Read ebira Ahẹ Isoromọnị 1 Bible Online

Ahẹ Isoromọnị 1 - ebira bible

Ahẹ Isoromọnị 1

¹Ahẹ ene hu kere-kere ịnị ahẹ ọnị Isoromọnị jị yị.

²Àa yẹ we kụ mị irenu kẹnẹ, ka oyisì ọnị ụ si mi o hine huni eyi eche nị.

³Agụ eturare awụ ô zoza ẹtẹẹtẹrẹ. Àa hị́ ịrẹha awụ kẹnẹ vị anaa mẹ ọzaa tamayị anị. Ọnị ọ mẹ ka avaba anyẹnẹẹ ẹ̀ maanịị turaa ku wu nị.

⁴Navọ wa sị mị za, di ye zwe. Vị ohinọyị amị, dị wa sị́ mị na ngụ aha ọyị sụ̀ awụ de. I vee duduu jẹ, dị yaa mẹrị ẹngụụ huni ọza ene hú eche. Vị́ a vọrọ ka avaba anyẹnẹẹ è sì ịrẹyị awụ nị.

⁵Ẹwụ nịnị anyẹnẹẹ Anijerusarẹmị, ộ yẹ́ ka mee mine de, ama mee zoza. Mee mine anka ajẹngụ ana a jị tụ ẹtẹ Ịkẹda ama mee zoza anka ịta ana a sị jị oze ịnị irehi ohinọyị Isoromọnị.

⁶Asị ụ sị eyi wụ̀ mị nịnị ka maa ta mine agụvị ka ọyị ọ sị mị mẹ̀. Ẹnẹbẹnị amị nịnị ệ kụ́ ayị hi mi, dị ẹ dụ mị ka ma naa mẹ̀ ụkọrọ ịnị ụbazị ene e chire ọchị ịvayịnị hi nị. Mẹ yị kụkụ va nyị ụmẹ ọ́yị tẹsị ẹngụ amị.

⁷Ẹwụ ọnị mị maanị sì ịrẹyị anị, kà a mị daare, ịzị ụ vaa kụ ịsụpa awụ naa rị. Ịzị ẹ vaa yaa tụ́ ụhwọ́ ụmẹ ọọdụ? Sị ẹ vẹ dị mee vee si ụ zịịzị ịzị oseratẹmẹ ana vọ aa kụ ịsụpa ẹnịnịị rị?

⁸Ẹwụ ọnẹẹ ana maanị zoza aanị, wẹ̀ yị yẹ́, vatụra oze ọnị ịsụpa nịnị aa zị dị wa kụ ezi ẹvụ awụ na rị akaha ajẹngụ oseratẹmẹ nịnị kẹ.

⁹Ẹwụ ọnị mi maanị sị ịrẹyị anị, vị ụụ mẹ ka ayị anọrụ nịnị ee hine anka umaata ọnẹẹ mẹẹ mẹ ka ayị umaata araka ohinọyị Anijipiti ee hine avọọ nị.

¹⁰Ịsụtọ ọnị ụ kụ hi ụtọ vị ana mẹ ka okura awụ ẹ̀ tịtẹ ọyịza-ọyịza, dị ịsọbẹ awụ vavọọ mẹ ọrọkọ awụ ọyịza-ọyịza nị.

¹¹Ama ị vaa sị igooru mẹ ịsọbẹ yị wụ, dị ị sị isiriva mẹ̀ ẹ ọvị.

¹²Óhinọyị amị mẹ̀ sụtụ ịnị ịvẹẹdị anị, dị avaba ịzọọ aa dagụ eturare ọnị o che sẹ ẹngụ nị.

¹³Ọ́za ọnị mị sì ịrẹyị anị mẹ sụtẹtẹ tụra amị ịrẹva, ẹngụ anị vị anaa dagụ eturare ana aā hị́ ịmaya.

¹⁴Ọza ọnị mị sị ịrẹyị anị vị ana sị mẹẹ anka ododo ana yara hi ịnị ụbazị ịvayịnị ana ya ịzị aā hị́ Enggedi avọọ nị.

¹⁵Ẹwụ oni mi si, waa da zoza kẹnẹ. Mee ré e ịnị onyeyi awụ ka wee sì ịrẹyị amị.

¹⁶Ẹwụ mị sì ịrẹyị anị hu kere-kere nị, waa da zoza kẹnẹ. Vẹ yaa sị avị ohwoohu jị ode ọ̀yị sụ̀,

¹⁷dị ya sị ọchị ana aā hị́ isida mẹ ọtụ irehi ayị, dị ya rẹ sị ọchị ana aā hi ịsayịpụrẹsị gụ ọ utu.