Read ebira Ịrẹyị Ọzwọzịsa 6 Bible Online

Ịrẹyị Ọzwọzịsa 6 - ebira bible

Ịrẹyị Ọzwọzịsa 6

¹Ọzwọzịsa ka aa nyị ịrẹyị odivi ọsa anaa na ịnị ẹhẹ ọnị ọnị ree re.

²Ohomorihi ọọ mẹ ka ọza ọ̀ nyị ẹkẹhị ọnịrị ogu beri ụbanyị. Avaba ịsị ọza ọnọnị eè si kẹnẹ vi ọnị ọ nyị. Ama dị ẹ yị rẹ va zẹ ka ọ̀ rị ọ, dị ahịka aza ẹnẹsa kẹnẹ ẹ vaa rị ọ nị. Osusu kẹnẹ ẹngụ ẹhẹ ọnọnị vị, dị ọ rẹ vị ụya ọdẹngụ nị.

³Ọza ọ zụ ma ozi ẹchẹẹhị dị ọ ku orubo ẹtẹẹtẹrẹ, ama ẹ yị rẹ va nyẹngụ sị ogu ọnị ọ nyị mẹ ayohine ịnị ẹhẹ, ozi ene su tụ ịnị ịnẹ ọnyị anị dị a vaa ma a ọ dahi hu ọza ọnọọ nị.

⁴Osusu kẹnẹ ọ vị ka aa ma ẹngụ ozi ọnọọ nị. Dị ọ rẹ varẹma ịnị ayodu, dị e hi ayị anị nị.

⁵Ọ́ rẹ va mẹ ẹhẹ ẹkụhị ọnya dị ọ hyakụ va yẹ ịsị ẹhẹ vị dee, ama ọnị ọ dị dahi huna ọza ana ya ịnị ẹhẹ dị ẹ yị rẹ va mẹ ayohine vụrụ-vụrụ nị; ka ọnị ọ nyị ụhwọtụ.

⁶Ọza ọnọọ ọ zụ ku orubo ẹtẹẹrẹ ama dị ẹ yị rẹ va sị ogu ọnị ọ nyị mẹ ayohine ịnị ẹhẹ. Aanị ka ẹ yị vị aha ọnyọọnya ọnịrị ozi ene su dị a vaa ma a aa nọ?

⁷Ọza ò re ịsa rị kẹnẹ ọza aa sịị mẹ avaba ụkọrọ ọnị aa mẹ dị ẹ nyị eyi tụ́ ụhwọ́ nị, ama ọza ẹ ma ka a ka ọ sị hụ ọnị ọgọnị.

⁸Sị ọyẹrẹyị vana va sị dahi huni onututu kẹ? Ọgụ sị onosiye vaa rị ịnị ịrẹyọyẹ anị ka ọnị ọ yara mẹ̀ ebira ana vọrọ ịnị ẹhẹ kẹ?

⁹Ịsa ọnị ọza nyị rị ụvọ ọ dahi huni ịsa ana aa va ụvọ anị nị. Ẹngụ ẹhẹ ọnọnị vị osusu, vị ọ sị mẹ̀ ẹ anka ọza oo rere e si ka ọnị ọ̀ dụ ahị za avọọ nị.

¹⁰Aa vịdị sị eto avaba ịsa mẹ tịtẹ o si ku ana hụrẹ yẹ ịsị ọzọza vaa vị. Ẹ yị nyị ọza ene zụ pe Ohomorihi nyị ahankata tụ ịrẹsụ ẹhẹ anị.

¹¹Wàa kụ ịrẹka pooro, osusu ọ vị nị, avọọ ọgụ sị ọza àa rị ịnị ẹngụ ahankata ẹnẹẹ?

¹²Ẹnẹ ka ọnị ọọ yẹ ịsị e rere ọza hu ịnị ụmẹ chee ọnị ọ nyị ọyị mẹ ịnị ẹhẹ osusu ọnọnị? Ẹhẹ vị anaa para hu anka ụmọmọ́ avọọ. Ẹnẹ nyẹngụ ka a ịsị ẹ vaa mẹ ịrẹma ọza, ọọ sị hụụnị ẹhẹ kẹ?