Read ebira Ụhịrẹyị 24 Bible Online

Ụhịrẹyị 24 - ebira bible

Ụhịrẹyị 24

¹Asị ụ va ụva ebira aza edivi, dị asị u re beri wa zị ògù

²Ẹ mẹmẹ vaa kụ ẹngụkata hi ẹtẹ kẹnẹ e yee ro nị. Irenu ẹnịnị ọ mā ka ọyịza.

³Ịrẹyọyẹ ọzaa sị tenyi irehi anị dị ọ jẹẹ nị.

⁴Ịrẹyọyẹ ọzaa sị kụ ogu ọkatarihi ozoza-ozoza hi ini eehi anị nị. Ịrẹyị ana tụ ọ ohurọnya.

⁵Ọyẹrẹyọyẹ ọ nyị ụkata huna ọnụkata nị. Ịrẹyọyẹ o huna ụkata ọchẹngụ nị.

⁶Eto ịrẹyọyẹ ọza sịị nọ ịrẹkụ nị. Anajuwe ọrụrụ ọọ sị ọza rị ịrẹkụ.

⁷Ọnụra ẹ yị yẹ ẹhahi ịrẹyị ịrẹyọyẹ. Ẹ yị nyayịnẹ há irenu ịzị àa kà ịrẹyị obooro.

⁸Ọza anaā mẹ̀ aro ka ọnị ọ mẹ̀ odivi vị ana a vaa hị́ ọmọzakụyẹ.

⁹Avaba eto ọnị ọnụra aa mẹ̀ vị ọhịmị. Aza vị anaā nyị ịhyẹrẹ ọza anaa sị ọzaa mẹ enyinyi.

¹⁰Wàa và ẹngụ hi ẹtẹ ịnị ụmẹ ẹngụkata, ọkụmị ụ vị avọọ nị.

¹¹Asị ụ kana eyi ịrẹma dị waa dọ ọza ana a ka a sị irikiti wụ̀ tịtẹ.

¹²Asị ụ kà a ka ẹ yị nyị awụ rị ịnị anị agụvị ka Ohomorihi ọ yẹ ayị́ ọzọza, di e re ọzọza nị. O vee sí ọzọza atọ ịsị ọnị ọ̀ mẹ̀.

¹³Ozi emi, rèé ẹhụ ka o zoza, enyi anị anaā wọ̀rọ́ hụụnị ụpaha anị o hine ẹtẹẹtẹrẹ.

¹⁴Avọọ ịrẹyọyẹ mẹẹ̄ hine nị. Re ka waa nyị ịrẹyọyẹ agụvị ụhwọọ awụ o zoza, dị asị ụ sụ́ ụmayịyẹ.

¹⁵Asị ụ hama ọza ọhịmị ene e ne zi ọnịzẹyịza, dị ọ sị àkó dọ ọ avaba ịsa ọnị ọ nyị.

¹⁶Ọnịzẹyịza ọ̀ọ hyẹdụ pooro, ọ vaa kwẹẹtẹ ama akanya vi ene vee vu ọza ọhịmị ẹtẹ.

¹⁷Asị ụ jẹ ka ịrẹyị odivi o tu ọnịvị awụ. Asị ayị awụ hine ka ọ tụ́ ahụ.

¹⁸Wàa jẹ ka odivi ó tu ọnịvị awụ, ayị Ẹnẹyịmavara vi ene du, dị ọ va ị́rẹma awụ, dị ọ yị kụkụ sị ụya rị ọnịvị awụ ẹnẹẹ.

¹⁹Asị ịrẹyị aza ọhịmị kata wụ ẹngụ. Asị ụ kụ ịhị ebira odivi ẹnịnị.

²⁰Aza ọhịmị ẹ yị nyị ẹhẹ ịrẹma. Ẹ yị jẹẹ dị ịra ẹnịnị ọ mi.

²¹Ozi emi, nyị angwahi Ẹnẹyịmavara ọnịrị ohinọyị. Asị ụ zị ògù aza anaa mẹ̀ akamawụ hị́ wa.

²²Asigiri ọ zụ tu wa obonobono. Ẹnẹ yẹ ẹngụ asigiri ọnị Ohomorihi a vị ohinọyị vaa kụ́ tu wa.

²³Ọyẹrẹyị ộ kà ịrẹyị ẹnẹnị nị: Ẹ yị zoza ka ọza ọọ̄ mẹ̀ ọkarẹyị irikiti.

²⁴Ọza anaa jị ịhị yị ọza odivi vị ọnị aza vee chi hi, dị avaba aza nyị ịhyẹrẹ anị.

²⁵Ama o vee zee yị ọmọkarẹyị nịnị anaā jị ịvị yị ọza ana mẹ̀ odivi nị. Ẹ yaa rị aha ebira ọyịza ẹnịnị.

²⁶Ọza ana sị ịzẹyịza tụ ohi ịrẹyị vị ana aa sị zụ ka ọta obooro ọnị vị nị.

²⁷Tenyi ẹtẹ tịtẹ daa, di we vee chire ịsa tụ ọ, dị wa vaa da irehi.

²⁸Asị ụ da ku ọza ọnị ẹ yị nyị ịsị ọ mẹ̀. Asị ụ rẹẹ̄ kà ịrẹyị ọnị eyi awụ e yi tu.

²⁹Asị ụ kà a ka wee si atọ ịsị ọza mẹ wụ; Ịsa ọza ọ̀ọ sị mẹ wụ, ẹwụ raa sị mẹ̀ ẹ nị.

³⁰Maa para aarẹ ọnịrị ụbazị ịvayịnị onuworo ẹnẹ ẹ yẹ ịrẹyị hu.

³¹Avị ọnịrị igegenechi vị ana za avaba ịsa ịnị aarẹ anị rị. Ọvọ ịrẹta ọnị ọ jị kara ụbazị anị e ku wu va hi ẹtẹ.

³²Mmi mê re e, di mi ro o, dị mị kọsẹ ịrẹyọyẹ hụụnị anị nị.

³³Onuworo ọọ sụ aara chee, dị ọọ hiine aara chee, dị ọ sị ụmẹ ana vọ jị ụvọ za ẹngụ.

³⁴Osiye vị ana vaa ngụ tu ọ anka anako mẹẹ̄ ngụ tu ọza, dị avaba ịsa ọnị ọ nyị ta avọọ.