Read ebira Ụhịrẹyị 3 Bible Online

Ụhịrẹyị 3 - ebira bible

Ụhịrẹyị 3

¹Ozi emi, asị u hi ayị ịrẹyị ọnị mị kà yị wụ. Waa sị̀ ịrẹyị ẹnẹẹ vị ebira mẹ ụmẹ tụra ụmẹ.

²Ịrẹyị ẹnẹẹ vaa sị wụ ku orubo, dị ẹhẹ awụ zee yị wụ.

³Saasa ịrẹyị ẹnẹẹ, dị ọza ọ̀ zụ sị ayị tụra wụ. Sị ụvọ za a anka ọmọ ọnị aa sị tụ ọrọkọ avọọ. Asị ụ hi ayị anị.

⁴Wàa vavọọ aa mẹ, ayị Ohomorihi ọnịrị aza vee hine tu wu, dị ụ nyị ụbanyị.

⁵Sị avaba ayị awụ tụra Ẹnẹyịmavara, asị ụ sị eyi tụra ẹngụ awụ.

⁶Tamayị Ẹnẹyịmavara ịnị ịsa tụra ịsa ọnị waa mẹ̀, ọ vaa sị oze zụ wụ.

⁷Asị u ro ka eyi awụ o hweyi, ama dọ ịrẹyị Ẹnẹyịmavara tụ ịzọọ, dị ụ waa nyị ịhyẹrẹ ebira odivi.

⁸Wàa vavọọ aa mẹ̀, ọ vaa rọ wụ ẹngụ, dị ụ nyị ẹngwọnịya.

⁹Sị ogu awụ ọnịrị avaba ịsa ịnị aarẹ ịpaapa awụ va sị ụbanyị yị Ẹnẹyịmavara.

¹⁰Wàa vavọọ a mẹ, ịsa ịnị aarẹ va mẹ ẹtẹẹtẹrẹ, dị ụhwọ awụ hi yị ịsa, dị ụ nyị eche gwẹẹtẹ ọnị we yi re aha va wa hi.

¹¹Ozi emi, asị ụ sị eyi wụ̀ ohuvọ ọnị Ẹnẹyịmavara ọọ tụ wụ, dị asị ọ tụ wụ.

¹²Aza ọnị Ẹnẹyịmavara sì ịrẹyị anị oō tụ ohuvọ anka ada ọza mẹẹ̄ tụ ozi anị ohuvọ avọọ.

¹³Aza ana nyị ịrẹyọyẹ, dị eyi ẹnịnị hweyi vaa daa jẹ.

¹⁴Ịrẹyọyẹ ọ nyị ụbanyị hụụnị ẹkẹhị nị. Ọọ̄ mẹ̀ ka a sị ụbanyị yị ọza hụụnị ọza ana nyị igooru.

¹⁵Ịrẹyọyẹ ọ nyị ụbanyị hụụnị ọmọ nị, ẹ yị nyị ịsa ọnị ọza nyẹngụ sị juwe anị.

¹⁶Ịrẹyọyẹ vị ana a sị ọza ku orubo, dị ọ nyị ẹkẹhị ọnịrị ụbanyị.

¹⁷Ịrẹyọyẹ vị anaa mẹ̀ ẹhẹ hine ọza, dị ọ sị ayị ọza nẹtẹ.

¹⁸Ịrẹyọyẹ vị anaā sị ọza kụ orubo. Ọza ana nyị ọ vaa daa jẹ.

¹⁹Ẹnẹyịmavara vị ana sị ịrẹyọyẹ anị mẹ̀ ẹtẹ; Avọọ ọ mẹẹ sị ịrẹyọyẹ sị ẹbẹẹba tụ aha anị nị.

²⁰Dị ọ mẹ̀ ka enyi ọ tụ hụụnị ẹtẹ, dị ọ gara hi ịnị ẹhẹ, dị ihinẹba ọ zụ orihi nị.

²¹Ozi emi sị ụvọ za ịrẹyọyẹ awụ. Asị u ne e ta.

²²Ịrẹyọyẹ vaa mẹ̀ ẹhẹ hine dị ọ rọ wu ẹngụ, dị ọ̀ mẹ ọza ku orubo.

²³Dị ụ mẹ ẹhẹ awụ hara, dị wẹ yị tụ ahụ.

²⁴Wàa yaayịtẹ angwa e yi vee hi wụ; wàa hụtẹtẹ ara ọyịza-ọyịza ụ vaa sụ̀ nị.

²⁵Ẹ yị nyị ka wee hí angwa asigiri eneē tu aza ọhịmị anka opomi avọọ.

²⁶Ẹnẹyịmavara vee sere wụ. Ọ yị vaa zẹ ka a nyị ịsị ẹ mẹ̀ wụ.

²⁷Asị u yi ka wẹ yị mẹ ọgụvọ yị ọza ọnị ọ vọrọ tụra wàa nyị ụkata ọyị mẹ̀ ẹ yọ.

²⁸Asị ụ za ọnọhụva awụ eyi tura ẹtẹ ka ọ na dị ọ vavẹ ụhwọ ịrẹma ọnị ụ nyị ịsa ene e sì rị ụvọ.

²⁹Asị ụ mẹ̀ eto odivi ana vaa kụ ẹngụkata tu ọnọhụva awụ ana sị ayị tụra wụ ọnị ẹwụrị ọ ra vabẹ.

³⁰Asị ẹwụrị ọza zyaazị kẹnẹ-kẹnẹ ịrẹma ọnị ẹ yị nyị ịsa ọnị ọ mẹ wụ.

³¹Asị ụ kụ ụhị ọza anaā mẹ̀ ezigi. Asị ụ hama a mẹ̀ ebira ana a mẹ̀.

³²Ẹnẹyịmavara ọ nyị ịhyẹrẹ ọza ana mẹ̀ ebira odivi, ama ọọ̄ sị ayị tụra ọnịrẹyịzẹyịza.

³³Ozirenu Ẹnẹyịmavara va ya ịrẹsụ ovwoovu ọza odivi ama ọọ̄ mẹ̀ ka o zee yị ọza ana mẹ̀ ọyịza nị.

³⁴Ẹnẹyịmavara vị eneē nyị onisiya nịnị unyi, ama ọọ̄ vayị ọza tụra ọza ana sị ịrẹsụ nọ ẹtẹ yị ọ.

³⁵Aza ana yẹ ịrẹyị vị ana aā ga, ama ọnụra vị ọnị aā mẹ̀ ụhị nyị.