Read ebira Ayịsaya 28 Bible Online

Ayịsaya 28 - ebira bible

Ayịsaya 28

¹Wa sị da nịnị, ẹwụ nịnị Anehwireemi ana aa mẹ eyii zị. Ụbanyị awụ nịnị aa sa anka amu ohinọyị ọnị ọdọvịdị awụ nịnị kú avọọ. Amu ọnọọ aa saa tụ́ ịrẹsụ ọdọvịdị awụ nịnị ana ahịka ohweche ẹnị vị nị. Wa sị dà, ẹwụ ọnọọ ana vị ohirẹsụ ẹtẹ ene zoza oni ohweche ene hi ịzọọ aa sịị mẹ eyi. Dị ẹ daka vavọọ aa mii mẹ eyi, eche vi ene hú wa ẹtẹ.

²Ananyị yị ộ nyị ọza ịnya aanị ana nyị ụkata ẹtẹẹtẹrẹ. Ọza ọnọọ ô tenyi ẹngụ ẹtẹẹtẹrẹ. Ọ vaa vẹ kúkùkù anka orihi ẹbanyị ana zụ di ihinẹba aa sụ ata dị ẹtẹ aa kụ́ ọhaara. Ọ̀ọ vavọọ vẹ, di o hú aza ẹnẹẹ ẹtẹ và hi ẹtẹ.

³Ọ̀ọ vavọọ si ohweche ẹnẹẹ ene kú amu ohinọyị, dị ẹ yaa sii mẹ eyii hú ẹtẹ, dị aza kụkụ aa kụ́ ahụụ hi waa za ụdọ.

⁴Ụbanyị oni ohirẹsụ ẹtẹ ozoza ọnọọ aa sii mẹ eyi vị ana a vaa dọ ọ dị ọza o yi kuku re e. Vị ọ vaa sị mẹẹ anka ẹtụtụ ọchị ana aā hị́ ihwigi avọọ nị. Ọza ene èe vịdị re ene vi ịnị anị di ò ve tù ụmẹ ana a sị ha a, ọ wụsẹ vịdị aa ha a nị. Ọ̀ọ sị ọ ha kẹnẹ dị ọ wụsẹ mụnẹ ẹ.

⁵Ịnị ụmẹ ọnọọ Ẹnẹyịmavara Ochẹtẹẹngụ vị ana vaa sị mẹẹ anka amu ohinọyị ana nyị ụbanyị. Ọnị aza ẹnị ana vọ vaa sị mẹ ọvị nị.

⁶Ẹnẹyịmavara vaa mẹ ka aza ana aa mẹ̀ ọkarẹyị ẹẹ mẹ ịzẹyịza. Dị ọ rẹ sị ụkata yị aza ene ee sere ẹkụra ka ẹ̀ zụ dụ ọnịvị varẹma.

⁷Ọnịsẹ nịnị ọnịrị ohirẹsụ irehi Ohomorihi ẹnị vi ene re hú eche dị aa mẹrị wa ẹtẹẹtẹrẹ. Eche ộ mẹrị wa pooro ẹ yị kụkụ yẹ ịsị ẹ yaa mẹ, dị ahịka vị ẹ kụkụ aa và angga kẹnẹ nị. Eche ộ mẹrị ọnịsẹ nịnị pooro ne tu ka Ohomorihi ọ̀ọ kụkụ sị ịrẹyị zụ̀ wa e yi re e. Eche ọnị ọ yị rẹ zẹẹ ka ohirẹsụ irehi Ohomorihi nịnị ẹ̀ kụkụ yẹ a mẹ̀ vọrọ ka ẹ̀ẹ mẹ̀ ọkarẹyị.

⁸Avaba ịzị ẹ yaayịtẹ tụ́ vị ẹnị ẹ hẹrẹ hi, ẹ yị hyakụ maanị dà aha tịtẹ vụrụ-vụrụ.

⁹Aza ẹnẹẹ ka, “Ẹnị Ẹnẹyịmavra ro ka yaa vị? Sị ẹ vẹ dị ọ manị kà yị yị? Ẹyị wáá vi ozinụvọ ana ayịị ka aa jị hụụnị ịrẹva aanị nị?

¹⁰Aa vatụra ịrẹyị ọnyọọnya yị pooro. Ọ̀ọ kà ọnya ịnị ụmẹ ọnya, chee ịzẹnị, chee ịzọsọọ.”

¹¹Booro aanị, Ohomorihi vee beri aza anị kà ịrẹyị. Ọ vaa tụ́ anẹkụra ọsa ana vaa chamayị yị wa, ana va kà ẹkụra ọzọga yị wa.

¹²Ohomorihi ọ raà kà yị aza anị ka, “Ịzẹnị ọ vị aha ụhwọtụ nị. Ọza ọnị ọ̀ọ sị ngụ ẹngụ ọ vẹ ịzẹnị va tụ ụhwọ. Aha ūhwọtụ obooro yị.” Ama ẹnịnị ẹ yị zẹẹ ka ẹnị wụ́.

¹³Agụvị avọọ ịsa ọnyọọnya Ohomorihi vaa kịị kà a yị wa nị, dị aa vaa tụra ịrẹyị ọnyaa yị wa pooro. Dị ahịka ịsa ọnị ọ sị zụ̀ wa ẹẹrị ọ raa sịị zụ̀ wa ajịnị nị. Ẹnịnị vị ana vaa na dị ẹ na hyẹdụ, dị ẹ và angga ịrẹma-ịrẹma, dị ẹ tụ̀ ụnava. Avọọ ẹ mẹ̀ vaa ngụ ịnị ịrẹma ọnịvị ẹnịnị, dị ịrẹkụ kụ́ wa na nị.

¹⁴Ẹwụ nịnị ana aā mẹ̀ isiya, ana vị ọdọvịdị Anijerusarẹmị, batọ dị wa wụ́ ịrẹyị ẹnị Ẹnẹyịmavara aa kà.

¹⁵A vi wee wo oto nịnị ka ewuri iswọọza ọ sị eku hị́ yị ẹngụ nịnịị? Ụ ka ịrẹyị ọnịrị ikuta ọ sị jẹẹ nịnị. Wee ro o ka ịrẹyị odivi ọ̀ọ vẹ, o yi kuku vee tù wu nịnị agụvị ka wa raà si ireche jị ọvọ gu ẹngụ hi nịnị. Ireche ụ sị mẹ ịzị ụ na tẹ̀ tụ́ nị.

¹⁶Batọ o, dị wa wụ́ Ẹnẹyịmavara ana vi ohinọyị keekere mẹ̀ kà. Ọ kà ọnị ộ nyị ịrẹta ọnya ọnị ọnị sị jẹẹ tụ́. Ọ kà a raà zama ịrẹta ọnọọ re, ịrẹta ọnọọ vị ọzẹnya irehi, vị ọ nyayịnẹ si iruvo irehi jẹẹ nị. Ọ rẹ ka ọza tụra ọza ana àa sị ayị tụra a, ụhị ọ yị vaa nyị ọ.

¹⁷Avaba ịsị waa mẹ nịnị vị ana sị mẹẹ ọza òo rere aa dà irehi avọọ. Ohomorihi ka ọnị vaa sị ịrẹyịzaa pè e anka a mẹ̀ẹ si obo pè irehi di è re ọ mẹmẹ vọrọ avọọ. Ireche ọnị ụ sị jị ọvọ gu ẹngụ hi vi oni orihi vaa zụ̀ụ hị́ di enyi hì ọ na và ha. Ịzị ụ ka wa na tẹ̀ tụ́ vi eni enyi vaa kụ́ naa vàa ha.

¹⁸Eku ẹnị ẹwụrị iswọọza hị́ yị ẹngụ vị ana vaa vi osusu. Ịrẹyị ẹwụrị ikuta oni u ro ka ọ sị jẹẹ vị ana vaa tụ́ ahịị ha. Ịjị ịrẹyị odivi ọ̀ọ vẹ, vi o vee hú wu ẹtẹ nị.

¹⁹Avọọ ịrẹyị odivi mè vee tù wu ẹnẹnẹ-ẹnẹnẹ ọnịrị oruva-oruva nị. Ịrẹyị ọnọọ vị ana vaa rị wụ. Wàa yẹ iruvo ụtụ oni Ohomorihi tụ́ hi wu, ẹgahị vị ana vaa ngụ wụ ẹngụ.

²⁰Vị ụ vaa sị mẹẹ anka ọza ịnya ene e si che ụhị́rẹyị ka, “ịbẹẹdị anị ọ yị gọdọ ana hụ ọ tana tụ́, ịta anị ọ yị rẹ gana ana hụ ọ kú ẹngụ.”

²¹Ẹnẹyịmavara rẹ vaa kụ̀ ịrẹkụ anka ọ mẹ̀ vịdị kụ̀ ịrẹkụ ịnị ataba Iperazimi ọnịrị Igibiyọnị. Ọ vaa mẹ ịrẹyị ọnị ọza òó yi vịdị re da.

²²Ụ màa wụ́ ịrẹyị ọnọnị nịnị aanị, asị ụ mẹ̀ isiya nịnị. Wàa sị mẹ̀ isiya nịnị, ẹ yị nyị ịsị aa mẹ dị wa zụ há ịnị ịrẹkụ ọnọọ nịnị. Ẹnẹyịmavara Ochẹtẹẹngụ ọ raà kà a mị ka ọnị ọ sị ọ kà ka à wụ̀ avaba aza ene hi ịnị ẹtẹ ọnọọ.

²³Batọ dị wa wụ́ ịrẹyị amị nịnị. Mị ka wa sị ụtọ pe ịrẹyị ọnị maa kà nịnị!

²⁴Ọkụrịkụ ee huru ẹtẹ ka oni ò chire ịsa tụ́ ọ, aanị ka vi óō huru ọ pooro kẹnẹ nị? Mị ka méé re ọkụrịkụ ana ahịka vi óō huru ẹtẹ pooro kẹnẹ nị?

²⁵Mâ yẹ ka ọkụrịkụ ọ̀ọ sị ẹtẹ huru ihu ọ kụkụụ mii hị́ ọ nị. Ọ̀ọ sị ịsa ịnị aarẹ ana aā hị́ ihwiti ọnịrị ibaari ne beri ịsa ana vọ, di o chire ọzọza hi aha anị.

²⁶Ohomorihi ọ́kụrịkụ ọ vavọọ si zụ̀ ọ a mẹ̀ vọrọ ka ọ̀ dà aarẹ nị.

²⁷Ọza ọ mā sị arubebe tú ihwiti ọnịrị ibaari. Ịsa ẹnẹ ẹ̀ yị zẹẹ rata e siī tụ́ wa nị.

²⁸Ọza ọ mā sị arubebe chaka akụ anị và ha. Â nyị a mẹmẹẹ sị ọchịị tụ́ ini umaata dị a tangwa si tụ́ ọ, dị asị ọ chaka và ha. Òo si o tụ́, dị ọ va na kụ̀ ọ, dị ọ̀ sị mẹ ịbụrẹẹdị.

²⁹Ẹnẹyịmavara ana nyị ụkata ọ rẹ sị sị zụ̀ aza ka ẹ̀ vavọọ yara mẹ̀ ẹ nị. Á yị nyị ọza ana zụ yẹ ịsa ẹnị Ẹnẹyịmavara aa mẹ. Ịrẹyọyẹ anị ộ dẹngụ ẹnẹmẹhị.