Read ebira Ụhịrẹyị 16 Bible Online

Ụhịrẹyị 16 - ebira bible

Ụhịrẹyị 16

¹Ọyịkà vị ọza, ama ọyịmẹ̀ vị Ẹnẹyịmavara.

²Avaba ịsa ọnị ọzaā mẹ vị ọnị o rò ka ọ̀ vọrọ, ama Ẹnẹyịmavara e re ayị ọza nị.

³Sị ịsị wàa mẹ̀ chire Ẹnẹyịmavara ụvọ, dị ọ zụ vị mẹ̀.

⁴Ẹnẹyịmavara ọ nyị iruvo ọnị ọ sị mẹ̀ ịsavịsavị. Ụya vị ene ku e zi ọza odivi.

⁵Ẹnẹyịmavara ọ nyị ịhyẹrẹ ọza anaā sịị ẹngụ anị tụ ẹba. Ọ yị vaa zẹ ka ọ mẹ̀ ẹ sị rị.

⁶Ọza eneē hí angwa Ẹnẹyịmavara vi ene zwe yi ebira odivi. Ohomorihi vaa vagu ebira odivi ẹngụ ọza ọnọọ agụvị ka o sì ịrẹyị anị, dị ọ wụ́ chire e nị.

⁷Ọza ọ̀ọ mẹ̀ ebira ana ngụ Ẹnẹyịmavara eyi, dị ọ mẹ̀ ka ọnịrị ọnịvị nịnị e zee.

⁸Ịsa chee ọnị ọza sị ẹhị anị si ọ mẹ̀ hu ẹkẹhị ọdẹngụ ọnị ọza sị asuvu nyị nị.

⁹Ọyịkà vị ọza, ọyịmẹ̀ vị Ẹnẹyịmavara.

¹⁰Ẹnẹyịmavara ọọ̄ sị ịrẹyị yị ohinọyị ka, dị asị ọ mẹ̀ ọkarẹyị akụvị nị.

¹¹Ẹnẹyịmavara ò si ka osohu ọ̀ sị ẹnya ana vọrọ mọ ịsa yị ọza, dị ọọ̄ ná a ẹhwị ẹkẹhị anị.

¹²Ohinọyị vị ana vọrọ ka ọ nyị ịhyẹrẹ ebira odivi agụvị ka ịzẹyịza ọ sị ụkata yị ohinọyị nị.

¹³Ohinọyị vị eneē sì ịrẹyị ọza anaā ka ịzẹyịza. Ayị anị vị eneē hine tu ẹngụ ọza ọnọọ.

¹⁴Ọza ana yẹ ịrẹyị vị ana sị ayị ohinọyị nẹtẹ agụvị ka ọ nyayịnẹ wụ̀ ọza ayị ọ̀ọ kụ ọ.

¹⁵Ayị ohinọyị òo hine, aza anịị mẹ ẹngwọọrọ nị. Oyisì ọnị ọ nyị yị aza anị sị mẹ anka eguhi anaa zụ orihi ị̀rẹ̀sụ̀ avọọ nị.

¹⁶Ọza ọ nyị ịrẹyọyẹ o zoza huni ka ọza ọ nyị ẹkẹhị nị.

¹⁷Ọza ọyịza vị ene zwe yi odivi, ọza ana sị ụvọ za ẹngụ anị vị anaa dọ ẹngụ anị tụ́.

¹⁸Ụhị ọọ̄ nyị ọza anaā sịị ẹngụ tụ ẹba nị. Ịrẹsụ ọyị sị tụ́ ẹba vị anaā va ọza nẹtẹ.

¹⁹Ó vi ene zoza ka ọza ọ sị ịrẹsụ nẹtẹ beri onosiye nịnị hụụnị ka ọnịrị aza ana sị ẹngụ tụ ẹba ẹẹ sị ụkata dọ ogu aza mẹ̀ ẹnịnị nị.

²⁰Wụ ịrẹyị ana a ka yị wụ agụvị o zee yị wụ. Sị ayị tụra Ẹnẹyịmavara dị ayị awụ ọ hine.

²¹Ịrẹyị ọyị yara ka vị anaa sị ịrẹyọyẹ zụ. Ẹngụ ịrẹyị ọnọọ vị anaā dọ ọza ayị.

²²Ịrẹyọyẹ sị mẹ anka oswe yị ọza ana yẹ ịrẹyị avọọ nị. Ọza anaa sị vụrị ka ọnị ọ pa ọnụra venee du ụmẹ anị ha kẹnẹ.

²³Ọza ana yẹ ịrẹyị vene rò ịrẹyị dị ọ vaa ka a. Ịrẹyị anị vị ana ngụ ọza ẹngụ.

²⁴Ịrẹyị ozoza vị ene hine ọza anka ẹhụ avọọ. Ọ́ sị ọza ayị nẹtẹ, dị ọ rọ tụ ọza ẹngụ nị.

²⁵Ọza ọ̀ọ nyẹngụ e rò ka oze anị ọ gẹ nị ama dị ahịka ọ sị ọ ne vu nị.

²⁶Ọza eneē si ịsa vị anaā mẹ dị o re. Ọza ọnị ụngwẹ aa kụ vị anaā mẹ̀ dị ọ rị.

²⁷Aza ọhịmị vị eneē si oze oyi du ọza; ịrẹyị irenu ẹnịnị rị ọza anka ịra avọọ nị.

²⁸Aza ọhịmị vị anaā kụ ọza ịrẹsụ nya ẹngụ; ẹ́ẹ sị ireche jị ụna ọọtọta ana sị ayị yị ẹngụ nị.

²⁹Ọza anaā zyaazị vị eneē tura ọnọhụva anị na ngụ ịrẹyị.

³⁰Ọza anaā zị oze ịrẹma sị eyi tụ́ ịrẹyị ọ nyị aro ọhịmị tụ́ ịnị ayị anị.

³¹Ẹwa vị ụbanyị yị ọza ene bo tu ọ; aha ọ vị ka ọza ọ ra ẹhẹ ọyịza nị.

³²Ọza ọnị ayị anị nẹtẹ o huna ọza ana nyị ụkata nị; ọza ana zụ sị ụvọ za ẹngụ anị o huni ọza ana nyị avaba ẹkụra nị.

³³Yaa nyẹngụ ee rò aayị ama ịsị ẹ vaa mẹ vị ana ya ịnị ụvọ Ẹnẹyịmavara.