Read ebira Ụhịrẹyị 23 Bible Online

Ụhịrẹyị 23 - ebira bible

Ụhịrẹyị 23

¹Ẹwụrị ọza ọbanyị aa rị ịsa, yẹ ụ mẹmẹ a rị ịsa o.

²Da ịrẹka awụ vẹ ẹtẹ wàa vị ọnị ịnẹ ọbanyị.

³Asị ụ ha ọhọha ịsa chomi-chomi ana a kụ hi ọvịdị awụ. Ịsa ẹnẹẹ vị ene e si vene wu.

⁴Asị ụ wụ ẹngụ awụ tụra ịrẹsụ ẹkẹhị oyisì. Sị ịrẹyọyẹ va ahụ vị ịrẹma.

⁵Ẹkẹhị ọ zụ ta ịnị abọnya-abọnya. Ẹkẹhị vị onozwọọhịmị. Óo hira anka inomi anaā hị́ ọkasịmẹ avọọ nị.

⁶Asị ụ rị ịsa eneyiche. Asị eyi awụ ya ịnị ịsa ozoza anị.

⁷Eneyiche àaa hị́ wụ ka wa va rị ịsa, ẹ yị sị ayị ọnyara hị́ wụ. Ịsị ẹ ya ịnị ayị anị vị irenyi.

⁸Ịsa ọnị wa rị ịzọọ vị ọnị ụ vaa hẹrẹ, dị avọ ọnị ụ kụ ọ vị ịhị kẹnẹ.

⁹Asị ụ ka ịrẹyị yị ọnụra agụvị ka eyi anị e yi hweyi tu ịrẹyị ọnị waa ka.

¹⁰Asị ụ tụ̀ ịsa ọnị ohiku sị tọ ẹtẹ ẹhwị, dị asị ụ dọ ezi-oku nịnị ẹtẹ.

¹¹Ẹnẹyịmavara ọ vị ọnụkata anaa vụ̀ ịrẹvụ ẹnịnị nị. Ọ vaa jẹẹ yị wa.

¹²Sị ayị tụ ịrẹyị ana aa ka yị wụ, dị ụ wa sị ụtọ pe ịrẹyị ịrẹyọyẹ ọnị waa wụ́.

¹³Asị ụ yi ka wẹ yị pa ozi ewu, inori ene e tu ozi ọ mā wụ ọ.

¹⁴Wee tụ́ ọ, ẹhẹ anị u tenyi yị ọ nị. Ịrẹyị ẹwụrẹna.

¹⁵Ozi emi, wàa yẹ ịrẹyị ayị amị vị ene e hine ẹtẹẹtẹrẹ.

¹⁶Waa ka ịrẹyọyẹ, dị maa sị wụ mẹ̀ eyi.

¹⁷Asị ẹhẹ aza ọhịmị vá wụ, ama wee hí angwa Ẹnẹyịmavara ịnị ụmẹ tụra ụmẹ.

¹⁸Wàa vavọọ aa mẹ̀ wẹ yị vaa sụ ụmayịyẹ. Ịrẹyị ana tụ ọ ẹwụrẹhị.

¹⁹Ozi emi, sị ụtọ pe mé, dị ụ wa nyị ịrẹyọyẹ ọnị ụ vaa sị mẹ̀ ẹhẹ awụ.

²⁰Asị ụ zị ògù ohweche nịnị ọnịrị ọnọhọha nịnị.

²¹Ohweche ọnịrị ọnọhọha nịnị vị ene vee re osiye. Ọza ana ahịka ụkọrọ ịsọyịrị ọnịrị ara ọyị sụ kẹnẹ ọọ̄ mẹ̀ nị vị ọnị ịtaa anị bó hi ẹngụ.

²²Wụ ịrẹyị ada awụ ana ma wụ, dị ụ waa tẹsị ọnyị awụ ịjị ọ̀ọ sị vịra.

²³Asị ụ zẹ ka ịzẹyịza ọnịrị ịrẹyọyẹ ọ jị ụ ha, sị ụvọ za ịrẹyị ana a sị zụ wụ, dị eyi awụ o hweyi.

²⁴Ozi àa mẹ̀ ebira ẹtẹẹrẹ ada anị vị anaa jẹ. Ọza ana ma ozi ana yẹ ịrẹyị vị ọnị ayị anị hine.

²⁵Waa mẹ̀ ebira ana vaa sị ayị ada awụ ọnịrị ọnyị awụ hine. Ayị ọnyị awụ oo hine pooro. Ịrẹyị ana tụ ọ ẹwụrẹhịmba.

²⁶Ozi emi, sị eyi pe mi, waa saasa ahụ ọnị mèe hu.

²⁷Ọsẹrẹka vị ana sị mẹ̀ anka ịrẹpa odivi avọọ. Ayị ịbẹhị vị ana nyịnẹ anka ikangga ana nyịnẹ avọọ.

²⁸Ẹnịnị vị eneē zi ọza anka anako nịnị avọọ. Ẹnịnị ẹ mẹ̀ ka asị anọrụ ọrụrụ-ọrụrụ mẹ ịzẹyịza ka ese ẹnịnị na nị. Ịrẹyị ana tụ ọ ẹwụrẹhịnta.

²⁹Ẹnẹẹ̄ nyị ẹngụkata ụmẹ tụra ụmẹ? Ẹnẹ nyị ayodu? Ẹnaa zyaazị? Ẹnaa rị uhuhu? Ẹnẹẹ̄ tọ ụnava ọnị ẹ yị yẹ? Ẹnẹẹ̄ eyi anịị ee vi?

³⁰Ọza eneē hu eche ahaahara, eneē hu eche irenyi-irenyi vabẹ.

³¹Sị eyi hụụnị eche èe vi, di e che mịnịmịnị, dị aa rọ china ịnị ọrọkọ awụ ẹngwọọrọ-ẹngwọọrọ nị.

³²Ọ vavẹ ịrẹma anị vaa zàmà wụ anka ẹchịpa ẹ́wụ́ odivi, anka ụ̀hị̀ avọọ.

³³Eche vị ana sị ohweche re ẹtẹ ọzọga-ọzọga, dị a ka ịsị ee tu ọ irenu kẹnẹ.

³⁴Vị ọ sị mẹ̀ ẹ anka ọza anaa hụtụ ịnị akakana oku avọọ nị. Dị ọ sị mẹ anka ọza ana gẹnẹ oregerege ọchị ẹpinenyi avọọ nị.

³⁵Ohweche kà, â nya mị ịsa ọ yị zị mị. Ê tú mị, mẹ yị hyakụ yẹ. Ịjị maa ha, di me ne hú eche ọsa kẹ.