Read ebira Ayịsaya 11 Bible Online

Ayịsaya 11 - ebira bible

Ayịsaya 11

¹Irima ovwoovu Idevidi ana vị ozi Ijeese vị ana sị mẹẹ anka ọchị ana a ma, di igugu anị yị yà ịnị ẹtẹ avọọ. Anka igugu mẹ̀ẹ varẹma ha dị aa tụ́ avọọ, avọọ ọza ịnya mẹ vaa chịị hụụnị ovwoovu Idevidi dị ọ rị ohinọyị nị.

²Ẹnẹyịmavara vaa sị ụhwẹ anịị tụ́ ịnị ayị anị, dị ọ mẹ ka ọ̀ yẹ ịrẹyị ẹtẹẹtẹrẹ. Ọ rẹ vaa mẹ ka ọ yara pè ọza jiwe, dị ọ rẹ sị ụkata yọ. Ohinọyị ọnọọ vaa yẹ ịsa ọnị Ohomorihi sì,

³dị ọ rẹ nyayịnẹ sị ụbanyị yị Ohomorihi bẹẹ. Ẹ yị vị ịsị o sị eyi re ọnịrị ịsị a kà yọ kẹnẹ ọ vaa sị mẹ̀ ọkarẹyị.

⁴Ịzẹyịza kẹnẹ ọnị vaa sị mẹ̀ ọkarẹyị nị. Ọ yị vaa rara ọkarẹyị ọza agụvị ka ộ mẹhị vi onosiye. Ịrẹyị ọnị ọ ka vi inori ana vaa sị ụyaa rị anẹhẹ. Irenu aa sịị tụ́ ụhwẹẹ kú aza edivi, di e sú va ha nị.

⁵Ohinọyị ọnọọ vị ana vaa mẹ ịzẹyịza ọnịrị ebira ana vọrọ. Ọ raà sị ebira ẹnẹẹ tenyi ẹngụ ka oni ee pè ọnịvị anịị vụ̀ ịrẹvụ.

⁶Ịjị ụmẹ ẹngwọọrọ ọnọọ òo si tù, akatapooro ọnịrị ozi atẹmẹ maanị vee duduu hi aha ọnya. Ẹzụ ọnịrị ẹvụ va hụtẹtẹẹ aha ọnya vaabẹ, di idu ọnịrị ozi imaaru dudu aa rị avị. Dị ahịka ozi oweyi ọnya aanị aa kụ́ waa rị nị.

⁷Imaaru ọnịrị ọdụmị vee dudu rị ịsa aha ọnya, di ezi ẹnịnị aa vaa hura ẹngụ. Idu vaa rị avị anka imaaru avọọ.

⁸Ozweyi maanị vaa mẹ aahẹ ọgụrị ịzị ẹwụ odivi yà, dị ọ hyakụ jị ụvọ ngụ ịzị ọ yà, dị ẹ yị nyị ẹwụ ọnọọ mẹ̀ kà yọ.

⁹Ịnị ụmẹ ọnọọ, ịrẹsụ Ịzayọnị ana vị ataba Ohomorihi, ẹ yị vaa nyị ịsị ẹ vaa mẹ̀ ọza ịsa odivi. Òkū mẹ̀ vị enyeenyi avọọ, avọọ avaba ẹhẹ mẹ̀ vaa yẹ ịsa oni Ohomorihi sì nị.

¹⁰Ụmẹ ọnyara aa vẹ, ịhị ọnọọ anovwoovu Ijeese ana vaa vi ohinọyị vị ana vaa jẹẹ dị avaba aza che ayị za a. Ịzị ọ vaa yà vaa nyị ụbanyị ẹnẹmẹhị.

¹¹Ịhị ọnọọ Ananyị yị rẹ vaa sị ụkata kụ́ ọza anị ana vọ ene hi ẹkụra ẹnịnị vẹ: Asiriya, Ijipiti ụvẹtẹ ọnịrị ẹbẹẹba, Ikusi, Erami, Ịbabịrọnị, Ihamati ne beri ẹkụra ene hi ịnị akakana oku.

¹²Ananyị yị vaa tana uyi anịị tụ́ ẹba dị ọ̀ sị zụ̀ anẹkụra ana vọ ka ọnị aa kụ́ Anisirẹrị vaa vẹ eehi. Ọ vaa kụ́ avaba Anijuda hụrẹ ịzị èe che ne hi ẹhẹ, dị ọ kụ́ wa vẹ eehi.

¹³Anisirẹrị e yi kuku vee pè Anijudaa kụ̀ ụhị. Anijuda ẹnị ẹyị rẹ kuku vee re Anisirẹrị ọnịvịị ẹnịnị.

¹⁴Ẹnịnị kụkụ vaa vaa bẹ dị ẹ baku Anihwirisiti. Di e nyima hụrẹ eyi ọnị ọyịị̄ zị naa ngụ ẹtẹ, dị ẹ vavọọ chaka wa na ngụ eyi ọnị ọyịị̄ zịị hụrẹ. Ẹ rẹ vaa kụ́ ịrẹkụ naa rị Anedomi ọnịrị Animowabi. Dị Anamọnị kụkụ vị ọrịhị ẹnịnị.

¹⁵Ẹnẹyịmavara vaa mẹ ka enyi ini okuha Ijipiti ẹ̀ wụ. Dị ọ rẹ tụ́ ahị ịrịịra kú Okuha Iyuhwireti. Dị ọ ha a hi oze ịhịmba. Aza ẹ yị hyakụ kụkụ aa tụ̀ adava dị ẹ̀ jịnẹ wa.

¹⁶A vaa tụ́ oze ọbanyị ị yị Anisirẹrị ana vọ ana aa hụrẹ Asiriyaa vẹ, anka a mẹ̀ tụ́ oze yị Anisirẹrị ịyẹẹyẹ ẹ mẹ hụrẹ Ijipiti aa vẹ.