Read ebira Ụhịrẹyị 26 Bible Online

Ụhịrẹyị 26 - ebira bible

Ụhịrẹyị 26

¹Ọza anaa ga ọnụra vị ene nyeeyi anka orihi anaa zụ ịnị ọhahị avọọ.

²Ozirenu ọnị ọza ẹ yị mẹ̀ ịrẹyị anị vị enee che oze parahu anka inomi enee hira zịịzị avọọ.

³Ọnụra vị ene tụ́ dị ọ wụ́ ịrẹyị, anka ịjapa ọnịrị enyusẹ mee mẹ̀ ka umaata ọnịrị ịkẹrịkẹtẹ ọ saasa ịsị aa ka avọọ.

⁴Asị ụ tụ́ ọnụra ohi ịrẹyị ka ẹwụrị ọ vaa sị vị ọnyọọnya.

⁵Va ohi ịrẹyị yị ọnụra dị ọ yẹ́ ka ọnị ọ yị yẹ ịrẹyị anka o mẹ rò.

⁶Ọza anaa tụ́ ọnụra ụtụ sị mẹẹ anka ọjavụ ana hị́ akanya tu ẹngụ anị avọọ nị.

⁷Ụhịrẹyị ọnị ọnụra e che sị mẹ anka oswahụ ẹnẹ ẹ zụ zị ụsẹ avọọ nị.

⁸Ọza anaa ga ọnụra sị mẹ anka ọza ana sụ ịrẹta za ọnanta avọọ nị.

⁹Ọnụra enee che ụhịrẹyị sị mẹ anka ohweche enee si ka ọnị tụ̀ ikeyi ene tura hi ọ ụvọ avọọ nị.

¹⁰Ọza anaa dọ ọnụra ọnị o re ụkọrọ vị anaa tọ aza ana vọ ụnava.

¹¹Ọnụra anaa vàa tụra ịsa ọnị ọ mẹ sị mẹẹ anka irezi ana varẹma nee rèé ahẹrẹ anị avọọ nị.

¹²Ọnụra ọ dahi huu ọza ẹnẹẹ yị yẹ ịrẹyị ene ro ka ọnị ọ yẹ ịrẹyị nị.

¹³Onuworo ọọ̄ kà a ka idu ya oze e zi ọnị nị.

¹⁴Onuworo vị anaa vara ịrẹsụ ode anị anka ukere mee jesi ịnị ẹza anị avọọ.

¹⁵Onuworo ọọ jị ụvọ ngụ ẹnya, ẹ yị zụ sị ọ nọ irenu.

¹⁶Onuworo vi ene ro ka ọnị ọ yẹ ịrẹyị huu aza ana vọ nị.

¹⁷Ọza ene ji na ngụ ịrẹyị ọnịrẹyị sị mẹ anka ọza ene ne tụra irezi ọzọga ụtọ avọọ nị.

¹⁸Anka ọnụra mẹẹ ne ịsị ịrịra a vị ịsị ụnava hi ọza avọọ.

¹⁹Avọọ ọza enee vene ọnọhụva anị ka ọnị ee pe e mẹ̀ aahẹ nị.

²⁰Ẹ yị nyị ọkụ ịra vị ene mi, avọọ ẹ ị mẹ nyị ireche, aza ẹ yị naa zyaazị.

²¹Aka vị ana sị akịna hịrẹ ọkụ mẹẹ sị ịra za, avọọ ọnịrẹyị mẹẹ kụ ịrazị hi ẹtẹ nị.

²²Ireche o hine anka ẹkasị ịsa ozoza ana a va ọza ka ọnị ọ mụnẹ avọọ.

²³Ọza anaa sị odivi tụ́ ịnị ịnẹ aa ka ohine-ohine sị mẹẹ anka ọda enee si ku ụnọkọ anaa jị avọọ nị.

²⁴Ọnịvị ọza vị anaā sịị ayamụkụ tụ ịnị ịnẹ dị a kà ọsa.

²⁵Aa ka hworo-hworo, asị ụ dọ ọ wụ agụvị ka ịrẹyị ọhịmị vị enee chi ọ ẹngụ.

²⁶Ọọ daka jị oku ku ayamụkụ anị, ọzọza vee re ebira odivi anị ịjị ụmẹ òo tu.

²⁷Ọza anaā va ịrẹpa zi ọza ọ́ vaa za nị. Ịsa ọnị ọ sị yị ọza o vee re nị.

²⁸Ọza ọnị ọza e yi sì ịrẹyị anị oo cheeche ku ka ọ̀ọ zị ọ nị. Ireche vi ene du ọza.