Read ebira Ayịsaya 16 Bible Online

Ayịsaya 16 - ebira bible

Ayịsaya 16

¹Animowabi ene hi Isera ệ sị atẹmẹ tụ́ ka à sị zi oze ịnị inomi na yị ohinọyị Anijerusarẹmị.

²Anyẹnẹẹ Animowabi ana a navọ hi ụtọ okuha Arinọnị vị ana sị mẹẹ anka inomi ana a dụ hụụnị ịrẹngwẹ anị avọọ. Ẹnịnị vị ana aa doodo zị kẹnẹ.

³Ẹ ka Anijuda ẹ̀ navọ è pè ẹnị juwe dị ẹnị ẹ̀ yẹ ịsị a vọrọ ka ẹnị ẹ̀ mẹ. Ẹ ka ọ̀ và ihuhu gu ẹnị anka ọchị mẹ̀ẹ vị ihuhu yị aza ụmẹ ọọdụ avọọ. Ẹ ka aarịhịnị Anijuda ẹ̀ kụ́ aza ene zwe vẹ ịda ẹnịnị tẹ, asị ẹ zẹẹ ka aza è re wa.

⁴Animowabi ene zwe nọ ịda Anijuda ka Anijuda ẹ̀ navọ ẹ̀ sị ẹnị tẹ, dị asị a wụ ẹnị. Ụmẹ ọnọyịha ana vịdịị mẹ ẹchakaa yị ọza vaa ta. O mē vene kuku vú ọza ẹtẹ ịnị ẹtẹ ọnọọ.

⁵A vaa nyị irima anovwoovu Idevidi ana vaa rị ohinọyị. O vee sì ịrẹyị ọza, dị ahịka ịzẹyịza aa sịị mẹ̀ ọkarẹyị nị. Ịsa ana vọrọ kẹnẹ ọ vaa mẹ nị.

⁶Anijuda ka ẹnị ệ vịdị yẹ Animowabi mẹmẹẹ mẹ eyi. Vị ọ nyayịnẹ ẹ mẹ eyi ẹnẹmẹhị nị. Ama irenu osusu kẹnẹ ẹ vavọọ nyị nị.

⁷Animowabi vee sụ ùnè agụvị ụya ana vaa rị wa. Ẹ̀ẹ tamayị ẹ mẹmẹ vidii ree rị ẹkụra Ikiri-Ihareseti, ẹnịnị vee ro ịrẹyị dị ẹ yaa jị òrèrè.

⁸Ịsa ịnị aarẹ Ịhẹsịbọnị ọnịrị aarẹ ana yà Isibima e kú du ha saka-saka. Ọchị ịvayịnị ene hi ịzọọ vịdịị tụ̀ dị aza aa sịị mẹ eche oni ohinọyị nịnị ee hú di aa mẹrẹ wa. Ọchị ẹnẹẹ vị ana vịdị gụ ẹtẹ huu hụụnị ụnọmị eyi ọnị ọyịị̄ zịị vẹ, dị ọ vavọọ na ngụ ụtọ oku nị. Ama a sị avaba anị du ha saka-saka.

⁹Maa jị òrèrè agụvị ọchị ịvayịnị Isibima anka m mẹ̀ jị òrèrè agụvị Ijaza. Anihesiboni ọnịrị Anireyarehi e yi re ịsa sị hụụnị aarẹ ana vọrọ ka ẹ̀ mẹ waa ịnẹ hine. Ọnọọ ộ mẹ̀ ka ma ká ẹgọ.

¹⁰Kụkụ nyị ọkụrịkụ ọnị ịnẹ anị ee hine dị ọ̀ọ jị ahẹ ịnị aarẹ. Kụkụ nyị ọza ana aa kwọrọ ẹtụtụ ịvayịnị ịnị ụkọ dị a va sị mẹ eche. Avaba ahẹ ẹnẹẹ ệ ta.

¹¹Ịrẹyị Imowabi ọnịrị Ikiri-Iheresi ộ mẹ̀ ka ayị amị ò du ẹtẹẹtẹrẹ.

¹²Animowabi aa nọ ịnị ataba ịda ori ẹnịnị ka vị ẹnị aa naa mẹ̀ aduwa nị. Vị ẹ yaa sị ụyaa rị ẹngụ ẹnịnị kẹnẹ nị, ẹ yị nyị ọgụvọ ẹnẹ ẹ zụ mẹ yị wa

¹³Avọọ Ẹnẹyịmavara mẹ̀ vịdị kà a nị.

¹⁴Ẹnẹyịmavara rẹ ka ịnị ịrayị ẹẹta tụ́ ọ, avaba ogu Animowabi vaa ta. Aza chẹkẹẹ aanị ọ vaa vẹtẹ ịnị aza otomiroku ene hi ịzọọ nị. Ọkụmị-ọkụmị aza ana vọ vaa vị bẹẹ nị.