Read ebira Ayịsaya 19 Bible Online

Ayịsaya 19 - ebira bible

Ayịsaya 19

¹Ịrẹyị ene vee tù Anijipiti yị: Ẹnẹyịmavara vị ana tụra eguhi di ee zwee ve Ijipiti. Ori Anijipiti nịnị mè re e, ẹngụ ẹnịnị ẹ kụ́ sù ẹgahị, dị angwahi sị ngụ Anijipiti ẹngụ nị.

²Ẹnẹyịmavara kà ọnị vaa mẹ ka Anijipiti ẹ̀ kwẹẹtẹ tù ẹngụ. Ịrẹkụ vaa chị yị ẹyịnyara. Anokokooro ẹnyị vaa kwẹẹtẹ tù ọsa, dị anẹkụra ẹnyị rẹ kwẹẹtẹ tù ọsa. Avọọ ohinọyị nịnị mẹ̀ vaa kwẹẹtẹ tù ẹngụ dị ẹ yaa kụ̀ ịrẹkụ nị.

³Ẹnẹyịmavara kà avaba ịsa ana Anijipiti ro ka ẹnị aa mẹ vị ọnị ọnị aa dọ waa duu ha, di angwahi ngụ wa ẹngụ. Ọ kà Anijipiti nịnị vaa nọ ịda ori, ẹ rẹ vaa nọ ịda aza ene eē pè okuu kà ịrẹyị ka ẹnị ẹ̀ na zama ẹtẹ.

⁴Ẹnẹyịmavara Ananyị yị Ochẹtẹngụ ka ọnị vaa sị Anijipiti nịnị chire ohinọyị ana aa chamayị ụvọ, dị ahịka ohinọyị odivi aa mẹ ịjọvaa tụra wa nị.

⁵Okuha Ịnayịrị vaa wụ̀ dị ọ jị adavụ.

⁶Dị avaba ịzị a ha enyi anị zị kụkụ aa dà agụ. Avaba orosi ene hi Ijipiti vị ana vaa wụ̀, dị ịkẹ ọnịrị avị ene hi ịnị anị sú va ha. Avaba ọchị ene hi ini okuha Ịnayịrị

⁷ọnịrị avaba ịsa ene e chire hi ụtọ anị vị ana vaa wụ̀ di e sú va ha.

⁸Ozube ivovo nịnị vee nowu, di eyee sụ ùnè. Avaba aza ene ee che arị ọnịrị aza ana aā và ọha ini okuha Ịnayịrị vaa rị ụya.

⁹Aza ana aā sị owuu hi ịta ẹ sị dà.

¹⁰Ịrẹyị odivi vee tù avaba aza ene ee hí ịta ọnịrị aza ana aa mẹ̀ ụkọrọ utosi.

¹¹Ọdọvịdị Anizowanị nịnị vị ọnụra. Ọyẹrẹyị ene ee pè Ihwarawo juwe vi ontutu sị ụ zụ sị kà a yị Ihwarawo ka ẹwa rẹ yẹ ịrẹyị? Ụ mẹmẹ zụ kà a ka ini ogu aza ana yẹ ịsa ịyẹẹyẹ ana aā dụ ohinọyị zị ụ yà nị?

¹²Ẹwụ ohinọyị, ịzị onuwọjị awụ hị́? Kà a ẹ̀ kà a zụ̀ wụ dị wa yẹ ịsị Ẹnẹyịmavara kà ọnị vaa mẹ Anijipiti.

¹³Ọdọvịdị Anizowanị ọnịrị Ijipiti vị ọnụra. Ẹnị ana a ka ẹ̀ si oze zụ̀ aza, ẹ raà kụ́ wa nyeeyi.

¹⁴Ẹnẹyịmavara ọ raà mẹ wa ka asị ẹ yẹ ịsị ẹ yaa mẹ. Avaba ịsa ana Anijipiti aa mẹ vị ana aa mẹ anka ọza ene eche aa mẹrị ana hyẹdụ ne ngụ ịzị ọ hẹrẹ hị́ avọọ.

¹⁵Nyị ọza ikonya ini Ijipiti ana mẹ ọgụvọ. Opisa ọ yị zụ gụ wa ụvọ. Onosiye ọ yị rẹ zụ gụ wa ụvọ. Aza ene eyi yẹ ọnịrị aza ana aza ẹ̀ yị yẹ, ẹ yị nyị ịsị ẹ zụ mẹ.

¹⁶Ụmẹ ọnya aa vẹ. Ịhị ọnọọ Anijipiti vee re ka Ẹnẹyịmavara Ochẹtẹẹngụ ọ sị kwẹẹtẹ ka ọnị ọ̀ sị ụya rị ẹnị Ẹnịnị vee hí angwa anka ọnyẹnẹẹ avọọ.

¹⁷Anijuda vee chẹrẹ Anijipiti angwa. Ịjị Anijipiti ẹ̀ẹ wụ́ ịsị Ẹnẹyịmavara kà ọnị vaa mẹ, ọza ana àa kụkụ wụ́ ịrẹyị Anijuda kẹnẹ vị ana vaa dà ẹgahị.

¹⁸Ịnị ụmẹ ọnọọ anẹkụra ẹẹhị ịnị ẹtẹ Ijipiti vaa kà ẹkụra Anikenaani. Ẹnịnị vaa hị́ eku ka Ẹnẹyịmavara Ochẹtẹẹngụ ẹnị kụkụ aa hẹkẹ nị. Ọnya ịnị ẹkụra ẹnẹẹ vị ana a vaa hị́ Iheremi.

¹⁹Ịnị ụmẹ ọnọọ e vee hi ụta tụ́ ịnị akakana Ijipiti yị Ẹnẹyịmavara. A rẹ vaa tụra ịrẹtaa tụ́ ụtọ ẹtẹ Ijipiti yị Ẹnẹyịmavara.

²⁰Ọnọọ ọ vaa sị zụ̀ ka Ẹnẹyịmavara yà ịnị ẹtẹ Ijipiti nị. Ịjị aza aa sị ụyaa rị Anijipiti di e nowu na za Ẹnẹyịmavara nị, ọ vaa tụ́ ọza ka ọ̀ na dọ wa tụ́.

²¹Ẹnẹyịmavara vaa mẹ ka Anijipiti ẹ̀ yẹ ọnị. Anijipiti vaa yẹ Ẹnẹyịmavara ịnị ịhị ọnọọ, dị ẹ rẹ yaa hẹkẹ ẹ. Ẹnịnị vaa kụ́ ịsa dị ẹ̀ sị va mẹ̀ ịsọvọ yị Ẹnẹyịmavara kà ẹnị vaa mẹ, avọọ ẹ mẹ̀ vaa mẹ̀ ẹ nị.

²²Ẹnẹyịmavara vaa sị́ ụyaa rị Anijipiti, dị ọ rẹ varẹma kụ́ wa ẹngụ nịya.

²³A vaa nyị oze ọbanyị ọnya aanị ịnị ụmẹ ọnọọ ana hụrẹ Ijipiti na ngụ Asiriya. Anijipiti vaa nọ Asiriya di Anasiriya ẹnị nọ Ijipiti di e dudu aa hẹkẹ Ohomorihi vaa bẹ.

²⁴Ịnị ụmẹ ọnọọ, a vaa nyị Anijipiti ọnịrị Anasiriya, di Anisirẹrị vị ọgụ ọhụta. Ẹnị ẹyịta vaa vi ize yị anẹhẹ.

²⁵Ẹnẹyịmavara Ochẹtẹẹngụ vaa mẹ̀ aduwaa yị wa. Dị ọ ka ò zee yi Anijipiti aza amị, ò re zee yị Anasiriya ana vị ụkọrọ ụvọ anị, di ò re zee yi Anisirẹrị ana vi ogu amị.