Read ebira Ịrẹyị Ọzwọzịsa 12 Bible Online

Ịrẹyị Ọzwọzịsa 12 - ebira bible

Ịrẹyị Ọzwọzịsa 12

¹Tamayị ọza ana tụ wụ vẹ ẹhẹ ịnị ụmẹ ozweyi awụ, dị unobo ọ̀ vaa vẹ, ụmẹ ọnị ụ kụkụ vaa kà a ka ẹhẹ ọ sị du wu eyi.

²Ịjị wee si bo ọnị we yị kuku ve zuu re ọyị anaa ha ọnịrị ụhwẹ beri ụzọmị ana aa za ẹtẹ. Ịjọnọọ wa sị eyi guu.

³Ịjọnọọ dị ụvọ ọnị we sii sere ẹngụ awụ kụkụ aà da ẹgahị, dị ahụ awụ ana jẹ barịbarị aanị kụ tụ ọkụmị. Ịjị anyị ọọ sị tụ ikonyi ikonya hi u irenu dị wẹ yị kụkụ zụ tọ́ ịsa nị. Eyi awụ sị mẹ wura-wura dị we yị kụkụ re ẹtẹ ẹtẹẹrẹ.

⁴Aa kụkụ aa kụ ịrẹka ịnị ubooro wẹ yị kụkụ wụ. Àaa kụ ịsa à vị ka àaa jị ahẹ ụ kụkụ vụrị-vụrị aa wụ nị, ama inomi oo na owu kẹnẹ aza sị ha kwẹẹtẹ.

⁵Ọ kụkụ vee hi u eyi ọyị hịrẹ ịzị ẹ nẹba ọnịrị ka wa zị ụsẹ vatụra oze. Ịjọnọọ ụ ta vị ẹwa-ẹwa, dị ụ kụkụ a vụrị ẹngụ awụ zị. Ẹ yị nyị ịsị e kuku ee zee wu eyi. Ịjị yee si hu aa nọ eehi ọdịrẹma, dị orere aa sụ ịrẹyị ịnị ubooro.

⁶Ẹba ana asị enyusẹ anaā hị́ isiriva mẹ vaa jị, dị ozotupa ana sị igooru mẹ hụrẹ dị ọọ chaka. Obo ana aa sịị dà enyi ịnị ịkangga vaa jị, dị ịsa odenyi gara và ha.

⁷A vaa sị ọchẹngụ ayị varẹma nee chire ẹtẹ, dị ụhwẹ ayị varẹma ka Ohomorihi ana sị yị na.

⁸Ọzwọzịsa ka, osusu ene huna osusu yị, avaba ẹhẹ vị osusu.

⁹Ka ọzwọzịsa ọnọnị ộ yẹ ịrẹyị, ịsị ọnị ọ yẹ, ộ kọ ọ yị aza. Ộ tọ̀ọ ụhịrẹyị gụ dị ọ sị ịzẹyịza zama wa re ka ẹ̀ẹ vị ịzẹyịza nị.

¹⁰Ọzwọzịsa ọnọnị ọọ sị vụrị ka ọnị ọọ yẹ ịrẹyị anaā sịị ayị ọzaa hunẹnẹ, ama avaba ịrẹyị ọnị ọ chẹrẹ vị ịzẹyịza.

¹¹Ịrẹyị ana aza ana yẹ ịrẹyị kà vị ana sị mẹẹ anka ọchị ọnị oseratẹmẹ nịnị aa sị zụ atẹmẹ nịnị oze, dị ụhịrẹyị ana aa tọ̀ọ vabẹ aanị sị mẹ̀ ẹ anka iso ana a kanyị hi ịsa ẹtẹẹtẹrẹ avọọ nị. Ohomorihi ọ sị wa yị nị. Ọnị ịnyara ọ vị oseratẹmẹ avaba ayị nị.

¹²Ozi emi, ịsị ee si huna ịrẹyị ẹnẹnị ụ sị ụvọ za ẹngụ awụ ịnị anị o. Aza ẹ yị vaa hụụnị iwe ọ̀ yị chẹrẹ, wẹ yị yara e sị ka wa yẹ avaba ịsa vị ee chi wụ ẹngụ nị.

¹³Ya sị avaba ịrẹyị wụ, ịsị aa sị za ịrẹyị ịrẹsụ yị. Hi angwa Ohomorihi, dị waa saasa ọda Anị, agụvị ka avaba ụkọrọ ọnị Ohomorihi sị yị ẹyị ọza ịnị ẹhẹ ọ vị ọnọọ nị.

¹⁴Ohomorihi vaa mẹ̀ ọkarẹyị yị tụ ịrẹsụ avaba ịsị yaa mẹ, ịsị ị mẹ ịnị ewere, ọ̀ọ vị ọyịza, ọ̀ọ vị odivi.