Read ebira Ahẹ Isoromọnị 4 Bible Online

Ahẹ Isoromọnị 4 - ebira bible

Ahẹ Isoromọnị 4

¹Ẹwụ ọnẹẹ ọnị mị sì ịrẹyị anị. Wâ dá zoza kẹnẹ. Dị ụ daka yị vá ịta ku eyi, igoreyi awụ aa sịị zụ ka wee sì ịrẹyị amị. Ẹyịrẹsụ awụ ee henyi anka ọkọnị ẹvụ enee chí otutu Igiriyadii vẹ avọọ.

²Anyị awụ ệ vwẹtẹ anka ọkọnị atẹmẹ ana á kụ́ ẹyị ẹnịnị, di á hụ wa enyi avọọ. Ikonyara é yi vu hụụnị ẹngụ ẹnịnị. Avaba ẹnịnị vị ana gụ chịmị-chịmị.

³Onupa awụ vị enee ví anka owu ovivi avọọ, wàa kà ịrẹyị, irenu awụ aa vá ọza. Dị ụ daka yị vá ịta ku ịrẹsụ, abamị awụ vị ana ya vọnọ-vọnọ aanị.

⁴Ọrọkọ awụ vị ana jẹ ga anka irehi ọgọdọ ọnị Idevidi dà ka aa kụ ẹnya ịrẹkụụ hị́ avọọ. Aa yooro aanị; dị ọswa nị. Ịsọbẹ awụ sị mẹẹ anka ogonto tuturutu ana a kụ gẹ ịnị irehi ọgọdọ ọnọọ avọọ nị.

⁵Ịrẹva awụ ẹyịva aa gẹgẹrẹgẹẹ anka ùnè. Ọ sị mẹẹ anka ezi ẹẹva anaa rị avị ịzị ọchị ana tụ́ ododo ozoza-ozoza hi avọọ nị.

⁶Mẹ vaa ya ịrẹsụ ataba ana a yaā mẹ̀ Ịmaya, ịrẹsụ ataba eturare. Ẹ̀ẹ yị vị ịjị ahị etumeyọnị si nyima aa tụ, dị ẹtẹ ee hweyi.

⁷Ẹwụ ọnẹẹ ọnị mị maanị sì ịrẹyị anị, wâ dà zoza kẹnẹ. Ẹ́ yị nyị ịsị ọzaa du ịnị ẹngụ awụ.

⁸Ose mi, vẹ ya hụụ ịnị ataba ene hi Ịrẹbanọnị aanị. Vẹ ya hụrị Ịrẹbanọnị. Ya hụụ ịrẹsụ ataba Amana ọnịrị ataba Iseniri ne beri ataba Ihamọnị ịzị idu ọnịrị ẹzụ nini hi.

⁹Ẹwụ ose mi anaā sịị ayị amịị hine, eyi oni u si re mi kẹnẹ, ọnịrị ịsọbẹ ọnị u tụ́ ọrọkọ ọ́ sị mị dọ ayị.

¹⁰Ẹwụ ose mi, anaā sịị ayị amịị hine, ịnẹ amị ee hine ka we sì ịrẹyị amị. Oyisì ọnị ụ nyị yị mị oo huni ka à sị eche yị mị. Agụ eturare awụ o huna avaba agụ eturare ana vọ nị.

¹¹Ẹwụ ose mi, onupa awụ ee hine anka ẹhụ avọọ, ịrarẹ awụ vị ana sị mẹẹ anka ịrẹva ụnọ ọnịrị ẹhụ avọọ yị mị. Ịta ọnị ụ kụ́ hi ẹngụ vị anaa dagụ ẹtẹ Ịrẹbanọnị.

¹²Ẹwụ ose mi, ẹwụ anaā sịị ayị amịị hine, vị́ ụ́ sị mẹẹ anka ụbazị ana ya aha ẹvagu avọọ nị. Vị ụ́ si mẹẹ anka ụbazị ana a jị ọvọ kara, à vị enyi ọnị ọza ẹ́ yị mẹ yị avaba aza avọọ nị

¹³Ọchị vị ana yara ịzọọ. Ẹnịnị ẹ hụ anka iruku ọchị ipomegiraneti, dị ẹyaa tụ́ ẹtụtụ ozoza-ozoza. Avị eturare ana aā hị́ ịhẹna ọnịrị Inadi vị ene hi ịzọọ.

¹⁴Avị ịsahwironi, Ikaramụsị ọnịrị isinamoni ne beri avị eturare ozoza-ozoza irenyi-irenyi ana vọ vị ana gwẹtẹ ịzọọ. Avị ana aā hị́ ịmaya ọnịrị aroyesi vị ene hi ịzọọ beri avị anaā sịị mẹ eturare ana nyị agụ hu kere-kere.

¹⁵Enyi vị ene eẹ̄ siì hụụnị okuha naa ngụ ịnị ụbazị ọnọọ, Orosi ene hi ịzọọ vị ene si, dị enyi ee si vụụvụ hụrị ataba Ịrẹbanọnị vaa ngụ ịnị anị nị.

¹⁶Kwẹtẹ ẹwụ ahị anaā tụ́ hụrị eyi ẹbẹẹba, dị ahị eyi ụvẹtẹ ọ tụ́ vẹ ku ụbazị amị. Gara agụ eturare anị hi ịnị ahị. Navọ ọza ọnị mị maanị sì ịrẹyị anị ọ vẹ ịnị ụbazị anị, dị ọ̀ va rị ẹtụtụ ene zoza hu kere-kere ịnị anị.