Read ebira Ụhịrẹyị 13 Bible Online

Ụhịrẹyị 13 - ebira bible

Ụhịrẹyị 13

¹Ozi ana yẹ ịrẹyị vị anaā wụ́ ịrẹyị ada anị, ama anaamọvị ọ mā dọ ka ọnị o nyeeyi.

²Ọza ọyịza vị ana rị aha irenu anị ama ọza ọhịmị vị ene si oze ọyị chamayị yị ọza.

³Ọza ana sị ụvọ za irenu anị vi ene sere ẹhẹ anị ama ọza anaa kà kẹnẹ-kẹnẹ vị enee vu ẹngụ anị ẹtẹ.

⁴Ọza anaā nyị uworo o mē zụ re ịsị e si ama ọza anaā mẹ̀ vee re e tụra-tụra.

⁵Ọnịzẹyịza ọọ nyị ịhyẹrẹ ireche nị ama ọza ọhịmị vị ana mẹ̀ ịrẹyị ụhị.

⁶Ịzẹyịza ọnịzẹyịza aa dọ ọ tụ nị ama ebira odivi ọza ọhịmị o vee vu ọ ẹtẹ nị.

⁷Ọza ẹnyị vị ana mẹ̀ eyi ụbanyị ọnị ọ yị nyị ama di ọza ẹnyị aa sị ẹngụ anị tẹ.

⁸Ọza ọbanyị vị ana sị ẹkẹhị dọ ẹngụ anị ha, ama a yi nyị ịsị ẹ vị angwahi onosiye.

⁹Ẹhẹ ọza ọyịza sị mẹ anka ịra ana a za avọọ ama ẹhẹ ọza ọhịmị vị ana sị mẹ anka ịra ene e mi avọọ nị.

¹⁰Ẹngụ ọ yị sị tụ ẹba vị ana kụ ẹngụkata hị́ ẹtẹ ama ọnịrẹyọyẹ vị ene họ̀ use ajuwe.

¹¹Ẹkẹhị ịrịra o mē ku dị ọ ta ama ututo ẹkẹhị sị gụ nị.

¹²Ịsa ọnị ọza e si ee tura ẹtẹ ayị anị vaa zị nị, ama ọza ene re ịsị ee si vị ọnị ayị anị hine.

¹³Ọza ana sị eyi wụ ajuwe obooro vị eneē vu ama ọza ana a saasa a ọ vaa ha nị.

¹⁴Ịrẹyị ọnị ọnịrẹyọyẹ ka vi ene e tenyi ẹhẹ ọza. Ịrẹyị ọnọọ vaa dọ ọ ha ịnị ụmẹ ẹngụkata.

¹⁵Ebira ozoza vị ana a sị ụbanyị yị ọza ama apẹ ọyị mẹ̀ ẹ yị nyị ịzị o tu.

¹⁶Ọza ana yẹ ịrẹyị vị ene e rò dị ọ vaa mẹ̀ ịsa ama ọnụra vị ana da ụra anị zụ.

¹⁷Ọnụtụ odivi vị ana a kụ akanya tu ọza ama ọnụtụ ọyịza vị ene e tenyi ẹtẹ.

¹⁸Ọza ana ka ọnị ọ mā wụ́ ịrẹyị ọza vi ene e re, dị ụhị a nyị ọ, ama ọza anaā wụ́ ịrẹyị ọza vi ana nyị ụbanyị.

¹⁹Ọza o re ịsị e si ayị anị hine nị. Ọnụra kẹnẹ ọ vị enyisi anị ka ọ va hụụnị ebira odivi anị nị.

²⁰Ọza anaā zị ògù ọyẹrẹyị vị ana yẹ ịrẹyị ama ọza ene e pe ọnụra za ọta vị anaā mẹ ẹngụ anị ịrẹyị.

²¹Odivi oō du ọza ọhịmị echi nị ama ọnịzẹyịza vị eneē re ọyịza.

²²Ọza ọyịza vị ana a navọ ogu tịtẹ yị ezi ọnịrị ẹmazị anị. Ama ogu ọza ọhịmị ọnịzẹyịza vaa sị mẹ ẹhẹ nị.

²³Ịsa ịnị aarẹ onosiye ọ̀ọ daka mẹ ẹtẹẹrẹ ama amẹrị ẹ yị vaa zẹ ka ò re e rị.

²⁴Ọza ene e mē tu ozi anị e yị sị ịrẹyị anị ama ọza ene sị ịrẹyị ozi anị vị ene tu ọ.

²⁵Ọnịzẹyịzaā nyị ẹhụ ịsa ana hụ ọ rị ama aza ọhịmị vị ọnị ụngwẹ kụ pooro.