Read ebira Ụhịrẹyị 28 Bible Online

Ụhịrẹyị 28 - ebira bible

Ụhịrẹyị 28

¹Ọza ọhịmị ọọ̄ mẹ̀ ụha za gigiri nị, ama ayị ọnịzẹyịza vị ana vị́ anka ẹzụ avọọ.

²Anẹkụra àa mẹ akamawụ, aza irenyi-irenyi ẹẹ mẹ̀ ịjọva tụra wa ịrẹsụ nị. Ama ọdọvịdị ana yẹ ịrẹyị oō tenyi ẹkụra, dị a nyị ẹngwọọrọ tu ẹtẹ nị.

³Ọ́dọvịdị anaā mẹ̀ ẹvayaa yị onosiye nịnị sị mẹ anka orihi ene du ịsa ịnị aarẹ ha avọọ nị.

⁴Aza ẹnẹ ẹ yị saasa ọda Ẹnẹyịmavara vị anaa tụ́ aza ọhịmị ụka. Ama aza anaa saasa ọda anị vị ana va eyi ịrazị ka aza ọhịmị.

⁵Aza ọhịmị ẹ yị yẹ ịsị ẹ vị ịzẹyịza, ama aza anaa yẹ Ẹnẹyịmavara ẹ yẹ tu ẹtẹ nị.

⁶Onosiye anaa mẹ̀ ịzẹyịza o dahi hu ọnyẹkẹhị anaa mẹ̀ asuvu nị.

⁷Aza anaa sị ụvọ za ọda Ẹnẹyịmavara ẹ vị ezi ana yẹ ịrẹyị nị. Ama ọza anaa zị ògù ọnọhọha vị anaa mẹ̀ ụhị nyị aza ana ma a.

⁸Ọza anaa dọ ọtụrarẹsụ ẹkẹhị erere agụvị ọnị ọ nyị ẹkẹhị hu avọọ, ọ yị vaa sị mẹ̀ ẹhẹ. Áa kụ ẹkẹhị ọnọọ gụ zi ọzẹnẹsa ana vaa vayị onuruwa nịnị.

⁹Ẹnẹyịmavara ọ nyị ịhyẹrẹ aduwa ọza ọnị ẹ yị saasa ọda anị.

¹⁰Aza enee vene ọnịzẹyịza ka ọ mẹ̀ ebira odivi vị ana vaa hyẹdụ ngụ ịrẹpa ọnị ọ va, ama ọnịzẹyịza vị ọnị o vee zee yị.

¹¹Ọnyẹkẹhị nịnị vị ene ro ka ẹnị ẹ nyị ịrẹyọyẹ, ama onosiye ọnị eyi anị hweyi ọ́ọ yẹ iruvo anị.

¹²Ọnịzẹyịza ọ̀ọ ya udi, dị ọzọza aa jẹ ama ọza ọhịmị ọ̀ọ ya udi, dị ọzọza ee zwee tẹ.

¹³Ẹ yị ve zoza yị ọza anaa jị oku ku ịvị anị, ama ọza anaa dọ irenu ịvị anị dị ọ va hụụnị anị, vị ọnị Ẹnẹyịmavaraā vayị anị.

¹⁴Ịrẹsụ ọyịza ọ vị yị ọza ene hí angwa Ẹnẹyịmavara nị ama Anakamawụ vi ene vee vu.

¹⁵Ọdọvịdị odivi vị eneē chire onosiye nịnị angwa anka idu à vị ọdụmị anaa tụra ka uye naa avọọ.

¹⁶Ọdọvịdị ẹnẹẹ yị yẹ ịrẹyị vị ana a chamayị yị onosiye nịnị ama ọza ọnị ẹ mā dọ ọza mẹ anị vị eneē ku orubo.

¹⁷Ayị ọza ana wụ̀ ọza ọ yị vaa nẹtẹ, ọ vaa doodo zị pooro dị o su nị. Asị a nyị ọza ana gụ ọ ụvọ.

¹⁸Ọza anaā mẹ̀ ịzẹyịza vị ana vaa há ama ọza ọnị ẹ mā mẹ̀ ịzẹyịza vi ene vee su usu asigiri.

¹⁹Ọgẹrẹva ana ha ẹngụ ta kụ ụrụkụ vị anaā rị ịsa vọọ ku, ama ọza anaā nyị uworo vị ọnị iruwa zá.

²⁰Ọnịzẹyịza vị ọnị óo zee yị, ama ọza anaā dụ ẹkẹhị ịjịjọọ vị ana vaa rị ụya anị.

²¹E yi zoza ka ọza ọọ̄ nyị ọza re eyi, ama aza ẹnyị vị anaa mẹ̀ ebira odivi agụvị ịsa chee ọnị o vee re dọ.

²²Eneyiche nịnị vị anaā ha eyi ka ẹnị ẹ hụra nyị ẹkẹhị, dị asị ẹ yị yẹ ka osiye aa za a ịrẹsụ yị ẹnị nị.

²³Ọza anaa tụ ọza ohuvọ aa zụ varẹma sì ịrẹyị anị huni ọza enee vene ọza nị.

²⁴Ọza ene ro ka ọnị ọ̀ọ kụ ẹnya aza ana ma ọnị ka ọ yị divi vi oyi obooro-obooro.

²⁵Ọnọhọha vị anaa kụ ịrẹyị hi ẹtẹ ama ọza ana sị ayị tụra Ẹnẹyịmavara vị ọnị o vee zee yị.

²⁶Ọnụra kẹnẹ o ro ka ọnị ọ hụ ẹngụ anị nị, ama ọza ana mẹ̀ ịrẹyọyẹ ọ vaa ha nị.

²⁷Ịsa ẹ yị vaa zwọ ọza anaā sịị ịsa yị onosiye ama ọza anaa sị eyi jịnẹ ẹ vị ana vaa dọ ozirenu ọrụrụ-ọrụrụ.

²⁸Ọza ọhịmị ọ̀ọ ya udi, vị ọzọza aa tẹ yị ọ nị, ama ọ̀ọ sị hụrẹ udi dị aza ọyịza aa sị ụmẹẹ tụ ọvịdị.