Read ebira Ịrẹyị Ọzwọzịsa 11 Bible Online

Ịrẹyị Ọzwọzịsa 11 - ebira bible

Ịrẹyị Ọzwọzịsa 11

¹Waa mẹ ẹyịza ụmẹzụ-ụmẹzụ, óo kukuku ẹyịza awụ vaa va ụhị vàa ka awụ vẹ.

²Re ka waa gà ẹyịza awụ tu aza ọrụrụ-ọrụrụ agụvị ka we yị yẹ ịrẹyị odivi anaa vẹ ọvịdị.

³Orihi òo ka eyi vị ọọ zụ̀ nị.

⁴Wàa jẹ ee zi ụmẹ ene zoza hu, ẹ yị yaa nyị ịsị waa mẹ.

⁵Ohomorihi ọọ mẹ avaba ịsa nị, ọza ẹ yị zụ yẹ iruvo Anị anka ọza ẹ̀ yị mẹ zụ yẹ ụparị ana ahịị vàa tụra à vị ozi mẹ mẹẹ vịra ịnị ịnẹ ọnyẹnẹẹ avọọ.

⁶Waa sị avaba ụmẹẹ chire ịsa irenyi-irenyi agụvị ka wẹ yị yẹ ana vaa mẹ. Wẹ yị yẹ avị avaba anị ọ vaa mẹ ẹtẹẹrẹ nị à vị ẹnyị ọ vaa mẹẹ huna ọsa nị.

⁷Etohweyi oo zoza ọza òo zụ re e.

⁸Navọ ọpa ẹkụhị ọnị ọza ọ̀ọ nyị ọ̀ yị mẹ ịnị ẹhẹ oo hine ẹngụ anị ayị, ọ̀ọ daka ku orubo pooro. Ama ọ̀ tamayị ka ẹkụhị iswọọza aa vẹ, ọ vaa gọdọ. Avaba ịsị aa vẹ vị osusu kẹnẹ.

⁹Ẹwụ ọpa ozweyi, waa jẹ. Ụmẹ yị vị ozweyi aanị ayị awụ oo hine. Avaba ịsị ayị awụ oo sị kẹnẹ ọnị u si ka wàa mẹ, waa mẹ̀ ẹ. Ama tamayị ka ụ va naa ka enube avaba ịsị ụ waa mẹ yị Ohomorihi.

¹⁰Avọọ, hụụnị ariro, dị asị ụ re du ẹngụ awụ ayị; ka ụmẹ ozweyi ọza ọnịrị ẹnẹnẹ ẹhẹ ọza vị vị osusu kẹnẹ.