Read ebira Ụhịrẹyị 19 Bible Online

Ụhịrẹyị 19 - ebira bible

Ụhịrẹyị 19

¹Onosiye anaa mẹ ịzẹyịza ọ dahi huni ọnụra enee cheeche nị.

²E yị zoza ka ọza ọ mẹ ịrẹyị dị asị o rò o, eyiha vị anaa da ọza ikoro.

³Ọza ẹnyị ọọ raa sị ụra wụ ẹngụ anị dị a su ọ za Ẹnẹyịmavara.

⁴Òo zee yị ọza vị ọnị ọọ̄ nyị anda ama oo divi yị ọza, ọ́ ma nyị anda.

⁵Ọza ana dọ ivenu ireche ịnị ikootu vị anaa rị ụya anị. Ẹ yị vaa mẹ̀ ẹ sịị rị.

⁶Ọzọza vị ana ga ọza ana nyị ịsa, ẹyaa ga a agụvị dị e re ịsa dọ hụụnị ụvọ anị.

⁷Ọza ọnị o divi yị vị ana anda anịị ree zwè; óo nee hi u eyi ọta anị è yèe zwèe yọ. Ẹ́ yị nyị ịsị ọ mẹhịị mẹ̀ dị ẹ̀ dọ ka ẹnị aa gụrị ọ.

⁸Ọza ana yẹ ịrẹyị vị ana sị ụbanyị yị ẹngụ anị, ọza ana yẹ ịsa aa mẹ vị ọnị oō zée yị.

⁹Ọza ana dọ ivenu ireche ịnị ikootu, ẹ yị rị ọ, a rị ụya anị, ọ sị ẹngụ anị wụ.

¹⁰Ẹhẹ ọyịza ẹ yị rere ọnụra, a vị ka dị ozi ahụ ọ vị ọdọvịdị.

¹¹Ịrẹyọyẹ vị anaa sị ayị ọzaa nẹtẹ, ọza anaa sị eyi hụụnị ịrẹyị aā sị ụbanyị yị nị.

¹²Ọyịkụ ohinọyị vị eneē chire ẹtẹ angwa, ama ebira ọyịza anị vị anaa sị ẹtẹ rọ̀.

¹³Ọnụra vị ana kụ ẹngụkata tu ada anị, ọnẹẹ ana zyaazị vị ene du ọza ayị anka orihi ẹnẹ ẹ yị zẹ ka ọnị ọ jị avọọ.

¹⁴Ada ọza ò zụ da irehi, dị ọ mẹ ogu yị ọ ama Ẹnẹyịmavara kẹnẹ ọ zụ sị ọnẹẹ obooro yị ọza nị.

¹⁵Onuworo vị ana sụ ara pooro, ọza ẹnẹ nyị ana a mẹ̀ vị ọnị ụngwẹ kụ.

¹⁶Ọza anaa saasa ọda Ohomorihi vị enee ku orubo, ọza anaa sị eyi wụ́ ịrẹyị anị vene vee su ne ta.

¹⁷Ọza ana mẹ ọnụya ẹyịza vị anaa sị ịsa rèré Ẹnẹyịmavara, o vee sí ọ yọ varẹma.

¹⁸Pa ezi ẹwụ ịnị ozweyi ẹnịnị ẹnẹ zụ kọsẹ, ẹ yị vavọọ u wee du wa ha nị.

¹⁹Navọ ọnọyịha ọ̀ rị ụya anị, wẹ yị zẹ̀ẹ ka ọ̀ rị ụya anị, ụ vene tenyi ọ mẹ.

²⁰Wàaa dọ ajuwe dị ụ tenyi ẹngụ ka waa kọsẹ nị, ụhụhwọọ ụ vaa yẹ ịrẹyị.

²¹Aza ẹ zụ mẹ aro ọrụrụ-ọrụrụ tụ ịnị ayị ama ịsị Ẹnẹyịmavara oo si ọọ̄ vaa mẹ nị.

²²Ịsị aza è sị ịnị ụvọ ọza ọ vị ka à zụ sị ayị tụra wụ nị. Ọza anaa rị ụya ọọ̄ dahi huni onireche nị.

²³Ọza ene hí angwa Ẹnẹyịmavara vee ku orubo dị ọ mẹ ẹhẹ anị ịnị ẹngwọọrọ.

²⁴Uworo ọ̀ yị zẹ ka onuworo ọ da ịsa nọ irenu.

²⁵Sị ụya rị ọza ana sị ẹngụ tụ ẹba agụvị dị ọnụra ọ kọsẹ ịrẹyọyẹ, ọza ana yẹ ịrẹyị vana kọsẹ hụụnị ohuvọ ana a tụ́ ọ.

²⁶Ozi anaa chamayị yị ada anị, dị ọ dụ ọnyị anị hụụnị eehi vị anaa mẹ̀ ịrẹyị ụhị ọnịrị ụhụ yị ẹngụ anị.

²⁷Ozi emi, ụmẹ ọnị waa ka wẹ yị kụkụ wụ́ ịrẹyị ọza, ịrẹyọyẹ nyima aa hụrẹ wụ ụvọ avọọ nị.

²⁸Ẹ yị nyị ọkarẹyị ịzẹyịza ịzị aza ya dọ ivenu ireche ọyị sị kụ ẹngụkata tu aza. Aza ọhịmị vene sì ịrẹyị ịsa odivi.

²⁹Ụya vi ene tenyi tịtẹ ee zi ọza anaa sị ịrẹyị Ohomorihi mẹ̀ isiya. Ọnụra vi enee tu ịjapa ịnị ịrẹma.