Read ebira Ụhịrẹyị 21 Bible Online

Ụhịrẹyị 21 - ebira bible

Ụhịrẹyị 21

¹Ayị ohinọyị sị mẹ anka okuha ịnị ụvọ Ẹnẹyịmavara avọọ nị. Ịzị o zee eyi kẹnẹ ọ vaa ịrẹsụ ka nị.

²Ọza ọ nyẹngụ e ro ka ịsị ọnị aa mẹ ọ vọrọ, ama Ẹnẹyịmavara ọ zama ayị ọza re nị.

³Ọza ọ̀ mẹ̀ ịsị ẹ vọrọ o hine Ẹnẹyịmavara hu ịsọvọ ọyịmẹ̀ nị.

⁴Aza anaa mẹ odivi vi anaā sịị ẹngụ tụ́ ẹba di e yee wu. Ịrẹyị odivi kẹnẹ ọ jị wa areyi nị.

⁵Ọza ana kụ ẹngụ hi ịsa ana aa mẹ vana nyị rị ụvọ ama eneyiha vi ọnị ọ jị za a.

⁶Ọgụ ọnị ọza sị asuvu nyị vị anaa ta hi ẹtẹ anka areyi avọọ, usu vị ọnị ọ sịị gẹ ọbẹ.

⁷Aza ọhịmị ẹ yị dọ ka ẹnị ẹ mẹ̀ ịsa ọyịza. Ẹẹ̄ kụ́ ẹngụkata tu aza pooro nị, ebira odivi ẹnịnị ọ vaa wụ̀ wa nị.

⁸Oze anakụvị ọọ̄ ma vọrọ ama ọnịzẹyịza vana ra ẹhẹ anị a mẹ vọrọ.

⁹Ọza o si oboka ọnya kara tụ́ ọ mẹ hu ka ọnịrị ọnyẹnẹẹ ọnịrẹyị ẹ raa ịnị eehi ọnyara nị.

¹⁰Aza ọhịmị vị ọnị odivi ọyịmẹ̀ hụ ẹngụ. Ẹ yị ma vayị ọza vụrụ-vụrụ.

¹¹Ịjị Ẹnẹyịmavara ọ sị ụya rị ọza anaa sị ịrẹyị mẹ enyinyi, ọnụra vaa kọsẹ Ịrẹyọyẹ. Ọnịrẹyọyẹ vana kọsẹ hụụnị ịrẹyị ana sị zụ ọ.

¹²Ohomorihi ana vị ọnịrẹyịzẹyịza ọ̀ yẹ ịsa anaa na ịnị eehi ọza ọhịmị. Ọ́ vaa va aza edivi nọ ẹtẹ nị.

¹³Ọza ọnị ẹ yị gụ onosiye ụvọ, ọ yị vee re ọnọgụvọ anị.

¹⁴Were-were sị ẹyịza na yị ọza anaa kụ ayị hi wụ agụvị ayị anị ọ nẹtẹ.

¹⁵Ọkarẹyị ịzẹyịza vene hine ọnị ịrẹyịzẹyịza ayị ama dị ọ vị ayodu yị aza ọhịmị.

¹⁶Ọza ene yi ịzẹyịza tịtẹ vị ana gụrị usu.

¹⁷Ọza enee sị ẹngwọmẹ vene vee re osiye ọza ana dụ ịsọyịrị ọnịrị eche zị ọ yị zụ nyị ịsa rị ụvọ.

¹⁸Aza ọhịmị ẹ vaa rị ụya ọnị e kú tu ọza ọyịza nị.

¹⁹Ọza ọ̀ vana na raa ịnị ụnọmị ọ rọ̀ ọ ẹngụ hụụnị ka ọnịrị ọnyẹnẹẹ ọnịrẹyị anaa rị uhuhu ọ ra ịnị eehi ọnyara nị.

²⁰Ọnịrẹyọyẹ ọọ̄ nyị ẹkẹhị dị ọ̀ nyị ẹngwọọrọ nị. Ama ọnụra vene du ẹkẹhị ha.

²¹Ọza anaā mẹ ịzẹyịza, dị ọ vayị ọza vị ọnị aza vavọọ vaa mẹ̀ yị dị ẹhẹ anị è zee yọ.

²²Ọza ana yẹ ịrẹyị ọ zụ rị ẹkụra ọnị Isoja nịnị è sere, dị ọ gara aha ọyị tẹ ene sị eyi tụra ha.

²³Wàa sị irenu awụ kwoku, wẹ yị vaa ngụ ịrẹyị.

²⁴Ọza anaa sị ẹngụ tụ ẹba vene wu, dị aa mẹ̀ ọjịnọka.

²⁵Onuworo nịnị eneē yị mē si ka ẹnị ẹ mẹ̀ ụkọrọ, vana wụ ẹngụ ẹnịnị kẹnẹ.

²⁶Aza odivi vana dụ ịsa ọza gogogo pooro kẹnẹ ama ọnịrẹyịzẹyịza ọ yị ma sị ụvọ ku oku.

²⁷Ẹnẹyịmavara ọ̀ nyị ịhyẹrẹ ịsọvọ ọnị aza edivi aa mẹ̀ dị ọ vaa sị vị ka agụvị ịsa odivi ẹ yaa mẹ̀ ẹ nị.

²⁸Ọza anaa dọ ivenu ireche vaa rị ụya anị ama ọza anaa nyị ịzẹyịza a vaa dọ ịrẹyị anị tụ ịzọọ nị.

²⁹Ọza odivi vana mẹ̀ eyidaku ama ọnịzẹyịza ọ yị jị ẹngụ anị ịrẹka.

³⁰Ẹ nyị ịsị ịrẹyọyẹ ọnịrị eyohweyi ọza vị ọvịdị Ẹnẹyịmavara.

³¹Ọza ọ zụ kanyị ọpa aa nọ ịrẹkụ ama Ẹnẹyịmavara ọ sị ọzaa nyị ẹbẹẹba ịrẹkụ nị.