Read ebira Ahẹ Ụgama 99 Bible Online

Ahẹ Ụgama 99 - ebira bible

Ahẹ Ụgama 99

¹Ẹnẹyịmavara ọ vị ohinọyị nị. Â nyị ka angwa òo hi anẹhẹ, dị ẹ̀ẹ dá ẹgahị. Ẹnẹyịmavara vị ana yaayịtẹ ịnị akakana icherubi nịnị, dị ẹhẹ ee henyi jigi-jigi.

²Ẹnẹyịmavara ộ nyị ụbanyị tụ́, ọnị ọ nyị ụbanyị huna avaba anẹhẹ nị.

³Avaba aza vaa sị ụbanyịị yị ịrẹha anị ana maanị ngụ ịrẹyị. Ọnịnị ọ vị nị.

⁴Ohomorihi ohinọyị vị ana nyị ụkata, oō sì ka asị a mẹ apẹ. Ọ raà sị ịzẹyịza hi ẹtẹ ini Isirẹrị, ịsa ana vọrọọ mẹ nị.

⁵Waā kụ́ Ẹnẹyịmavara ana vi Ohomorihi ayị, tana tụra ẹtẹ ọvịdị anị ịzị ọ yaayịtẹ agụvị ka ọnịnị ọ vị nị.

⁶Imosiisi ọnịrị Eerọnị yà ịnị aza ana vị ohirẹsụ irehi Ohomorihi. Ịsamụwẹrị ọnị rẹ yà ịnị aza ana nā mẹ̀ aduwaa hi Ohomorihi di o tụ́ wa ohi.

⁷Ohomorihi vị ana yà ini eguhi ana dà jẹẹ anka ọhẹ avọọ di ee pè wa kà ịrẹyị. Avaba ọda oni Ohomorihi mẹ yị aza ẹnẹẹ vị eni e si eyi pè.

⁸Ẹnẹyịmavara ana vị Ohomorihi ayị, wê tụ́ ohi aduwa ẹnịnị. Ịzẹyịza ụụ̄ sị ụyaa rị wa, ana ụ rẹẹ̄ vagu, wa ini ịsa edivi ẹnị ẹ̀ẹ mẹ.

⁹Waā sị ụbanyịị yị Ẹnẹyịmavara ana vi Ohomorihi ayị, di wa nọ ịnị ataba anị dị waa tanaa tụra ẹtẹẹ kụ́ ọ nịnị. Yẹ nịnị ka Ẹnẹyịmavara ana vị Ohomorihi ayị, ẹ yị nyị ẹngụ anị.