Read ebira Ahẹ Isoromọnị 2 Bible Online

Ahẹ Isoromọnị 2 - ebira bible

Ahẹ Isoromọnị 2

¹Mị sị mẹẹ anka ododo ana yà ịnị avị ịzị aā hị́ Ịsarọnị avọọ nị. Ododo ozoza ana yà ịnozi mị vị̀ nị.

²Anka ododo zoza mẹ yà ịnị akakana ikeyi avọọ, avọọ ọnẹẹ ọnị mị sì ịrẹyị anị hu aanị mẹ yà ịnị akakana ọnyẹnẹẹ ana vọ nị.

³Ọchị anaā tụ́ ẹtụtụ ana aā hị́ apụrụ mẹ vị irenyi tu ini iruku avọọ, avọọ ọnọrụ ọnị mị sì ịrẹyị anị hu kere-kere aanị mẹ vị irenyi tụ ịnị akakana anọrụ ana vọ nị. Miī sì ka ma yaatụ ịnị uhuhu anị nị. Ẹtụtụ anị vi eneē hine mi ẹtẹẹtẹrẹ.

⁴Ọnọrụ ọnọnị ộ sị mị va ngụ ịzị ọ́ mẹ̀ ịsa va gwẹtẹ, dị ọ sị zụ̀ mị ẹtẹẹtẹrẹ ka ọnị oo sì ịrẹyị amị nị.

⁵Dà ịsọyịrị yị mi, dị ma varẹma nyị ụkata. Sị apụrụ mị ma rị ọ, dị ẹngụ amị ò hi ahị, agụvị ka mme sì ịrẹyị awụ pooro, ọ sị vara ẹngụ aa zị mị.

⁶Àa yẹ ọ̀ sị ụvọha anị pè mi ịrẹsụ, dị ọ̀ sị ụvọrị anị zá mị ku ayị.

⁷Ẹwụ nịnị anyẹnẹẹ Anijerusarẹmị, kà a mị nịnị, dị wa sị uye ana aā hị́ ùnè ọnịrị akọnọ hị́ eku ka wẹ́ yị va kụ awụ nịnị vee zigi yi.

⁸Maa wụ ọngwẹ ọza ọnị mị si. Ee zwee jịnẹ atabaa vẹ.

⁹Ọza ọnị mị sì ịrẹyị aanị vị ana sị mẹẹ anka ẹdọ avọọ. Vị ọ sị mẹẹ anka ozi ùnè araka avọọ nị. Ọnị ọ jẹẹ vaka ugene ịzọọ avọọ nị. Aa dà eyi gee zị oze ini ozokete ọnịrị oze ini enyusẹ ana a sị họ̀ oze.

¹⁰Ọza ọnị mị sì ịrẹyị anị aanị ộ kà mị ka. Ẹwụ ọnị mị si, kwẹẹtẹ, waa dụ mị vẹ de

¹¹Ụmẹ ịrẹsụ ọ sị para hu; orihi ẹ̀ yị kụkụ zụ̀.

¹²Ododo e si nyima aa ha; o si tu ụmẹ ka aa jị ahẹ. Aza aa wụ́ arivadi nịnị maa jị ahẹ ịnị aarẹ.

¹³Ihwigi e si nyima ee ví; ọchị ịvayịnị maa jị ododo avaba aha aa dagụ kwẹ̀ẹ̀. Ẹhẹẹ, ọnị mị si, waa dụ mịị vẹ; ọnị mị si, vẹ ya zị.

¹⁴Vị ụ sị mẹẹ anka arivadi ana tẹ ịnị anaha ịrẹta avọọ nị. Jẹẹ me re eyirẹsụ awụ ọyịza-ọyịza ọnọnị, dị ma wụ́ ọngwẹ awụ ana vavọọ hine avọọ.

¹⁵Jintu za ahaka eweyi-eweyi ẹnẹnị dị e ve du ịvayịnị ayị anaa jị ododo aanịị ha.

¹⁶Ọza oni mi sì aanị vị aamị, dị ẹmịrị vị aanị nị. Ịnị akakana ododo ọyịza-ọyịza ọọ̄ kụ ịsụpa anịị rị nị.

¹⁷Avọọ ọ mẹẹ̄ yà ịzọọ pooro na ngụ ịjị ahị etumeyọnị aa tụ, dị ẹtẹ ee hweyi nị. Ẹwụ ọnị mị si, waa vaavẹ anka ẹdọ avọọ. Waa vẹ anka ùnè araka ana yà ịrẹsụ ataba ịzị aā hị́ Ịbẹta avọọ.