹ wụ̀ wa va ha nị.

⁷Ê ro o ka Ẹnẹyịmavara o yi re ẹnị ẹ ka Ohomorihi oni Ijekọvụụ̄ hẹkẹ o yi vee tụ́ ohi.

⁸Ẹwụ nịnị ọnụra ẹnẹ ẹ̀ yị yẹ ịrẹyị ene hi ịnị akakana aza ẹnẹẹ, na sị mẹ hẹẹ nịnị. Ye re ụmẹ ẹnị ẹwụ nịnị vaa sị yẹ ịrẹyị aanị?

⁹Wéé zụ ro ka ọza ana mẹ ụtọ yị aza ọnị ọ yị vaa wụ́ ịrẹyị? À vi u ro ka ọza ana mẹ eyi yi aza o yi vee re ẹtẹ nị?

¹⁰Ohomorihi ọọ̄ pa aza ene hi ịnị ẹhẹ nị, wéé ro ka ọ yị vaa sị ụyaa rị wa? Ọnị ọ rẹẹ̄ sị ịsaa zụ̀ aza anị, ọza óó zụ ro ka ọnị ọ yị yẹ ịrẹyị?

¹¹Ẹnẹyịmavara ộ yẹ ịrẹyị ana azaā ro ịnị ayị ẹnịnị. Ộ yẹ ka ịrẹyị kẹnẹ-kẹnẹ eē ro nị.

¹²Ẹnẹyịmavara, ọza oni u wèe nyị iyi tụ́ ohuvọ dị waa sị ọda awụụ zụ ọ nị, ọ̀ nyarị ịrẹsụ ọyịza.

¹³Wa raà mẹ ka aza ẹnẹẹ ẹ̀ zụ nyị ẹngwọọrọ ịnị ụmẹ ọnị ịrẹyị odivi ọ̀ọ vẹ. Avọọ ẹngụ ẹnịnị mẹ̀ vaa rọ pooro dị à chị ụsị ọnị ọnịvị vee horo ngụ nị.

¹⁴Mâ yẹ ka Ẹnẹyịmavara o yi vee yi aza anịị tịtẹ, ọ yị vaa hụrẹ aza anịị ụvọ.

¹⁵Ụmẹ aa vẹ ana a vanaa sị ịzẹyịzaa mẹ̀ ọkarẹyị. Aza ana aa mẹ ịzẹyịza vaa jẹẹ pè e.

¹⁶Ẹ̀nị ẹ vaa jẹẹ mị ịrẹma dị ya kà a yị aza edivi ana aā mẹ̀ ebira odivi ka sị aa hị́ avọọ?

¹⁷À yị vị Ẹnẹyịmavara ana aa gụ mị ụvọ, mị yaanị wusu dà.

¹⁸Mê ro ka m maa hyẹdụ aanị nọ, ama Ẹnẹyịmavara ộ sị ọtụ kà mị ịrẹma agụvị ô sì ịrẹyị amị.

¹⁹Ịjị ayị amị kụ́ vazi, Ohomorihi ô sị ayị amị hunẹnẹ, dị mị kụkụ aa jẹ nị.

²⁰Ẹnẹyịmavara ẹ yị nyị ụvọ awụ rị tụ́ ịnị ịrẹyị aza ana aa sị irechee mẹ̀ ọkarẹyị, aza ene èe re ịrẹyị ẹnẹ ẹ̀ yị vọrọ, dị ẹ ka ộ vọrọ.

²¹Ệ va iruvo bẹ ẹ yaa gẹ eyi aza ana aa mẹ̀ ebira ana vọrọ, ẹ̀ẹ za ọza ẹnẹ ẹ̀ yị nyị ịsị ọ mẹ, dị ẹ ka à na wụ ọ.

²²A ma ịda Ẹnẹyịmavara mị na tẹ̀ tụ́ dị à yị nyị ịsị ẹ zụ mẹ mị nị, Ọnị ọ vị Ohomorihi amị nị. Ọnị ee sere mi ka asị a nyị ịsị ẹ zụ kanyị mị nị.

²³Ohomorihi vee si aza edivi atọ ebira odivi ẹnị ẹ yaa mẹ. Mị ka Ẹnẹyịmavara ana vị Ohomorihi ayị ọ vaa wụ̀ waa ha nị.