Read ebira Ịrẹyị Ọzwọzịsa 5 Bible Online

Ịrẹyị Ọzwọzịsa 5 - ebira bible

Ịrẹyị Ọzwọzịsa 5

¹Ọza aa nọ ịnị irehi Ohomorihi o sị eyi pe ẹngụ anị, ọ́ọ vana dahi ka ọza ọ ka gụrị Ohomorihi na kọsẹ huni ka ọ̀ naa mẹ̀ ịsọvọ anka onututu nịnị avọọ ọvịdị anị. Onututu ẹ yị yẹ ka ịsị odivi ẹnị aa mẹ nị.

²Sị ụvọ za irenu awụ, dị asị ụ hụra ka ịrẹyị ọvịdị Ohomorihi; Ohomorihi vị ana ya ẹbẹẹba dị ẹwụ ya ẹhẹ ọnọnị nị; agụvị avọọ asị ụ na kụ ịrẹka gigirigi ọvịdị anị.

³Ịrẹyị ọrụrụ ọyị rò mẹẹ mẹ ọza ra ụra, avọọ ịrẹka ọrụrụ ọ yị kụ mẹẹ sị ọza kà ụra nị.

⁴Waa ka a ka aa nyị ịsị ụ vaa mẹ yị Ohomorihi ụ hụra mẹ̀ ẹ; agụvị ka ayị Ohomorihi e me hine tu ọnụra nịnị. Mẹ ịsị waa ka a ka ụ vaa mẹ.

⁵Ọọ vana dahi ka asị ọza kà a ka aa nyị ịsị ọnị vaa mẹ huni ka ọ̀ kà a dị asị ọ mẹ̀ ẹ.

⁶Asị ụ zẹẹ ka ịrẹyị irenu awụ ọ sị ụ na mẹ ịvị. Asị ụ na kà a yị ọnụtụ Ohomorihi ana ya ịnị irehi Ohomorihi ka ụ nyeeyi ka aka ụ vaa mẹ̀ ịsa ọnọnị nị. Sị ẹ vẹ dị wee sì ka Ohomorihi ọ̀ hụ agụvị ịrẹyị irenu kụ ayị dị ò du avaba ịsị ụ sị ụvọ awụ mẹ ha.

⁷Osusu kẹnẹ ụra ọ yị ra ọnịrị ịrẹka ọrụrụ ọ yị kụ vị nị. Agụvị avọọ o hí angwa Ohomorihi.

⁸Asị o hi wu eyi wee re ka aa mẹ ẹvaya yị onosiye nịnị ịnị ẹkụra, dị ọza ẹ yị zẹẹ ka à mẹ ịzẹyịza ọnịrị ịsa ana vọrọ hi wa nị. Yẹ ka ọnụkọrọ ịjọva ọzọza vị ana nyị ọga ana sị eyi pe e. Avọọ a mẹ rẹ nyị ọga ene huna ẹnị ẹyịva ana sị eyi pe wa nị.

⁹Ohinọyị nyẹmba vị anaa za aza kụ ụrụkụ yị ẹngụ anị.

¹⁰Aza ene sì ịrẹyị ẹkẹhị ọnịrị ogu baaba ẹ maa nyị ana hụ wa. Osusu kẹnẹ ọsọnị vị nị.

¹¹Ogu ọza aa rụrụ, dị aza ana rị wa aa rụrụ saasa. Sị ẹ va vị ọgụ ọza ana nyị ogu ẹnẹẹ ẹ̀ yị vị ka oo re wa kẹnẹ.

¹²Aza anaa sị ẹhị ẹngụ ẹnịnị mẹ̀ ụkọrọ vị anaa sụ ara ohine ẹẹ rị ịsa baaba ẹẹ daka rị chee ama ogu ọza ọbanyị vị anaa jị ọ areyi dị ẹ yị zụ sụ ara.

¹³Ọzwọzịsa ka aa nyị ịrẹyị odivi ọnyara enee du ọza ayị ọnị ọnị re ịnị ẹhẹ ọnọnị: Ogu ọnị ọza kụ na tẹ̀ dị ọ varẹma vaa zama a.

¹⁴À vị ka ịrẹyị odivi ọ mẹ ka avaba ogu ọnị ọza nyị ọ̀ jị ọ ụvọ dị asị a nyị ịsị ẹ vọ ana vọrọ ka hụrẹ ụvọ tịtẹ yị ozi anị.

¹⁵Ahwaahụ ọnị ọza zị va ngụ ẹhẹ ọ rẹ vaa zị hụụnị anị nị. Ẹ yị nyị ịsị ọ vaa sị hụụnị avaba ịsị ọ sị ẹhị ẹngụ anị mẹ.

¹⁶Ịrẹyị odivi enee du ọza ayị ọsọnị ọnị rẹ vị nị. Ka ọza mẹ va ngụ ẹhẹ, avọọ ọ mẹ raa hụụnị anị nị. Ọgụ sị ọ va rị ịnị avaba ụkọrọ ọnị aa mẹ dị e yị nyị eyi tụ́ ụhwọ́ ka ọnị ọ̀ za ahị?

¹⁷Avaba ụmẹ ẹhẹ ọza vị ọnịrị ẹngụkata, ayodu, ẹngwọzị ọnịrị ọyịkụ.

¹⁸Dị ọnị va yẹ ka, ịsị e zoza hu ka ọza ọọ mẹ ịnị ẹhẹ ọ vị ka, ọọ rị ịsa, dị oo hú nị. A vọrọ ka ọza ọọ mẹ ẹngụ anị ayohine ịnị avaba ụkọrọ ọnị aa mẹ dị ẹ yị nyị eyi tụ́ ụhwọ́, ịnị ụmẹ chee ọnị Ohomorihi sị mẹ ẹyịza ịnị ẹhẹ nị.

¹⁹Ọza ọnị Ohomorihi ọọ sị ẹkẹhị ọnịrị ogu mẹ ẹyịza dị o si oze yọ ka ọ sịị mẹ ayohine nị ọọ jẹ. Ọ̀ sịị mẹ ayohine ka ọgụ ụkọrọ anị ọ vị ọnọọ nị. Ohomorihi ọ sị mẹ̀ ẹ ẹyịza nị.

²⁰Ọza ọnị Ohomorihi ọ maanị mẹ ayohine yị ẹ ma zụ hụra tamayị ịyẹẹyẹ dị oo du ayị.