Read ebira Ịrẹyị Ọzwọzịsa 10 Bible Online

Ịrẹyị Ọzwọzịsa 10 - ebira bible

Ịrẹyị Ọzwọzịsa 10

¹Waa yẹ ka, ịsị oo su va hi ịnị eturare, ọ zụ mẹ ka ọ̀ọ da agụ odivi avọọ ọza ọọ mẹ mẹ ụra kiiki aanị, dị ọ mẹ ka asị eyi wụ ọnịrị ịrẹyọyẹ anị beri ụbanyị anị nị.

²Ọza ana yẹ ịrẹyị vị ana ayị anị mẹ ka ọọ̄ mẹ̀ ebira ana vọrọ; ama ọnụra vị anaā mẹ akụvị.

³Ọnụra ọ̀ọ va tụra oze vị anaa mịị mẹ ụra, ọnị aa sịị zụ avaba ọza ka ọnụra obooro ọnị vị nị.

⁴Ohinọyị aa kụ ayị hi wụ, asị ụ hụrị ịzị ụ yà, wàa zaku hẹẹ, ọ zụ mẹ ka ọ̀ sị eyi hụụnị avaba akụvị ọnị ụ mẹ.

⁵Ọzwọzịsa ka aa nyị akụvị ẹnyị ọnị ọdọvịdị nịnị aa mẹ ịnị ẹhẹ ọnọnị.

⁶Ẹyaa kụ ọnụra nịnị hi udi obooro booro, dị ẹ navọ aza obooro hi ẹtẹ.

⁷Ọ kà ọnị ô re ọrịhị anaa tụra umaata, dị ezi ohinọyị aa sị ahụụ zị nị.

⁸Ọza anaa chị ụsị ọ vee horo ngụ ọ nị. Ọza anaa jị ugene roo ẹ́wụ́ ọ zụ jị ọ ịrẹrụ.

⁹Ọza tụra ọza anaaa há ịrẹta, ịrẹta ọ zụ tọ ọ ụnava; ọza ụra ọza anaaa há ọkụ, ọkụ ọ zụ tọ ọ ụnava.

¹⁰Ịraga awụ ọ̀ọ usu di wèe ne nị, ẹhị vee tu wu dị waa va zụ sị mẹ̀ ụkọrọ awụ; ama ọza ọọ sị ọbọ tụ ịnị ịrẹyị anị, vị ee re mẹ nị.

¹¹Ẹ́wụ́ ọ sị ọza jị ịrẹrụ dị a va sị irere vẹ nị, ọgụ sẹ kụkụ ya ịnị irere ọnọọ.

¹²Ịrẹyị irenu ọza ana yẹ ịrẹyị vị anaā mẹ ka à sị ụbanyị yọ, ama ọnụra vị anaā sịị irenu anị kụ ẹngụkataa tu ẹngụ anị.

¹³Ọnụra vị anaā sịị ụraa nyima ịrẹyị ọyị kà, ịrẹyị ọnị ọọ ka vị anaā kụ ịsa odivii hi ẹtẹ.

¹⁴Ọnụra vị anaā kụ ịrẹka tuturutu kẹnẹ. Ẹ yị nyị ọza ana yẹ ịsị aa vẹ ẹnẹ zụ ka yọ ịsị ẹ vaa mẹ ịrẹma anị kẹ?

¹⁵Ọnụra kẹnẹ ọọ mẹ̀ ụkọrọ pooro di ẹ yị kụkụ yẹ oze varẹma nọ eehi oo mẹ chi ọ ẹngụ tịtẹ nị.

¹⁶Ẹkụra anaa sị ozweyi mẹ ohinọyị anị dị ahịka vị ọdọvịdị ẹnịnịị rị ịsa pooro kẹnẹ nị, ẹ sị da.

¹⁷Ẹkụra ọnị ohinọyị anị ọ̀ọ vị ozi ọza obooro, dị ọdọvịdị ẹnịnịị rị ịsa ịnị ụmẹ ana vọrọ nị ka nị, ẹ̀ nyarị ịrẹsụ ọyịza.

¹⁸Ọza ọọ sị vị onuworo dị ẹ yị zụ tenyi irehi anị nị, ịsị e si ku irehi anị vị enee chì di ee nu ku ọ ịrẹsụ.

¹⁹Ịsa ọyịrị vị ana ka ọza ọọ rị jẹ ịrajẹ; eche vị ana ka ọza oo hu dị ịnẹ anị ò hine, ama ẹkẹhị a sịị mẹ avaba ẹsẹnị nị.

²⁰Asị ụ ne were kụ ohinọyị ụhụ tụ ịnị ịnẹ, asị ụ yà aha ọyị sụ awụ kụ ọza ọbanyị ụhụ, agụvị ka avị ọọ nyị ụtọ.